Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5 - BAEBOLO ANZƐƐ BULUKU NWUANZANWUANZA

Wienyi nu ɛdɛnlanlɛ

¹ Bɛle Nyamenle amra mɔɔ ɔkulo bɛ a, yemɔti bɛbɔ mɔdenle kɛ bɛkɛyɛ kɛ ɔdaye ala la.

² Bɛmaa ɛhulolɛ ɛvinde bɛ ɛbɛlabɔlɛ nu, kɛmɔ Kelaese hulole yɛ na ɔdole ye ngoane aze ɔmanle yɛ ɔvale ɔyɛle azubɔlɛ evuanlɛ mɔɔ sɔ Nyamenle anye la.

³ Bɛle Nyamenle menli, zɔhane ati bɛye adwɔmanebɔlɛ anzɛɛ nyɛleɛ ɛtane ɛtane anzɛɛ anyebolo wɔ bɛ nu bɔkɔɔ.

⁴ Bɛmmaka anyiemgba edwɛkɛ biala, bɛmmatendɛ ɛdendɛlɛ ɛtane yɛɛ bɛmmabɔ ngoayɛ mgbane mgbane. Mɔɔ ɔwɔ kɛ bɛyɛ la a le kɛ bɛkɛyɛ Nyamenle mo.

⁵ Bɛde ɛhye abo kpalɛ, awie biala mɔɔ bɔ adwɔmane anzɛɛ ye ɛbɛla nwo ɛnde anzɛɛ ɔle anyebolo (anyebolo le awozonlezonlenlɛ) la ɛnrɛnyia agyadeɛ wɔ Kelaese nee Nyamenle Belemgbunlililɛ ne anu.

⁶ Bɛmmamaa awie fa adubɛnloanu bɛlɛbɛla bɛ; ɔboalekɛ ɔlua ninyɛne zɛhae mɔ ati yɛɛ Nyamenle ɛya ne ba menli mɔɔ ɛndie ye edwɛkɛ la anwo zo a.

⁷ Yemɔti bɛ nee menli zɔhane mɔ mmatu wɔ adenle biala anu.

⁸ Dɛba ne ɛnee bɛwɔ awozinli nu, na ɛnɛ bɛyɛ Awulae menli; ɛhye ati bɛwɔ wienyi nu. Ɔwɔ kɛ bɛbɔ bɛ ɛbɛla kɛ menli mɔɔ wɔ wienyi nu la.

⁹ Ɔluakɛ wienyi nu yɛɛ kpalɛyɛlɛ, pɛlepɛlelilɛ nee nɔhalɛlilɛ dɔɔnwo vi ba a.

¹⁰ Bɛbɔ mɔdenle bɛzukoa mɔɔ bɛyɛ a ɔsɔ Awulae anye la.

¹¹ Bɛmmayɛ awozinli nu nyɛleɛ mgbane mgbane ne mɔ mɔɔ menli yɛ na nvasoɛ ɛnle zolɛ la bie. Bɛnwu bie a anrɛɛ bɛha bɛdo gua.

¹² Ɔyɛ nyiane kpole bɔbɔ kɛ bɛkɛha bɛ ninyɛndane mɔɔ bɛyɛ ye fealera nu la anwo edwɛkɛ a.

¹³ Na saa ninyɛne muala finde wienyi nu a, ɛnee bɛ nɔhalɛ ɛsaso ne ɛla ɛkɛ ne wienyi;

¹⁴ ɔluakɛ debie biala mɔɔ kɛla ali la, ɛnee yeyɛ wienyi. Yemɔti a bɛha ye kɛ, “Wɔmɔ mɔɔ wɔlafe a, tunwue na ɛvi mɔwuamra anu dwazo! Na Kelaese wienyi ne kɛda ɛ nwo.”

¹⁵ Zɔhane ati bɛnlea bɛ nwo boɛ wɔ bɛ ɛbɛlabɔlɛ nu. Bɛmmayɛ bɛ nwo kɛ menli mɔɔ ɛnze debie la; bɛbɔ bɛ ɛbɛla kɛ bɛle nrɛlɛbɛvolɛma.

¹⁶ Bɛbɔ ɛbɛla kpalɛ wɔ adenle biala anu, ɔboalekɛ mekɛ ye mɔɔ yɛwɔ nu la le ɛtanelilɛ mekɛ.

¹⁷ Zɔhane ati, bɛmmayɛ bɛ nwo ahɔnwɔne, na bɛbɔ mɔdenle kɛ bɛkɛnwu mɔɔ Awulae kpondɛ kɛ bɛyɛ la.

¹⁸ Bɛgyakyi nza ɛbolɛ na ɔsɛkye bɛ; bɛmaa Sunsum ne ɛyi bɛ tɛkɛɛ.

¹⁹ Bɛva ayɛlɛyelɛ edwɛne, anyelielɛ edwɛne nee sunsum nu edwɛne bɛli bɛ nwo adwelie; na bɛdo ayɛlɛyelɛ edwɛne wɔ bɛ ahonle nu bɛmaa Awulae.

²⁰ Bɛlua yɛ Awulae Gyisɛse Kelaese duma nu bɛyɛ Nyamenle Selɛ ne mo dahuu wɔ debie biala anu.

Yelɛma nee kunlima

²¹ Kɛmɔ bɛdi Kelaese eni la, bɛha bɛ nwo aze bɛmaa bɛ nwo ngoko ngoko.

²² Yelɛma, bɛha bɛ nwo aze bɛmaa bɛ hu mɔ, kɛmɔ bɛyɛ bɛmaa Awulae la.

²³ Ɔluakɛ kunli ne a lɛ tumi wɔ ɔ ye anwo zo a, kɛmɔ Kelaese lɛ Asɔne ne azo tumi la; asɔne ne a le Kelaese sonlabaka ne yɛɛ Kelaese a le asɔne ne Ngoanedievolɛ a.

²⁴ Zɔhane ati yelɛma ɛha bɛ nwo aze bɔkɔɔ ɛmaa bɛ hu mɔ, kɛmɔ asɔne ne yɛ maa Kelaese la.

²⁵ Kunlima, bɛhulo bɛ ye mɔ kɛmɔ Kelaese hulole Asɔne ne na ɔdole ye ngoane aze wɔ ɔ ti la.

²⁶ Ɔyɛle ɛhye na ɔvale ɔ nloa edwɛkɛ nee nzule ɔnrinzinle nwolɛ bɔkɔɔ na ɔdele nwolɛ;

²⁷ amaa yeava asɔne ne kɛnlɛma gyɛlɛɛnye yeamaa ɔ nwo, mɔɔ nwolɛ ɛtɛkpɔdele, evinli biala ɛnle nwolɛ, yɛɛ nvonleɛ biala ɛnle nwolɛ na nwolɛ te nwuanzaanwu a.

²⁸ Zɔhane ala yɛɛ ɔwɔ kɛ kunlima kulo bɛ ye mɔ kɛ bɛ nwo la. Nrenya mɔɔ kulo ɔ ye la kulo ɔdaye mumua ne ɔ nwo.

²⁹ Awie ɛnrɛkpɔ ɔdaye ɔ nwo ɛlɛ; mɔɔ ɔyɛ la a le kɛ ɔdi ɔ nwo adane na ɔnea ye sonlabaka ne boɛ, kɛmɔ Kelaese noko yɛ Asɔne ne la,

³⁰ ɔluakɛ yɛle ye sonlabaka ne nvɛyeba ne mɔ bie.

³¹ Nyamenle Edwɛkɛ ne se, “Ɛhye ati nrenya bagyakyi ɔ ze nee ɔ nli na yeava ɔ nwo yeabeta ɔ ye anwo, na bɛ mu nwiɔ bɛayɛ menli nwiɔ mɔɔ le nwonane ko a.”

³² Nɔhalɛ kpole bie mɔɔ vea la wɔ Nyamenle Edwɛkɛ ɛhye anu, na mete ɔ bo kɛ ɔfane Kelaese nee asɔne ne anwo.

³³ Noko ɔwɔ kɛ kunli biala kulo ɔ ye kɛ ɔdaye ɔ nwo, na yelɛ biala noko di ɔ hu eni.