Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 1 - BAEBOLO ANZƐƐ BULUKU NWUANZANWUANZA

¹ Pɔɔlo mɔɔ ɔlua Nyamenle ɛhulolɛ zo yeyɛ Kelaese Gyisɛse ɛzoanvolɛ la yɛɛ ɛlɛkɛlɛ kɛlata ɛhye a. Ɔlɛ ɔkamaa Nyamenle menli ne mɔɔ wɔ Ɛfɛsɛse mɔɔ Kelaese Gyisɛse ati bɛdi nɔhalɛ wɔ bɛ ɛbɛlabɔlɛ nu la.

² Yɛ Ze Nyamenle nee Awulae Gyisɛse Kelaese ɛlo bɛ na ɔmaa bɛ anzonudwolɛ.

Sunsum nu nyilalɛ mɔɔ Kelaese ati sonla nyia ye la

³ Yɛyɛ Nyamenle mɔɔ le yɛ Awulae Gyisɛse Kelaese ɔ Ze ne mo. Ɔluakɛ yelua yɛ koyɛlɛ ne mɔɔ yɛ nee Kelaese ɛyɛ la azo yeyila yɛ na yeva anwuma Sunsum nu ahyɛlɛdeɛ muala yemaa yɛ.

⁴ Nyamenle kpale nu yele yɛ ziele ɛkɛ manle Kelaese kolaa na yeabɔ ewiade, amaa yɛ nwo ade nwuanzaanwu mɔɔ fɔlɛlilɛ biala ɛnle yɛ nu wɔ ɔ nyunlu a. Ɔlua ye ɛhulolɛ ne ati

⁵ Nyamenle bɔle kpɔkɛ dɛba kɛ, ɔlua Gyisɛse Kelaese anwo zo, ɔbamaa yɛayɛ ɔ mra, kɛmɔ ye ɛhulolɛdeɛ ne mɔɔ gyi ɔ nyunlu la de la.

⁶ Bɛmaa yɛye Nyamenle ayɛlɛ wɔ ye nwanwane ɛlolɛ kpole nee ye ahyɛlɛdeɛ ne mɔɔ yelua ɔ Ra ne mɔɔ ɔkulo ye la anwo zo yeva yemaa yɛ la ati.

⁷ Ɔluakɛ Kelaese ewule ne ati bɛva yɛ ɛtane ne mɔ bɛhyɛ yɛ na yɛnyia yɛ ti. Nyamenle ɛlolɛ ne

⁸ mɔɔ ɔvale ɔmanle yɛ la le kpole mɔɔ bɛngola bɛnzuzu a! Ɔlua nrɛlɛbɛ nee adwenlenunwunlɛ zo

⁹ Nyamenle yɛle mɔɔ yehyehyɛ la, na yelua Kelaese anwo zo yemaa yɛnwu ye ngyehyɛlɛ ne mɔɔ yedwenle nwolɛ dɛba yedo ɛkɛ ne na ɔvea la.

¹⁰ Ngyehyɛlɛ ɛhye, mɔɔ ye mekɛ dwu a Nyamenle bamaa yeali munli la a le kɛ, ɔkuohua abɔdeɛ muala mɔɔ wɔ anwuma nee aze la anloa, na yeava Kelaese yeazie bɛ ti.

¹¹ Debie biala mɔɔ Nyamenle yɛ la gyi ɔdaye ye ngyehyɛlɛ nee ye kpɔkɛ mɔɔ yebɔ la azo, na kɛmɔ mɔlebɛbo ne ɔdaye ɔhyehyɛle la, yelua yɛ nee Kelaese yɛ koyɛlɛ ne azo yekpa nu yeye yɛ kɛ yɛle ye ɛdeɛ.

¹² Yemɔti bɛmaa yɛdayɛ mɔɔ yɛlumuale yɛnyianle anyelazo wɔ Kelaese anu la yɛye Nyamenle anyunlunyia ne ayɛlɛ.

¹³ Bɛdabɛ noko, kɛmɔ bɛdele nɔhalɛ edwɛkɛ ne, mɔɔ le Edwɛkpa ne mɔɔ vale ngoanelielɛ rɛlɛle bɛ, na bɛliele Kelaese bɛlile la ati, Nyamenle vale ye Sunsum Nwuanzanwuanza ne, mɔɔ ɔvale ɔbɔle ɛwɔkɛ la ɔmanle bɛ, ɔvale ɔyɛle bɛ nzonlɛ kɛ bɛle ye menli.

¹⁴ Sunsum ne di agyinlanu kɛ yɛbanyia mɔɔ Nyamenle ɛva ɛbɔ ye menli ɛwɔkɛ la; eza ɔmaa yɛsi pi kɛ Nyamenle bamaa menli mɔɔ le ye ɛdeɛ la anyia bɛ ti bɔkɔɔ. Bɛmaa yɛye ye anyunlunyia ne ayɛlɛ!

Pɔɔlo nzɛlɛlɛ

¹⁵ Zɔhane ati sumunli kɛ mendele bɛ nganeɛ kɛ bɛlie Awulae Gyisɛse bɛli, nee bɛ ɛhulolɛ mɔɔ bɛlɛ ye wɔ Nyamenle menli muala anwo la,

¹⁶ dahuu meyɛ Nyamenle mo wɔ bɛ ti. Mekakye bɛ wɔ me nzɛlɛlɛ nu,

¹⁷ na mesɛlɛ yɛ Awulae Gyisɛse Kelaese Nyamenle ne mɔɔ le anyunlunyia Selɛ ne kɛ ɔmaa bɛ Sunsum nu nrɛlɛbɛ nee ndelebɛbo mɔɔ kɛmaa bɛkɛnwu ɔdaye Nyamenle kpalɛ la.

¹⁸ Mesɛlɛ kɛ bɛ adwenle nu kɛbuke, amaa bɛanwu anyelazo ne mɔɔ yevɛlɛ bɛ wɔ nu, ye nwanwane nyilalɛ ne mɔ mɔɔ ɔfa ɔbɔ ye menli ɛwɔkɛ la anu anwonyia ne

¹⁹ nee kɛ ye tumi ne kpole si de la. Tumi ɛhye mɔɔ ɛlɛdi gyima wɔ yɛmɛ mɔɔ yɛdie ye yɛdi la anu la, yemɔ ala a le anwosesebɛ bedevinli ne

²⁰ mɔɔ Nyamenle vale dwazole Kelaese vile ewule nu, na ɔvale ye ɔdɛnlanle ɔ sa fema zo wɔ anwuma la.

²¹ Ɛkɛ ne yɛɛ Kelaese di belemgbunli wɔ arelemgbunli, tumivolɛma, mgbolema nee awulae mɔ anwo zo a. Ɔbo duma biala mɔɔ wɔ ewiade ɛhye nee ewiade fofolɛ ne mɔɔ bara la azo.

²² Nyamenle ɛva ninyɛne kɔsɔɔti ɛwula Kelaese agyakɛ abo, na yeva Kelaese yemaa asɔne ne kɛ ye Awulae mɔɔ bo ninyɛne kɔsɔɔti azo.

²³ Asɔne ne a le Kelaese sonlabaka ne yɛɛ Kelaese a maa asɔne ne di munli kɛ ɔdaye Kelaese la a; ɔdaye ala a eza ɔmaa debie biala mɔɔ wɔ aleɛabo la di munli a.