Kɔlɔ 1 - BAEBOLO ANZƐƐ BULUKU NWUANZANWUANZA

¹ Kɛlata ɛhye vi Pɔɔlo mɔɔ ɔlua Nyamenle ɛhulolɛ zo yeyɛ Kelaese Gyisɛse ɛzoanvolɛ la nee yɛ diema Temɔte ɛkɛ ne.

² Yɛfa yɛahɔmaa Nyamenle menli ne mɔɔ wɔ Kɔlɔsae na bɛle yɛ mediema nɔhavoma kpalɛ mɔɔ die Kelaese di nɔhalɛ nu la. Yɛ Ze Nyamenle ɛlo bɛ na ɔmaa bɛ anzonudwolɛ.

Moyɛlɛ nzɛlɛlɛ

³ Dahuu yɛsɛlɛ yɛmaa bɛ, yɛyɛ Gyisɛse Kelaese ɔ Ze Nyamenle ne mo.

⁴ Ɔluakɛ yɛde kɛ bɛliele Kelaese Gyisɛse bɛlile la, bɛnyia ɛhulolɛ wɔ Nyamenle menli ne anwo,

⁵ ɔboalekɛ bɛlɛ anyelazo bie mɔɔ bɛ sa baha ye wɔ anwuma a. Anyelazo ɛhye a bɛdele nwolɛ edwɛkɛ alumua ne, wɔ mekɛ mɔɔ bɛvale Edwɛkpa ne bɛrɛlɛle bɛ la.

⁶ Edwɛkpa ne ɛlɛso ma yɛɛ ɔlɛnyi wɔ ewiade ɛleka kɔsɔɔti, kɛmɔ ɔzile la pɛpɛ wɔ bɛ nuhua wɔ mekɛ mɔɔ bɛlumuale bɛdele Nyamenle ɛlolɛ ɛhye anwo edwɛkɛ ne na bɛdele ɔ bo bɛnwunle ye deɛ holɛ la.

⁷ Ɛpafelase a hilehilele bɛ Nyamenle ɛlolɛ ɛhye anwo edwɛkɛ a. Ɔle yɛ diema sonvolɛ kpalɛ kpalɛ mɔɔ sonle Kelaese nɔhalɛ nu a; ɔgyi yɛ gyakɛ anu wɔ lɔ.

⁸ Ɔdaye yɛɛ eza yeha ɛhulolɛ ne mɔɔ Sunsum ne ɛva ɛmaa bɛ la anwo edwɛkɛ yehile yɛ a.

⁹ Ɔlua ɛhye ati, sumunli kɛ yɛdele bɛ nganeɛ la, dahuu yɛsɛlɛ yɛmaa bɛ. Yɛsɛlɛ Nyamenle kɛ ɔva sunsum nu nrɛlɛbɛ nee ndelebɛbo muala ɔyi bɛ tɛkɛɛ, amaa bɛanyia Nyamenle ɛhulolɛdeɛ ne anwo ndelebɛbo,

¹⁰ bɛabɔ bɛ ɛbɛla ne bɛamaa yeafɛta Awulae, dahuu bɛayɛ mɔɔ ɔkulo la, na bɛ ɛbɛlabɔlɛ ne anwo ara nvasoɛ wɔ gyima kpalɛ biala mɔɔ bɛyɛ la anu, na bɛade Nyamenle edwɛkɛ ne abo kpalɛ.

¹¹ Yɛsɛlɛ kɛ Nyamenle ɛva ye anyunlunyia tumi ne ɛwula bɛ anwosesebɛ, amaa bɛava abotane nee anyelielɛ bɛagyinla debie biala anloa,

¹² na bɛava fɛlɛkolilɛ bɛayɛ Selɛ ne mɔɔ ɛmaa bɛfɛta kɛ bɛ nee ye menli ne kɛbɔ nu kɛdɛnla ye wienyi ne anu la mo.

¹³ Nyamenle ɛlie yɛ ɛvi awozinli nu tumi ne mɔ abo, yeva yɛ yera ɔ Ra kulovolɛ ne belemgbunlililɛ ne abo,

¹⁴ na yelua ɔ nwo zo yekpɔne yɛ, yeva yɛ ɛtane yehyɛ yɛ.

Kelaese su ne nee ye gyima

¹⁵ Kelaese le Nyamenle ne mɔɔ ɛnyelɛ ɛnnwu ye la sɔhovolɛ. Yemɔ a ɔle abɔdeɛ muala anu belamunli Ralɛ a.

¹⁶ Ɔ nwo zo a Nyamenle luale bɔle ninyɛne kɔsɔɔti a: mɔɔ wɔ anwuma o nee mɔɔ wɔ aze o, mɔɔ bɛnwu bɛ nee mɔɔ bɛnnwu bɛ la amuala, ewiade ye anu tumima nee arelemgbunli nee bɛdabɛ mɔɔ bɛsie ɛnɛ mekɛ ye anu awozinli ewiade ye nee sunsum nu ɛlɔnema; Nyamenle luale Kelaese anwo zo a bɔle ninyɛne kɔsɔɔti a, yɛɛ Kelaese ati a ɔbɔle bɛ a.

¹⁷ Kelaese wɔ ɛkɛ ne kolaa na ɛhye mɔ amuala ara, na yemɔ a ɔsɔ ewiade ye ɔmaa ɔyɛ ewiade a.

¹⁸ Yemɔ a ɔle ye sonlabaka ne, mɔɔ le Asɔne ne ati a, yemɔ a ɔle debie biala mɔlebɛbo a, yɛɛ yemɔ a ɔle bɛdabɛ mɔɔ bɛdwazole bɛ bɛvile ewule nu la kpanyinli a, amaa debie biala anu yealumua.

¹⁹ Ɔluakɛ Nyamenle ɔdaye ɔhulole yɛɛ ɔvale ye su ne amuala ɔwulale Ralɛ ne nu a.

²⁰ Ɛhye ati, ɔlua Ralɛ ne anwo zo, Nyamenle ɛbɔ kpɔkɛ kɛ ɔdie aleɛabo ninyɛne kɔsɔɔti mɔɔ wɔ anwuma nee aze la yeamaa ɔ nwo na yealua ɔ Ra ne ewule mɔɔ ɔwule meanubaka ne azo la azo ɔ nee bɛ ayɛ ko.

²¹ Dɛba ne ɔlua bɛ ninyɛndane mɔɔ bɛyɛle nee bɛ adwenle ɛtane mɔɔ bɛlɛ ye la ati, ɛnee bɛ nee Nyamenle bɛ avinli twe, na bɛle ye agbɔvolɛ.

²² Na kɛkala, ɔlua Kelaese ewule ne azo bɛyɛ Nyamenle agɔnwo mɔ, amaa yeava bɛ yeara ɔ nyunlu kɛ bɛ nwo te nwuanzaanwu mɔɔ fɔlɛlilɛ biala ɛnle bɛ nu a.

²³ Zɔhane ati, ɔwɔ kɛ bɛkɔ zolɛ bɛsɔ bɛ diedi ne anu ɛsesebɛ, bɛgyinla bɛ ti na bɛgyinla kpundii. Saa bɛyɛ ye zɔhane a yɛɛ awie ɛnrɛhola ɛnrɛzɛkye bɛ anyelazo ne mɔɔ bɛnyianle ye wɔ mekɛ mɔɔ bɛdele Edwɛkpa ne la a. Edwɛkpa ɛhye, bɛbɔ ye nolo bɛhile abɔdeɛ muala mɔɔ wɔ aleɛabo la, yɛɛ medame, Pɔɔlo a bɛyɛ me nwolɛ sonvolɛ a.

Pɔɔlo gyima kɛ ɔle Asɔne ne sonvolɛ

²⁴ Kɛkala, bɛdabɛ bɛ ti ɔyɛ me fɛ kɛ melɛnwu amaneɛ a, ɔluakɛ melua me nwonane nu amaneɛnwunlɛ ye azo melɛboa meamaa Kelaese amaneɛnwunlɛ wɔ ye Asɔne ne ati ali munli.

²⁵ Ɛhye ati yɛɛ Nyamenle ɛyɛ me asɔne ne sonvolɛ, na yeva gyima ɛhye yemaa me kɛ menyɛ wɔ bɛ ti a. Gyima ne a le Nyamenle edwɛkɛ ne nolobɔlɛ.

²⁶ Ɔle fealera nu debie mɔɔ Nyamenle vale veale aleɛabo amra ɛvolɛ dɔɔnwo mɔɔ ɛraze ɛhɔ la, na kɛkala yeye yehile ye menli ne a.

²⁷ Nyamenle ngyehyɛlɛ ne a le kɛ ɔkɛye ye fealera nu kpɔkɛ ne mɔɔ ɔbɔle, mɔɔ anyunlunyia nee anwonyia ɛyi ye tɛkɛɛ, na ɔwɔ ɛkɛ ɔmaa maanle maanle kɔsɔɔti la ɔkɛhile ye menli ne. Fealera nu kpɔkɛ ɛhye a le kɛ Kelaese ne de bɛ nu, na ɔbamaa bɛanyia anyelazo kɛ kenle bie bɛbanyia Nyamenle anyunlunyia ne bie.

²⁸ Yemɔti yɛbɔ Kelaese ɛhye anwo nolo yɛkile awie biala, yɛkilehile bɛ na yɛbɔ bɛ kɔkɔ nrɛlɛbɛ nu, amaa yɛava ko biala yɛara Nyamenle anyunlu kɛ sonla mɔɔ di munli, na ɔ nee Kelaese a lua a.

²⁹ Na ɛhye yɛɛ melɛ anwosesebɛ kpole ne mɔɔ Kelaese fa maa na ɔyɛ gyima ɛsesebɛ wɔ me nu la mepele meyɛ a.