Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 13 - BAEBOLO ANZƐƐ BULUKU NWUANZANWUANZA

Bɛtu belamunli mralɛ bɛamaa Ɛdɛnkɛma

¹ Ɛdɛnkɛma zele Mosisi kɛ,

² “Tu belamunli mralɛ kɔsɔɔti maa me, sonla o, nane o, biala mɔɔ kɛlumua kɛkpakye awodeɛ wɔ Yizilayɛ maanle nu la le me ɛdeɛ.”

Angye Ɛvoyia ne

³ Na Mosisi hanle hilele menli ne kɛ, “Bɛhakye ɛnɛ kenle ko ye, ɔle kenle mɔɔ bɛvile Yigyibiti, na bɛvile akɛlɛzonlenlɛ nu la, ɔluakɛ Ɛdɛnkɛma luale tumi kpole zo a ɔyele bɛ ɔvile ɛkɛ a. Bɛmmadi kpanwo mɔɔ mgbɔvonle wɔ nu la.

⁴ Ɛnɛ kenle ye, siane Ebebe ye anu yɛɛ bɛlɛkɔ a.

⁵ Na saa Ɛdɛnkɛma fa bɛ dwu Keena mɔɔ le Hɛtema, Amɔlema, Haevaema, yɛɛ Gyibɛsema azɛlɛ ne mɔɔ ɔvale ɔbɔle bɛ ze mɔ ɛwɔkɛ, na ɔle azɛlɛ kɛnlɛma mɔɔ kye aleɛ la azo a, bɛli ɛvoyia ɛhye wɔ siane ɛhye anu.

⁶ Bɛli kpanwo mɔɔ mgbɔvonle ɛnle nu la kenle nsuu, ye kenle nsuu ne azo bɛli ɛvoyia ne bɛwula Ɛdɛnkɛma anyunlunyia.

⁷ Bɛbali kpanwo mɔɔ mgbɔvonle ɛnle nu la kenle nsuu; ɔnle kɛ bɛnwu mgbɔvonle wɔ bɛ nwo wɔ maanle ye kɔsɔɔti anu.

⁸ Kenle ko ne bɛha bɛhile bɛ mra mrenya ne mɔ kɛ, ‘Debie mɔɔ Ɛdɛnkɛma yɛle manle me wɔ mekɛ mɔɔ menvile Yigyibiti la ati ɔ.’

⁹ Na ɔbayɛ kɛ sɛkɛlɛneɛ mɔɔ wɔ bɛ sa anwo na yeayɛ kɛ ngakyedeɛ wɔ bɛ nwoma azo, amaa Ɛdɛnkɛma mɛla ne ala bɛ nloa, ɔluakɛ ɔlua tumi kpole zo, Ɛdɛnkɛma ɛye bɛ ɛvi Yigyibiti.

¹⁰ Yemɔti bɛzie maamɛla ɛhye ɛvolɛ biala wɔ ye mekɛ ne anloa.

Belamunli mralɛ

¹¹ “Na saa Ɛdɛnkɛma fa bɛ dwu Keena azɛlɛ ne mɔɔ ɔvale ɔbɔle bɛ nee bɛ ze mɔ ɛwɔkɛ la azo, na ɔfa ɔmaa bɛ a,

¹² debie biala mɔɔ kɛlumua kɛkpakye awodeɛ la bɛdu bɛzie ahane bɛmaa Ɛdɛnkɛma. Ɛnlankɛ biala ara nyinli mɔɔ lumua la le Ɛdɛnkɛma ɛdeɛ.

¹³ Asoaso biala ara mɔɔ lumua la, bɛbava boane ralɛ bɛahakyi ye, na saa ɔ menle ɛngulo kɛ ɔkɛhakyi ye a ɛnee ɔwɔ kɛ bɛbu ɔ kɔme. Ɔwɔ kɛ bɛkpɔne belamunli ralɛ nrenya biala.

¹⁴ Saa kenle bie bɛ mra biza bɛ kɛ, ‘Ɛhye abo a le duzu?’ a, bɛha bɛhile bɛ kɛ, ‘Ɛdɛnkɛma vale tumi kpole a yele yɛ vile Yigyibiti wɔ akɛlɛzonlenlɛ nu a.

¹⁵ Ɔluakɛ mɔɔ Yigyibiti belemgbunli ne zile ye ahonle yɛle dapele na ɔdule ɔ gye kɛ ɔnrɛmaa yɛnrɛhɔ la, Ɛdɛnkɛma hunle belamunli mralɛ kɔsɔɔti mɔɔ wɔ Yigyibiti azɛlɛ ne azo la; ɔhunle menli belamunli mralɛ, ɔhunle nyɛmoa amra mɔɔ lumua. Yemɔti yɛfa belamunli ralɛ nrenya biala mɔɔ kɛkpakye awodeɛ la yɛbɔ azu yɛmaa Ɛdɛnkɛma, na yɛ mra mrenya belamunli mralɛ mrenya ne mɔ, yɛkpɔne bɛ.’

¹⁶ Ɔbayɛ ngakyedeɛ nee sɛkɛlɛneɛ yeamaa bɛ wɔ bɛ sa anwo anzɛɛ bɛ nwoma azo; ɔluakɛ Ɛdɛnkɛma vale tumi kpole a yele yɛ vile Yigyibiti a.”

Amungu mpila nee senle mpila ne

¹⁷ Mɔɔ Yigyibiti belemgbunli ne manle menli ne adenle kɛ bɛhɔ la, Nyamenle ammaa bɛampe Filisitiama azɛlɛ zo wɔ mekɛ mɔɔ ɛkɛ ne a le adenle sikalɛ la, ɔluakɛ Nyamenle hanle kɛ, “Saa menli ne mɔ dua ɛkɛ na bɛkɔtɔ konle nu a bɛkɛvu bɛ nwo na bɛkɛzia bɛkɛhɔ Yigyibiti bieko.”

¹⁸ Na Nyamenle manle bɛbɔle fienemgbole ne mgbɔlɔka bɛvale Ndɔ Nyevile ne adenle zo. Yizilayɛma vile Yigyibiti wɔ mekɛ mɔɔ ɛnee bɛwie bɛ nwo boɔboa wɔ konle nu la.

¹⁹ Na Mosisi zale Dwosefi mbowule ne hɔle, ɔluakɛ ɛnee Dwosefi ɛha ndane ɛdo Yizilayɛma anwo na yeze bɛ kɛ, “Nyamenle baralie bɛ, na saa bɛlɛkɔ a bɛmmagyakyi me mbowule ne ɛke.”

²⁰ Na bɛvi Sɛko bɛdule bɛ bo bɛhɔyɛle azokoɛleɛ wɔ Yitam, wɔ fienemgbole ne anloa.

²¹ Alehyenlɛ nu, Ɛdɛnkɛma yɛle kɛ amungu mpila la lile bɛ nyunlu hilele bɛ adenle. Nɔɔzo noko ɔyɛle kɛ senle mpila la manle maanle nu yɛle wienyi, amaa bɛahola bɛadu bɛ adenle ne ewiazo nee nɔɔzo.

²² Amungu mpila ne nee senle mpila ne mɔɔ hilele bɛ adenle ewiazo nee nɔɔzo la angyakyi menli ne adevinli.