Ɛseta Buluku ne 9 - BAEBOLO ANZƐƐ BULUKU NWUANZANWUANZA

Dwuuma sɛkye bɛ kpɔvolɛma

¹ Siane bulu nee nwiɔ ne mɔɔ bɛfɛlɛ ye “Eda” la, ye kenle bulu nee nsa ne azo yɛɛ belemgbunli ne mɛla ne nee ye ngɛlata ne mɔ anu edwɛkɛ ne mekɛ dwule a, na mɔɔ ɔwɔ kɛ si la si. Kenle ko ne yɛɛ bɛhyehyɛ kɛ ɔwɔ kɛ bɛdabɛ mɔɔ bɛngulo Dwuuma edwɛkɛ la dwazo bɛ nwo zo na bɛku bɛ a. Noko ɛhye anyɛ zɔhane. Ɔyɛle kenle mɔɔ Dwuuma lile bɛ kpɔvolɛma anwo zo konim a.

² Dwuuma mɔɔ wɔ azuamgbole mɔɔ wɔ maanle mɔɔ Belemgbunli Zɛzɛse sie bɛ la azo la boɔboale bɛ nloa na bɛhonle bɛliele bɛ nwo bɛvile awie biala mɔɔ rale bɛ nwo zo kɛ ɔbahu bɛ la asa anu. Na awie biala angola bɛ nyunlu gyinla, ɔluakɛ ɛnee bɛ nwo ɛzulolɛ ɛyɛ debie ɛdɔ menli ne kɔsɔɔti anwo zo.

³ Arane mbɔlɔba mgbanyinli, amɛnladoma, maanzinli zo neavolɛma, yɛɛ arane mbɔlɔba kɔsɔɔti lile boale Dwuuma, ɔluakɛ ɛnee bɛsulo Mɔdekae kpole kpalɛ.

⁴ Ɔboalekɛ ɛnee Mɔdekae ɛyɛ sonlakpole kpalɛ wɔ belemgbunli sua nu ɛkɛ ne na ye tumi ne nganeɛ ɛdende ɛhɔ maanle maanle ne mɔ amuala anu mɔɔ awie biala ze a, yɛɛ eza anwuma ala a ye tumi ne kɔ a.

⁵ Na Dwuuma hunle bɛ kpɔvolɛma bɛzɛkyele bɛ na bɛyɛle bɛ kɛmɔ bɛdabɛ bɛkulo la.

⁶ Wɔ suakpole Susa azo angome, Dwuuma hunle menli ɛya nnu na bɛbɔle bɛ bo zo.

^7-10 Hamɛdeeta ara Heeman mɔɔ kpɔ Dwuuma kɛ debie la amra bulu ne boka bɛdabɛ mɔɔ bɛhunle bɛ la. Bɛmɛ a le Paahyandeeta, Dalefɔn, yɛɛ Asepata; Pɔlata, Adeelea nee Aledeeta; akee Paamahyeta, Alesae, Aledae, yɛɛ Vaezata. Dwuuma hunle menli zɛhae bɔbɔ ɛdeɛ, noko bɛanva bɛ sa bɛanga awie biala debie.

¹¹ Kenle ko ne ala bɛhanle menli mɔɔ bɛhu bɛ wɔ suakpole Susa angome azo la bɛhilele belemgbunli ne.

¹² Na belemgbunli ne zele Belemgbunli Raalɛ Ɛseta kɛ, “Wɔ Susa sua bɔdenle ye azo angome, Dwuuma ɛhu menli ɛya nnu. Heeman amra mrenya bulu ne boka nwolɛ. Na menea a maanzinli ne mɔ anu ɛdeɛ ne kɛyɛ ɛzulolɛ. Kɛkala duzu yɛɛ akee ɛkpondɛ a? Mɔɔ ɛkpondɛ la, ɛ sa baha ye. Duzu bieko a ɛkpondɛ a? Ka, na mebayɛ meamaa wɔ.”

¹³ Na Ɛseta buale kɛ, “Nana, mesɛlɛ wɔ, anrɛɛ mese ɛmaa Dwuuma mɔɔ wɔ Susa ɛke la adenle ɛmaa ɛhyema bɛyɛ mɔɔ ɛnɛ kenle ye bɛyɛ la bieko, na maa bɛva nyɛma bɛsosɔ Heeman amra bulu ne akɔme bɛhendɛhenda bɛ.”

¹⁴ Zɔhane ati belemgbunli ne manle adenle manle bɛyɛle ɛhye, na bɛlile mɛla wɔ Susa, bɛmanle bɛhendɛhendanle Heeman amra bulu ne.

¹⁵ Dwuuma mɔɔ wɔ Susa la boale bɛ nloa bieko wɔ siane “Eda” ne ye kenle bulu nee nna ne azo na bɛhunle menli ɛya nsa bieko, noko bɛanva bɛ sa bɛanga awie biala debie.

¹⁶ Dwuuma mɔɔ wɔ belemgbunli ne maanzinli ne mɔ anu la bɛdabɛ bɛlile ahua na bɛhonle bɛliele bɛ nwo bɛvile bɛ kpɔvolɛma asa anu. Bɛhunle menli mɔɔ kpɔ bɛ la anu apenle ngoko abulasuu nee nnu, noko bɛanva bɛ sa bɛanga awie biala debie.

¹⁷ Bɛyɛle ɛhye mɔ wɔ siane “Eda” ne ye kenle bulu nee nsa ne azo. Bɛliele bɛ ɛnwomenle wɔ kenle bulu nee nna ne azo, bɛliele bɛ nye na bɛlile fɛlɛko, bɛdole nwolɛ ɛkponle.

¹⁸ Na Dwuuma mɔɔ wɔ Susa la lile ahua na bɛhonle kenle bulu nee nsa ne nee kenle bulu nee nna ne azo na bɛliele bɛ ɛnwomenle wɔ kenle bulu nee nnu ne azo, bɛlile fɛlɛko na bɛdole ɛkponle bɛlieliele bɛ nye.

¹⁹ Ɛhye ati yɛɛ Dwuuma mɔɔ wɔ namunamu ne mɔ nee azua ngyikyi zo la die bɛ ɛnwomenle wɔ siane “Eda” ne ye kenle bulu nee nna ne azo la. Ɔdwu zolɛ a, bɛ nye die, bɛdi fɛlɛko na bɛto ɛkponle, bɛfa aleɛ ahyɛlɛdeɛ bɛmemaa bɛ nwo ngoko ngoko.

Pulem ɛvoyia ne

²⁰ Mɔdekae hɛlɛle ninyɛne ɛhye mɔ mɔɔ sisile la amuala wɔ ngɛlata zo na ɔvale ɔhɔmanle Dwuuma mɔɔ wɔ Belemgbunli Zɛzɛse maanle maanle ne mɔ anu la amuala.

²¹ Wɔ ye ngɛlata ne mɔ anu, ɔzele Dwuuma kɛ bɛzie ɛvolɛ biala siane “Eda” ne ye kenle bulu nee nna nee ye kenle bulu nee nnu ne

²² kɛ bɛle kenle mɔɔ bɛvale bɛnyianle bɛ ti bɛvile bɛ kpɔvolɛma asa anu a. Siane zɔhane anu yɛɛ bɛ nyane nee bɛ arɛlebɔlɛ hakyile fɛlɛkolilɛ nee anyelielɛ a. Bɛ nwo dɔle bɛ na bɛliele bɛ ɛnwomenle. Ɔwɔ kɛ bɛdie bɛ nye na bɛto ɛkponle wɔ mekɛ ɛhye anu, na bɛfa ninyɛne bɛkyɛ bɛ nwo ngoko ngoko, na bɛfa ahyɛlɛdeɛ bɛmaa ehyianvolɛma.

²³ Zɔhane ati Dwuuma lile Mɔdekae ngyehyɛlɛ ne azo, na bɛhɔle zolɛ bɛyɛle kenle ne ɛvoyia mɔɔ ɛvolɛ biala bɛdi a.

²⁴ Agagenli Heeman, mɔɔ le Hamɛdeeta ara nrenya ne mɔɔ kpɔ Dwuuma kɛ debie la, vale Dwuuma amuala anwo adwenle kɛ ɔbɔ bɛ bo zo. Ɔlua zolɛ ɔhwenle nwolɛ adunyi, mɔɔ Hibulu nu bɛfɛlɛ ye “Pulu” la, kɛ ɔkpondɛ kenle mɔɔ ɔkɛva ɔkɛli zɔhane gyima ne la.

²⁵ Na Ɛseta hɔle belemgbunli ne anyunlu, na belemgbunli ne manle bɛhɛlɛle ngɛlata na ɔmanle adwenle ɛtane ne mɔɔ Heeman vale la hakyile dɔle ɔ nwo zo. Ɔlua zolɛ bɛzinzele ye nee ɔ mra mrenya bulu ne amuala bɛhunle bɛ.

²⁶ Ɛhye ati a bɛfɛlɛ zɛhae ɛnwomenlelielɛ kenle ye “Pulem” a, ɔlua adunyi anzɛɛ “Pulu” ne mɔɔ bɛhwenle la ati. Zɔhane ala yɛɛ ɔlua mɔɔ Mɔdekae hɛlɛle, nee mɔɔ sisile bɛ nwo zo, nee mɔɔ bɛnwunle ye la ati,

²⁷ Dwuuma ziele kenle ɛhye mɔ na bɛzɔle nu kɛ bɛdabɛ, bɛ nlɔnra, yɛɛ awie biala mɔɔ bokale bɛ la, kɛli ɛvoyia ɛhye ɛvolɛ biala mɔɔ ɔmkpa nwolɛ fee a, kɛmɔ bɛhɛlɛ bɛdo ɛkɛ ne la.

²⁸ Bɛbali ɛvoyia ɛhye ɛvolɛ biala wɔ awuke awuke nu, maanle biala anu, yɛɛ suakpole biala azo awolɛndoazo muala anu. Ɔnle kɛ Dwuunli biala sɛkye ɛvoyia ne mɔɔ bɛfɛlɛ ye “Pulem” la, yɛɛ ɔnle kɛ bɛgyakyi ɛvoyia zɛhae ɛlilɛ wɔ bɛ abusuandoazo biala mekɛ zo ɛlɛ.

²⁹ Akee Belemgbunli Raalɛ Ɛseta mɔɔ le Abeheli ara raalɛ ne nee Dwuunli Mɔdekae hɛlɛle kɛlata hɔzile amozi kɛlata ne mɔɔ fane ɛvoyia “Pulem” ne anwo la pi.

³⁰ Bɛvale ngɛlata bɛhɔmanle Dwuuma amuala mɔɔ wɔ maanle maanle ɛya ko abulanwiɔ nee nsuu ne mɔɔ Belemgbunli Zɛzɛse sie bɛ la amuala anu, bɛhanle nɔhalɛ nee anzonudwolɛ edwɛkɛ

³¹ kɛ ɛvoyia ɛhye mɔɔ bɛfɛlɛ ye “Pulem” la dwu zolɛ a, bɛli, kɛmɔ Dwuunli Mɔdekae nee Belemgbunli Raalɛ Ɛseta ɛhyehyɛ ɛmaa Dwuuma kɔsɔɔti la. Bɛhyehyɛle ɛhye bɛmanle bɛdabɛ bɛ nwo nee bɛ mra nee bɛ bo zo amra amuala, kɛ bɛli zolɛ kɛmɔ bɛlile nyanelilɛ nee ɛhɔnehyelɛ ngyehyɛlɛ ne azo la.

³² Belemgbunli Raalɛ Ɛseta a hyehyɛle zɛhae “Pulem” ɛvoyia ne a, yɛɛ bɛhɛlɛle bɛdole ɛkɛ a.