Emɔzo Buluku ne 2 - BAEBOLO ANZƐƐ BULUKU NWUANZANWUANZA

Mowabe

¹ Ɛdɛnkɛma se, “Mowabema yɛ ɛtane la ɛnee bɛyɛ, na mebadea bɛ wɔ ɛhye anwo, ɔboalekɛ bɛyelale Yidɔm belemgbunli ne mbowule bɛmanle bɛdɔle nzonle.

² Yemɔti mebado senle Mowabe azɛlɛ zo na ɔbazɔ yeayela Kɛleɔto aranemgbole ne mɔ. Mowabema bawu konle nu wɔ mekɛ mɔɔ ɛlɔnema ne ɛlɛteɛdea nu na bɛlɛwu aweɛne ndendenle nu la.

³ Mebahu Mowabe belemgbunli ne nee ye mgbanyima mɔɔ wɔ azɛlɛ ne azo la amuala.”

Dwuda

⁴ Ɛdɛnkɛma se, “Dwudama yɛ ɛtane la ɛnee bɛyɛ, na mebadea bɛ wɔ ɛhye anwo, ɔboalekɛ bɛkpo Ɛdɛnkɛma mɛla ne, yɛɛ bɛanli ye ngyehyɛlɛ ne mɔ azo. Bɛli nyamenle adalɛ ne mɔ mɔɔ bɛ mgbanyima zonlenle bɛ la anzi toonwo bɛminli.

⁵ Yemɔti mebado senle Dwuda azɛlɛ zo na ɔbazɔ yeayela Gyɛlusalɛm aranemgbole ne mɔ.”

Nyamenle ndeanlɛ wɔ Yizilayɛma anwo zo

⁶ Ɛdɛnkɛma se, “Yizilayɛma yɛ ɛtane la ɛnee bɛyɛ, na mebadea bɛ wɔ ɛhye anwo, ɔboalekɛ bɛtɔne tenlenema bɛdie dwɛtɛ fufule, yɛɛ bɛtɔne ehyianvolɛma bɛdie mgbɔlaboa.

⁷ Bɛtietia menli mɔɔ bɛ anwosesebɛ ɛwie nee menli mɔɔ ɛnlɛ boavolɛ la anwo zo, na bɛsuhu menli mɔɔ ɛlɛdi nyane la bɛsie ahane. Ralɛ nrenya nee ɔ ze fa raalɛ ko na bɛgua me duma nwuanzanwuanza ne anwo evinli.

⁸ Bɛkundohundo bɛ nwo aze wɔ azukponle biala anyunlu, wɔ adɛladeɛ mɔɔ bɛva bɛwula bɛ lɔ awoba la azo, na bɛno nwanye mɔɔ bɛbɔ menli kakɛ bɛlie la wɔ bɛ Nyamenle ne ɛzonlenlɛ sua ne anu.

⁹ “Noko bɛmɛ bɛ ti, menzɛkyele Amɔlema, mɔɔ bɛ ndendenle le kɛ sida mbaka na bɛ anwosesebɛ le kɛ oku mbaka la bɔkɔɔ membɔle bɛ bo zo.

¹⁰ Eza menyele bɛ menvile Yigyibiti azɛlɛ zo, na menlile bɛ nyunlu wɔ fienemgbole ne anu toonwo ɛvolɛ abulanla, na menvale Amɔlema azɛlɛ ne memanle bɛ, memanle bɛvale bɛyɛle bɛ ti anwo ɛdeɛ.

¹¹ Menyele bɛ mra mrenya ne bie mɔ menyɛle bɛ Nyamenle kpɔmanvolɛma, na memanle bɛ mgbavolɛ ne bie mɔ dule bɛ nwo ziele ahane manle Nyamenle na bɛbɔle ɛwɔkɛ kɛ bɛnrɛnlo nwanye, bɛnrɛpepɛ bɛ ti, yɛɛ bɛnrɛva bɛ sa bɛnrɛha funli. O Yizilayɛma, asoo ɛhye ɛnle nɔhalɛ? Medame Ɛdɛnkɛma a mebiza bɛ a.

¹² “Noko bɛmanle menli mɔɔ dule bɛ nwo manle Nyamenle la nlonle nwanye, na bɛduale Nyamenle kpɔmanvolɛma kɛ bɛmmaka me nrɛlaleɛ ne.

¹³ Na bɛnlea, mebahomo bɛ nwo zo azɛlɛ ne anwo kɛ ehwili mɔɔ abɛlɛ ngyekyeleɛ ɛyi ye tɛkɛɛ na yemi la.

¹⁴ Menli mɔɔ anwo yɛ ndɛ la ɛnrɛhola nriandi; anwosesebɛma agbɔkɛ nu batuto, yɛɛ katakyiema ɛnrɛhola bɛ nwo ngoane die.

¹⁵ Menli mɔɔ to ɛda la ɛnrɛnyia gyinlagyakɛ, menli mɔɔ agyakɛ anzi kola bɛ kpalɛ kpalɛ la ɛnrɛvi ɛsalɛ, yɛɛ menli mɔɔ ka mgbɔnwɔ la ɛnrɛva bɛ nwo dwɔɔ.

¹⁶ Kenle zɔhane menli mɔɔ akɛnra yɛ se wɔ katakyiema avinli bɔbɔ la bagua bɛ adu aze alɛ bɛ sa mgbane agua ndwɛlɛ aze.” Kɛ Ɛdɛnkɛma se la ɛne.