Emɔzo Buluku ne 1 - BAEBOLO ANZƐƐ BULUKU NWUANZANWUANZA

¹ Edwɛkɛ mɔɔ mboaneneavolɛ Emɔso mɔɔ vi Tɛkowa la hanle la ɛne. Mɔɔ ɔhale ɛvolɛ nwiɔ na azɛlɛ ne akpusu, mɔɔ ɛnee Ɛzaya a le belemgbunli wɔ Dwuda na Gyɛhowahye ara nrenya Gyɛlɔbowam a le belemgbunli wɔ Yizilayɛ la, Nyamenle yele ninyɛne ɛhye mɔ mɔɔ fane Yizilayɛ maanle ne anwo la hilele Emɔso.

² Emɔso hanle kɛ, “Ɛdɛnkɛma kulu wɔ Zayɔn Boka; ɔ ne kpusu Gyɛlusalɛm. Mboaneneavolɛma adidileka ne mɔ ɛwe, Kamɛle Boka ne azo ndile ne mɔ ɛwu.”

Maanle maanle mɔɔ zuozua Yizilayɛ la ndeanlɛ Selea

³ Ɛdɛnkɛma se, “Dɛmasekɛsema yɛ ɛtane la ɛnee bɛyɛ, na mebadea bɛ wɔ ɛhye anwo, ɔboalekɛ bɛva atisesebɛ amaamuo bɛbu Geleadema.

⁴ Yemɔti mebado senle Belemgbunli Hazeeyɛle suakunlu ɛkɛ na senle ne bayela Belemgbunli Bɛneheedade aranemgbole ne mɔ.

⁵ Mebagologolo suakpole Dɛmasekɛse nlenkɛ mgbole ne mɔ na meaye Evɛn Bɔnza ne anu amra nee Bɛteyidɛn meavi me nye zo. Bɛbahye Seleama bɛahɔ nlɔnu wɔ Kɛɛ.”

Filisitia

⁶ Ɛdɛnkɛma se, “Gazama yɛ ɛtane la ɛnee bɛyɛ, na mebadea bɛ wɔ ɛhye anwo, ɔboalekɛ bɛhyele maanle mumua ko anu amra bɛhɔle nlɔnu na bɛdɔnenle bɛ bɛmanle Yidɔmma.

⁷ Yemɔti mebado senle Gaza bane ne mɔ anu, na senle ne bayela ye aranemgbole ne mɔ.

⁸ Mebahu Ahyedɔdoma nee Ahyekɛlɔn belemgbunli ne. Mebadea suakpole Ɛkelɔn, na Filisitiama mɔɔ ɛha la amuala bawu.”

Taya

⁹ Ɛdɛnkɛma se, “Tayama yɛ ɛtane la ɛnee bɛyɛ, na mebadea bɛ wɔ ɛhye anwo, ɔboalekɛ bɛyele maanle mumua ko anu amra amuala bɛmanle Yidɔmma. Bɛangakye mediemayɛlɛ ngyekyeleɛ ne mɔɔ bɛ nee bɛ yɛle la. Luk 10.13-14

¹⁰ Yemɔti mebado senle suakpole Taya bane ne mɔ anu, na senle ne bayela ye aranemgbole ne mɔ.”

Yidɔm

¹¹ Ɛdɛnkɛma se, “Yidɔmma yɛ ɛtane la ɛnee bɛyɛ, na mebadea bɛ wɔ ɛhye anwo, ɔboalekɛ bɛvale konle bɛyɛle bɛ mediema Yizilayɛma kpɔdekpɔde, bɛanze bɛ anwunvɔne. Bɛ ɛya ne andwo ɛlɛ. Oba 1-14; Mal 1.2-5

¹² Yemɔti mebado senle suakpole Timan azo na ɔbayela Bɔzela aranemgbole ne mɔ.”

Amɔn

¹³ Ɛdɛnkɛma se, “Amɔnoma yɛ ɛtane la ɛnee bɛyɛ, na mebadea bɛ wɔ ɛhye anwo, ɔboalekɛ bɛko bɛakpondɛ azɛlɛ bɛaboka bɛ maanle ne anwo la, bɛhunle Geleade nrenzɛvolɛma.

¹⁴ Yemɔti mebado senle suakpole Relaba bane ne mɔ anu, na senle ne bayela ye aranemgbole ne mɔ. Akee bɛbadeɛdea nu wɔ konle kenle ne, na konle ne anu bayɛ se kɛ ahumuakyima la.

¹⁵ Bɛbahye bɛ belemgbunli ne nee ye mgbanyima ne mɔ bɛahɔ nlɔnu.”