Ɛzoanvolɛma Gyima ne 3 - BAEBOLO ANZƐƐ BULUKU NWUANZANWUANZA

Bɛyɛ abubura bie ayile

¹ Kenle ko Pita nee Dwɔn kɔ Ɛzonlenlɛ Sua ne anu wɔ ewiazo dɔne nsa nzɛlɛlɛ mekɛ ne anu la,

² bɛhɔdole nrenya bie mɔɔ bɛwole ye abubura la. Dahuu bɛsoa ye bɛba Ɛzonlenlɛ Sua ne anuhɔlɛ ne mɔɔ bɛfɛlɛ ye “Anlenkɛ Kɛnlɛma” la anloa bɛmaa ɔsɛlɛzɛlɛ menli mɔɔ ɛlɛkɔ nu la ninyɛne.

³ Ɔnwunle Pita nee Dwɔn kɛ bɛlɛkɔ Ɛzonlenlɛ Sua ne anu la, ɔzɛlɛle bɛ kɛ bɛhyɛ ye debie.

⁴ Bɛnleanle ye koonwu, na Pita zele ye kɛ, “Nea yɛ!”

⁵ Ɔnleanle bɛ, na ɔdwenlenle kɛ bɛbahyɛ ye debie.

⁶ Na Pita zele ye kɛ, “Menlɛ ezukoa fee, na mɔɔ melɛ ye la a mefa meamaa wɔ la. Ɔlua Gyisɛse Kelaese mɔɔ vi Nazalɛte la duma nu, mese wɔ kɛ, dwazo tia!”

⁷ Ɔzɔle ɔ sa fema ne ɔdwazole ye, na ɛkɛ ne ala ɔ gyakɛ nee ye adwongu ne mɔ anu mianle,

⁸ ɔwulule ɔpenle na ɔbɔle ɔ bo kɛ ɔtia. Ɔ nee bɛ hɔle Ɛzonlenlɛ Sua ne anu, na ɔwuluwulule ɔyele Nyamenle ayɛlɛ.

⁹ Menli ne amuala nwunle kɛ ɔlɛwuluwulu ɔye Nyamenle ayɛlɛ,

¹⁰ na nzinlii mɔɔ akee bɛnwunle kɛ sonla ne mɔɔ anrɛɛ tɛnla sɛlɛzɛlɛ ninyɛne wɔ Ɛzonlenlɛ Sua ne anuhɔlɛ ne mɔɔ bɛfɛlɛ ye “Anlenkɛ Kɛnlɛma” la anloa la, ɔyɛle bɛ azibɛnwo, na mobolɛ kpole bole bɛ wɔ mɔɔ ɛzi la anwo.

Pita tendɛ ahile menli mɔɔ wɔ Ɛzonlenlɛ Sua ne anu la

¹¹ Mɔɔ nrenya ne doa Pita nee Dwɔn la, ɔyɛle menli ne nwanwane ɔmanle dɔɔnwo nriandile hɔyiale bɛ wɔ Ɛzonlenlɛ Sua ne “Sɔlɔmɔn Kpɔda” ne abo.

¹² Pita nwunle bɛ la ɔzele bɛ kɛ, “Yizilayɛma, duzu ati a ɛhye ɛyɛ bɛ azibɛnwo na bɛ nye ɛha yɛ nwo ɛ? Anzɛɛ bɛdwenle kɛ yɛdayɛ yɛ anwosesebɛ nee yɛ ɛzonlenlɛ kpalɛ zo, yɛɛ yɛlua mɔɔ yɛmaa nrenya ɛhye ɛdia a?

¹³ Ebileham, Ayezeke nee Gyekɔbo bɛ Nyamenle ne, nee yɛ nlenya mɔ Nyamenle ne yɛɛ ɛwula ye Sonvolɛ Gyisɛse anyunlunyia a. Bɛyele ye bɛmanle mgbanyima ne mɔ na bɛkpole ye wɔ Paelɛte anyunlu, wɔ mekɛ mɔɔ ɛnee Paelɛte mumua ne kulo kɛ ɔgyakyi ye la.

¹⁴ Ɔle sonlakpalɛ mɔɔ anwo te a, noko bɛkpole ye, na bɛkpale Paelɛte kyɛlɛ kɛ ɔdwula kɔdiawu ne ɔmaa bɛ.

¹⁵ Bɛhunle sonla ne mɔɔ maa ngoane la, na Nyamenle dwazole ye vile mɔwuamra anu; yɛ muala yɛdi ɛhye anwo daselɛ.

¹⁶ Gyisɛse ɛhye duma nu nee ye tumi zo nee diedi wɔ ye duma ne anu yɛɛ nrenya ɛhye ɛnɛ gyi bɛ nyunlu ɛke kɛ yede kpɔkɛ bɔkɔɔ a.

¹⁷ “Na mediema, meze kɛ mɔɔ bɛ nee bɛ mgbanyima ne mɔ yɛle Gyisɛse la, tɛ bɛ ɔ.

¹⁸ Nyamenle luale ye kpɔmanvolɛma anwo zo hanle dole ɛkɛ ne dɛba, kɛ ɔwɔ kɛ Mɛzaya ne nwu amaneɛ, yemɔti a ɔmanle ɔrale ye zɔhane a.

¹⁹ Zɔhane ati bɛnlu bɛ nwo na bɛzia bɛrɛla Nyamenle ɛkɛ, amaa yeava bɛ ɛtane ne mɔ amuala yeahyɛ bɛ,

²⁰ na mekɛ dwu a Awulae arɛlɛ bɛ Sunsum nu anwosesebɛ, na yeava Mɛzaya ne, mɔɔ le Gyisɛse, mɔɔ yeye ye dɛba yemaa bɛ la yɛarɛlɛ bɛ.

²¹ Ɔwɔ kɛ ɔtɛnla anwuma lɔ kɔkpula kɛ bɛkɛyɛ ninyɛne kɔsɔɔti fofolɛ, kɛmɔ Nyamenle ɛlua ye kpɔmanvolɛma nwuanzanwuanza ne mɔ anwo zo ɛha ye dɛba la.

²² Mosisi hanle kɛ, ‘Awulae bɛ Nyamenle ne baye kpɔmanvolɛ avi bɛ avinli na yeazoa ye wɔ bɛ nwo ɛkɛ, kɛmɔ yezoa me la, na ɔwɔ kɛ bɛtie ye na bɛdi mɔɔ ɔkɛha ɔkɛhile bɛ la amuala azo.

²³ Awie biala mɔɔ andie kpɔmanvolɛ zɔhane la, bɛbaye ye bɛavi Nyamenle menli ne avinli na bɛazɛkye ye.’

²⁴ Eza Nyamenle kpɔmanvolɛma, Samoɛle nee bɛdabɛ mɔɔ bɛli ɔ nzi la amuala, biala hanle mekɛ ɛhye anwo edwɛkɛ.

²⁵ Nyamenle ɛwɔkɛ ne mɔɔ ɔluale ye kpɔmanvolɛma anwo zo ɔbɔle la le bɛ ɛdeɛ, yɛɛ ngyekyeleɛ ne mɔɔ Nyamenle nee bɛ nlenya mɔ kyekyele la, bɛwɔ nu bie, ɔluakɛ ɔhanle ɔhilele Ebileham kɛ, ‘Ɛ bo zo amra anwo zo yɛɛ mebalua meayila maanle maanle kɔsɔɔti a.’

²⁶ Yemɔti Nyamenle yele ye Sonvolɛ ne na ɔzoanle ye ɔmanle ɔlumuale ɔrale bɛ ɛkɛ kɛ ɔmaa awie biala ɛhwe ɔ nwo ɛvi ɛtane nwo na ɔyila bɛ.”