Dw 16 - BAEBOLO ANZƐƐ BULUKU NWUANZANWUANZA

¹ “Meha ɛhye mehile bɛ, amaa bɛangyakyi bɛ diedi ne anu.

² Bɛbaye bɛ ali bɛavi bɛ nyianu azua ne mɔ anu. Mekɛ bara mɔɔ awie biala mɔɔ kɛhu bɛ nuhua bie la badwenle kɛ ɔlɛyɛ ye Nyamenle gyima.

³ Bɛbayɛ ɛhye mɔ amuala, ɔluakɛ bɛnze Selɛ ne yɛɛ bɛnze me.

⁴ Na meha ɛhye mɔ mehile bɛ, amaa saa mekɛ ne dwu na bɛlɛfa bɛayɛ bɛ a, bɛahakye kɛ menganle mengilele bɛ. “Meanga ɛhye mɔ meangile bɛ alumua ne, ɔboalekɛ ɛnee me nee bɛ a de a.

Sunsum Nwuanzanwuanza ne gyima

⁵ Na kɛkala, melɛkɔ mɔɔ zoanle me la anwo lɔ, noko bɛ biala ɛmbiza me kɛ, ‘Ɛkɔ nienwu?’

⁶ Kɛkala mɔɔ meha ɛhye mehile bɛ la, nyane ɛyi bɛ ahonle tɛkɛɛ.

⁷ Na meka nɔhalɛ ne meahile bɛ: Ɔle kpalɛ ɔmaa bɛ kɛ melɛkɔ a, ɔboalekɛ saa meangɔ a Boavolɛ ne ɛnrɛra bɛ nwo. Na saa mekɔ a, mebazoa ye wɔ bɛ nwo.

⁸ Na ɔba a, ɔbahile yeamaa ewiade amra anwu kɛ bɛvo kpole wɔ bɛ adwenle mɔɔ bɛlɛ ye wɔ ɛtane nwo nee mɔɔ bɛlɛ ye wɔ kpalɛ nwo, nee Nyamenle ndɛnebualɛ ne anwo la anwo.

⁹ Bɛvo wɔ bɛ adwenle mɔɔ bɛlɛ ye wɔ ɛtaneyɛlɛ nwo la, ɔboalekɛ bɛnlie me bɛnli;

¹⁰ bɛvo wɔ pɛlepɛlelilɛ nwo, ɔboalekɛ melɛkɔ Selɛ ne anwo lɔ, na bɛnrɛnwu me bieko;

¹¹ yɛɛ bɛvo wɔ Nyamenle ndɛnebualɛ ne anwo, ɔboalekɛ mɔɔ sie ɛtane ewiade ɛhye la bɛbua ye ndɛne dɛbadɛba.

¹² “Melɛ edwɛkɛ dɔɔnwo meka mekile bɛ, noko kɛkala, bɛnrɛhola ɔ muala anu sɔ.

¹³ Na saa Sunsum ne mɔɔ baye nɔhalɛ ne mɔɔ fane Nyamenle anwo la ba a, ɔbamaa bɛanwu nɔhalɛ ne amuala. Ɔnrɛva ɔdaye ye tumi ɔnrɛdendɛ, na ɔbaha mɔɔ ɔkɛde, na yeaha ninyɛne mɔɔ bara la anwo edwɛkɛ yeahile bɛ.

¹⁴ Ɔbawula me anyunlunyia, ɔboalekɛ ɔbaha mɔɔ meka la yeahile bɛ.

¹⁵ Mɔɔ Egya lɛ bɛ la amuala le me ɛdeɛ; ɛhye ati yɛɛ meha kɛ Sunsum ne baha mɔɔ menwɔva menwɔmaa ye la ahile bɛ a.

Nyanelilɛ nee fɛlɛkolilɛ

¹⁶ “Ɔnrɛhyɛ biala ɛnee bɛnnwu me bieko, yɛɛ ɔnrɛhyɛ biala, bɛbanwu me.”

¹⁷ Ye ɛdoavolɛma ne bie mɔ bizebizale bɛ nwo kɛ, “Ɛnee ɛhye abo a le duzu? Ɔse, ‘Ɔnrɛhyɛ biala ɛnee bɛnnwu me bieko, yɛɛ ɔnrɛhyɛ biala bɛbanwu me’; eza ɔse, ‘ɔboalekɛ melɛkɔ Selɛ ne anwo lɔ.’

¹⁸ Ɛnee ‘Ɔnrɛhyɛ biala’ ɛhye abo a le duzu? Yɛnnwu mɔɔ ɔlɛka la anu.”

¹⁹ Gyisɛse nwunle mɔɔ bɛkpondɛ bɛabiza ye la, yemɔti ɔhanle ɔhilele bɛ kɛ, “Menganle kɛ, ‘Ɔnrɛhyɛ biala, bɛnrɛnwu me, yɛɛ eza ɔnrɛhyɛ biala, bɛbanwu me.’ Se mɔɔ bɛlɛbizebiza bɛ nwo la ɛne?

²⁰ Meka nɔhalɛ ne meahile bɛ: Bɛbazu bɛayi, na ɛtane ewiade ye bali fɛlɛko; bɛbali nyane, na bɛ nyanelilɛ ne bahakyi fɛlɛkolilɛ.

²¹ Saa raalɛ fo awolɛ zo a, ye adwenle sɛkye, ɔboalekɛ ye nyanedelɛ mekɛ ɛdwu; na saa ɔwo a, ɔ rɛle fi ye nyane ne, ɔboalekɛ ɛnee ɔlɛdi fɛlɛko kɛ yewo ralɛ yedo ewiade a.

²² Zɔhane ala yɛɛ ɔle ɔmaa bɛ a; kɛkala alɔbɔlɛ ɛha bɛ, na mebaranwu bɛ bieko na fɛlɛkolilɛ bayi bɛ ahonle nu tɛkɛɛ, fɛlɛkolilɛ mɔɔ awie biala ɛnrɛhola bɛ sa die ɛlɛ a.

²³ “Saa mekɛ zɔhane dwu a, bɛnrɛbiza me bɛnrɛlie debie biala. Meka nɔhalɛ ne meahile bɛ: Debie biala mɔɔ bɛkɛbiza Selɛ ne wɔ me duma nu la, ɔkɛva ɔkɛmaa bɛ.

²⁴ Toonwo mɔɔ yeradwu bekezɛ la, bɛtɛbizale debie biala wɔ me duma nu; bɛbiza na bɛ sa kɛha ye, amaa bɛ fɛlɛkolilɛ ne ali munli.

Ewiade anwo zo konimlilɛ

²⁵ “Mebubu ɛhye mɔ mrɛlɛ nu mehile bɛ. Na mekɛ bara mɔɔ menrɛbu bɛ mrɛlɛ nu bieko a, mebaha Selɛ ne anwo edwɛkɛ wienyi meahile bɛ.

²⁶ Saa mekɛ zɔhane dwu a, bɛbabiza ye wɔ me duma nu; menga kɛ mebabiza meamaa bɛ,

²⁷ ɔluakɛ Selɛ ne ɔdaye ɔkulo bɛ. Ɔkulo bɛ ɔluakɛ bɛkulo me na bɛlie bɛli kɛ mevi Nyamenle anwo lɔ a membale a.

²⁸ Mevi Selɛ ne anwo lɔ a membale ewiade a; yɛɛ kɛkala melɛfi ewiade meahɔ Selɛ ne anwo lɔ.”

²⁹ Ye ɛdoavolɛma ne zele ye kɛ, “Awulae, wɔ edwɛkɛ ne akee ɛkpa nwolɛ ɛdanlɛ wienyi, ɛmbu ye mrɛlɛ nu bieko.

³⁰ Kɛkala yɛnwu kɛ ɛkola ɛnwu debie biala; ɔngyia kɛ awie kɛbiza wɔ kpuyia bɔbɔ. Ɛhye maa yɛdie yɛdi kɛ ɛvi Nyamenle anwo lɔ a ɛrale a.”

³¹ Gyisɛse buale kɛ, “Akee bɛlie bɛli ɔ?

³² Mekɛ ɛlɛba, na yedwu bɔbɔ, bɛbabɔ bɛ kɔsɔɔti asande, na awie biala ahɔ ɔdaye ye sua nu, na yeaha me ngomekye. Noko ɔnrɛha me ngome, ɔboalekɛ Selɛ ne nee me lua.

³³ Meha ɛhye mehile bɛ amaa saa bɛmeta me nwo a bɛanyia anzonudwolɛ. Ɛtane ewiade ɛhye bamaa bɛali nyane, noko bɛgyinla kpundii. Meli ɛtane ewiade ɛhye anwo zo konim!”