Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 1 - BAEBOLO ANZƐƐ BULUKU NWUANZANWUANZA

Bɛyɛ Yizilayɛma amumuyɛ wɔ Yigyibiti

¹ Yizilayɛ amra mrenya mɔɔ ɔ nee bɛ hɔle Yigyibiti la aluma ɛne, ko biala nee ye abusua ekpunli:

² Wulubɛn, Semɛyɔn, Livae nee Dwuda,

³ Yesakaa, Zɛbulɛn, Bɛngyaman,

⁴ Dan nee Nafetalae, Gaade nee Ahya.

⁵ Gyekɔbo abo zo amra ne mɔ kɔsɔɔti le abulasuu; ɛnee Dwosefi yemɔ ɔwɔ Yigyibiti dɛbadɛba.

⁶ Mekɛ ne hɔle bie la Dwosefi, ɔ mediema mrenya ne mɔ nee awolɛndoazo zɔhane anu amra kɔsɔɔti wule.

⁷ Noko Yizilayɛ abo zo amra ne dale, yɛle mɔnwo mɔnwo, bɛnyinle anwosesebɛ nu na bɛvale Yigyibiti maanle ne anu amuala.

⁸ Na belemgbunli fofolɛ mɔɔ ɛnze Dwosefi la ralile Yigyibiti ebia ne.

⁹ Ɔhanle ɔhilele ye menli ne kɛ, “Bɛnlea, Yizilayɛma ɛzo somaa yɛɛ bɛ nwo yɛ se.

¹⁰ Bɛmaa yɛbɔ bɛ nye anrɛɛ bɛkɛzo bɛkɛbo zolɛ. Saa yɛanyɛ ye zɔhane na yɛ nee awie mɔ nyia konle a bɛkɛboa yɛ kpɔvolɛma ne bɛkɛho bɛkɛtia yɛ na bɛanyia adenle bɛanriandi bɛavi maanle ye anu.”

¹¹ Yemɔti bɛyele menli mɔɔ nea gyima zo la bɛmanle bɛ, bɛhyele Yizilayɛma mialera nu bɛmanle bɛyɛle gyima mɔɔ bo bɛ nwo zo la. Bɛmanle bɛkyekyele azuamgbole Paetɔm nee Releeyamesizi bɛmanle belemgbunli ne vale yɛle ye ninyɛnezielɛ ɛleka.

¹² Noko mekɛ mɔɔ bɛlɛkile Yizilayɛma abodelɛ la ɛnee bɔ zo mɔɔ bɛlɛso kpalɛ na bɛlɛtende bɛahɔ moa bɛahɔva azɛlɛ ne dɔɔnwo a. Yemɔti Yigyibitima zulole Yizilayɛma kpole kpalɛ.

^13-14 Yemɔti bɛyɛle Yizilayɛma kpoyokpoyo bɛmanle bɛyɛle anwunvɔne. Bɛmanle bɛguale belekese, bɛsisile azua na bɛyɛle gyima wɔ Yigyibitima egyinli ne mɔ anu.

¹⁵ Akee Yigyibiti belemgbunli ne hanle hilele Hibulu mraalɛ nwiɔ ne mɔɔ die awolɛ la, Hyɛfela nee Pua kɛ,

¹⁶ “Saa bɛlɛdie Hibulu raalɛ biala awolɛ na bɛnwu kɛ adɔma ne le nrenya a, bɛhu ye, na saa ɔle raalɛ a, bɛmmaku ye.”

¹⁷ Noko awolɛdievolɛma ne mɔ le menli mɔɔ sulo Nyamenle a, yemɔti bɛanyɛ mɔɔ Yigyibiti belemgbunli ne hanle hilele bɛ la, bɛangu ngakula mrenya ne mɔ.

¹⁸ Yemɔti Yigyibiti belemgbunli ne vɛlɛle awolɛdievolɛma ne mɔ na ɔbizale bɛ kɛ, “Duzu ati a bɛyɛ ɛhye, na bɛammaa mralɛ mrenya ne mɔ anga nzule nu a?”

¹⁹ Awolɛdievolɛma ne mɔ hanle hilele belemgbunli ne kɛ, “Ɔboalekɛ Hibulu mraalɛ ɛnle kɛ Yigyibiti mraalɛ la; bɛkola bɛ nwo sɔ; toonwo mɔ awolɛdievolɛma ne kadwu ɛkɛ la ɛnee bɛwo dɛbadɛba.”

^20-21 Yemɔti Nyamenle yɛle awolɛdievolɛma ne mɔ boɛ. Kɛmɔ bɛsulo Nyamenle la ati, ɔmanle bɛdabɛ bɛbɔle ɛdane. Na akee Yizilayɛma yɛle mɔnwo mɔnwo na bɛ nwo yɛle se.

²² Na akee belemgbunli ne yɛle ye mɛla manle maanlema kɛ, “Ralɛ nrenya biala mɔɔ Hibulunli biala kɛwo ye la, bɛvuandi ye bɛdo Azule Naele ne anu, na saa raalɛ a, bɛmmato ye nu.”