Dw 19 - BAEBOLO ANZƐƐ BULUKU NWUANZANWUANZA

¹ Paelɛte manle bɛbilale Gyisɛse empele.

² Sogyama ne vale evileni nwonle abɔtile na bɛvale bɛkpolole Gyisɛse ati; bɛwulale ye tɛladeɛ kɔkɔlɛ bie mɔɔ arelemgbunli ala a wula la

³ na bɛrahotole ye bɛgolole ɔ nwo bɛzele kɛ, “Dwuuma Belemgbunli, nyi kyɛ!” Bɛka ye zɛhae a ɛnee bɛhɔ ɔ nwo ɛkɛ ne bɛhɔbɔ ɔ nzo nu.

⁴ Paelɛte eza ziale doale Dwuuma ne wɔ gua ne azo lɔ na ɔzele bɛ kɛ, “Bɛdie, me nee ye ba ɛke meamaa bɛanwu kɛ mennwu nvonleɛ biala wɔ ɔ nwo mɔɔ medua zolɛ mebu ye ewule fɔlɛ a.”

⁵ Yemɔti ɔmanle bɛvale Gyisɛse bɛvindele, ɔbɔ ye evileni abɔtile ne na ɔwula ye arelemgbunli tɛladeɛ kɔkɔlɛ ne. Paelɛte zele kɛ, “Bɛnlea! Sonla ne ɛne!”

⁶ Sɛlɛvolɛ mgbanyinli ne nee sinzavolɛma ne mɔ nwunle ye la bɛdeɛdeanle nu kɛ, “Bɔ ye meanubaka nu! Bɔ ye meanubaka nu!” Paelɛte zele bɛ kɛ, “Ɛnee bɛdabɛ bɛrava ye bɛhɔbɔ ye meanubaka nu. Mennwu debie mɔɔ yemɔti ɔwɔ kɛ mebu ye ewule fɔlɛ a!”

⁷ Dwuuma ne buale ye kɛ, “Yɛlɛ mɛla, na mɛla ne kile kɛ ɔwɔ kɛ ɔwu, ɔboalekɛ ɔyɛ ɔ nwo kɛ ɔle Nyamenle Ara.”

⁸ Paelɛte dele ɛhye la, ɛzulolɛ kpole hanle ye.

⁹ Ɔwolole ɔhɔle ye suakunlu ɛkɛ ne na ɔbizale Gyisɛse kɛ, “Ɛvi nienwu?” Na Gyisɛse andɛ ɔ nloa anu.

¹⁰ Paelɛte zele ye kɛ, “Ɛnrɛdɛne me zo? Kakye kɛ melɛ tumi mekola megyakyi wɔ anzɛɛ memaa bɛbɔ wɔ meanubaka nu bɛku wɔ.”

¹¹ Gyisɛse buale ye kɛ, “Ɛlɛ me nwo zo tumi, ɔluakɛ Nyamenle yɛɛ ɛva ɛmaa wɔ a. Yemɔti sonla ne mɔɔ vale me rawulale ɛ sa nu la a di ɛzonle kpole kpalɛ a.”

¹² Paelɛte dele ɛhye la, akee ɔbɔle nwolɛ mɔdenle biala kɛ ɔkpondɛ adenle yealua zolɛ yeagyakyi Gyisɛse. Na Dwuuma ne hanle ye anyebolo zo kɛ, “Saa ɛgyakyi ye a ɛnee ɛnle Wulomu Maanle Maanle Belemgbunli ne agɔnwo! Awie biala mɔɔ ɔdaye ɔfɛlɛ ɔ nwo belemgbunli la le Wulomu Maanle Maanle Belemgbunli ne kpɔvolɛ!”

¹³ Paelɛte dele edwɛkɛ ɛhye la, ɔvale Gyisɛse ɔvindele na ɔradɛnlanle ndɛnebualɛ ebia ne anu wɔ ɛleka bie mɔɔ bɛfɛlɛ ye Hibulu aneɛ nu Gabata la. (Gabata abo a le “Bolɛ Bama”)

¹⁴ Ɛnee akee asɛɛ yedwu sɛnzɛngyinla, wɔ Akpabɛnwo Ɛvoyia kenle ne anu. Paelɛte hanle hilele bɛ kɛ, “Bɛ Belemgbunli ne ɛne!”

¹⁵ Dwuuma ne hanle ye kpole kpalɛ kɛ, “Ku ye! Ku ye! Bɔ ye meanubaka nu!” Paelɛte bizale bɛ kɛ, “Bɛkpondɛ kɛ mebɔ bɛ belemgbunli ne meanubaka nu ɔ?” Sɛlɛvolɛ mgbanyinli ne mɔ buale ye kɛ, “Yɛ belemgbunli ala a le Siza!”

¹⁶ Na Paelɛte yele Gyisɛse manle bɛ kɛ bɛhɔbɔ ye meanubaka nu. Bɛvale Gyisɛse bɛhɔle.

Bɛbɔ Gyisɛse meanubaka nu

¹⁷ Bɛmanle ɔzoale ye meanubaka ne na ɔrale ɛleka bie mɔɔ bɛfɛlɛ ye wɔ Hibulu aneɛ nu “Gɔlogɔta” la. (Gɔlogɔta abo a le Etile Kanrɛlɛ Ɛleka)

¹⁸ Ɛkɛ ne yɛɛ bɛbɔle ye meanubaka nu a; bɛbɔle menli nwiɔ noko meanubaka nu wɔ ɛkɛ ne, ko wɔ Gyisɛse fema zo yɛɛ ko wɔ ye bɛne zo na Gyisɛse wɔ avinli.

¹⁹ Paelɛte hɛlɛle edwɛkɛ bɔle Gyisɛse meanubaka ne ati zo kɛ, “Nazalɛtenli Gyisɛse, Dwuuma Belemgbunli.”

²⁰ Dwuuma dɔɔnwo gengale, ɔboalekɛ ɛleka mɔɔ bɛbɔle Gyisɛse meanubaka nu la nee sua zo anwa biala. Edwɛkɛ ne, bɛhɛlɛle ye wɔ Hibulu, Laten, yɛɛ Giliki aneɛ ne mɔ anu.

²¹ Dwuuma sɛlɛvolɛ mgbanyinli ne mɔ zele Paelɛte kɛ, “Mmakɛlɛ kɛ, ‘Ɔle Dwuuma Belemgbunli’, na kɛlɛ kɛ, ‘Nrenya ɛhye se: Mele Dwuuma Belemgbunli!’ ”

²² Paelɛte buale kɛ, “Mɔɔ mehɛlɛ la a mehɛlɛ a!”

²³ Sogyama ne bɔle Gyisɛse meanubaka nu wiele la, bɛhyɛle ye adɛladeɛ ne mɔ anu nna; sogyanli ko biala ɛdeɛ ko. Akee ɔhale ye bubu ne mɔɔ bɛnwonle ye woladapi la,

²⁴ sogyama ne zele bɛ nwo kɛ, “Bɛmmamaa yɛsuosua nu; bɛmaa yɛgua nwolɛ nzeleba yɛnlea ahenle mɔɔ ɔkɛyɛ ye ɛdeɛ la.” Ɛhye zile amaa Nyamenle Edwɛkɛ ne ayɛ nɔhalɛ kɛ, “Bɛhyɛle me adɛladeɛ ne mɔ bɛvale, na me bubu ne, bɛguale nwolɛ nzeleba.” Mɔɔ sogyama ne mɔ yɛle la ɛne.

²⁵ Menli mɔɔ ɛnee gyigyi Gyisɛse meanubaka ne anwo la a le Gyisɛse ɔ nli nee ɔ nli adiema Mɛle, Kulopase aye ne, yɛɛ Mɛle ne mɔɔ vi Magedala la.

²⁶ Gyisɛse nwunle kɛ ɔ nli nee ɛdoavolɛ ne mɔɔ ɔkulo ye edwɛkɛ la gyi ɛkɛ ne la ɔhanle ɔhilele ɔ nli kɛ, “Ɔmɔ, nea, ɛ ra nrenya ɛne.”

²⁷ Akee ɔzele ɛdoavolɛ ne kɛ, “Ayi, ɛ nli ɛne.” Ɔvi mekɛ zɔhane, ɛdoavolɛ ne vale Gyisɛse ɔ li na ɔ nee ye hɔdɛnlanle.

Gyisɛse ewule

²⁸ Gyisɛse nwunle kɛ akee debie biala ɛli munli ɛwie. Yemɔti amaa Nyamenle Edwɛkɛ ne ayɛ nɔhalɛ la, ɔhanle kɛ, “Nzuhɔne ɛlɛku me.”

²⁹ Buakɛ bie mɔɔ nwanye bisii bie wɔ nu la gyi ɛkɛ: bɛvale emiane bɛbɔle nu, bɛvale bɛzianle nyinlanyinla baka ti, na bɛmanle ye zo bɛkpulale Gyisɛse anloa.

³⁰ Gyisɛse liele nwanye ne na ɔhanle kɛ, “Yewie!” Akee ɔbɔle ɔ ti aze na ɔwule.

Bɛwɔ Gyisɛse anvenle atwɛ

³¹ Akee Dwuu mgbanyima ne zɛlɛle Paelɛte kɛ ɔmaa bɛ adenle ɔmaa bɛhɔbubu menli mɔɔ bɛbɔ bɛ meanubaka nu la agyakɛ bɛmaa bɛwu ndɛndɛ na bɛdwula bɛ aze bɛvi meanubaka ne mɔ azo. Bɛzɛlɛle ɛhye, ɔluakɛ ɛnee kenle ne le Yalɛ na aleɛ kye a ɔle Ɛnwomenlelielɛ Kenle. Ɛnwomenlelielɛ Kenle ɛhye le kenle nwuanzanwuanza kpalɛ kpalɛ maa bɛ la ati, bɛangulo kɛ avunli ne mɔ kɛhendɛhenda meanubaka ne mɔ azo zɔhane kenle ne.

³² Zɔhane ati sogyama ne hɔle na bɛhɔbubule sonla ne mɔɔ lumua nee ko ne mɔɔ tɔ zolɛ nsa la agyakɛ.

³³ Bɛdwule Gyisɛse anwo ɛkɛ ne la, bɛnwunle kɛ yewu dɛbadɛba; yemɔti bɛambubu ɔ gyakɛ.

³⁴ Na sogyama ne mɔ anu ko wɔle Gyisɛse anvenle atwɛ, na ɛkɛ ne ala mogyanzule hwinle guale.

³⁵ (Ahenle mɔɔ nwunle kɛ ɛhye ɛzi la a ɛdendɛ la, amaa wɔalie wɔali. Mɔɔ ɔhanle la le nɔhalɛ, yɛɛ ɔze noko kɛ ɔlɛka nɔhalɛ ne.)

³⁶ Bɛyɛle ɛhye amaa Nyamenle Edwɛkɛ ne ayɛ nɔhalɛ kɛ, “Bɛambu ye bowule ko bɔbɔ.”

³⁷ Eza Nyamenle Edwɛkɛ ne ko noko se, “Menli anye banwu mɔɔ bɛwɔle ɔ nvenle atwɛ la.”

Gyisɛse ɛzielɛ

³⁸ Ɛhye anzi, Dwosefi, mɔɔ vi Arelematia la hɔzɛlɛle Paelɛte kɛ ɔva Gyisɛse funli ne ɔmaa ye. (Dwosefi le Gyisɛse ɛdoavolɛ, noko yeanye ɔ nyunlu, ɔluakɛ ɔsulo Dwuu mgbanyima ne mɔ.) Paelɛte kponlenle zolɛ manle ye, yemɔti Dwosefi hɔvale Gyisɛse funli ne.

³⁹ Nekɔdimɛse mɔɔ kenle ko nɔɔzo bie hɔnwunle Gyisɛse la nee Dwosefi a hɔle a; bɛkɔ la bɛlɛ ayile evuanlɛ mɔɔ le kɛ alufuanlɛ nee aabɛya mɔɔ kɛdo tone nu kɛyɛ kilo abulanlu la a hɔle a.

⁴⁰ Bɛdabɛ mu nwiɔ bɛvale ayile evuanlɛ ne bɛyɛle Gyisɛse anwo na bɛkyekyele ye wɔ kisane nu, ɔluakɛ kɛ Dwuuma yɛ bɛ funli la ɛne.

⁴¹ Tola bie zua ɛleka mɔɔ bɛbɔle Gyisɛse meanubaka nu la, nla fofolɛ bie mɔɔ bɛtɛtole sonla nu ɛlɛ la wɔ ɛkɛ ne.

⁴² Kɛmɔ aleɛ kye a ɔle Ɛnwomenlelielɛ Kenle, na eza nla ne bikye la ati, bɛdole Gyisɛse nu.