Ɛzoanvolɛma Gyima ne 26 - BAEBOLO ANZƐƐ BULUKU NWUANZANWUANZA

Pɔɔlo sa ɔ ne ahile Agelepa

¹ Belemgbunli Agelepa zele Pɔɔlo kɛ, “Ɛlɛ adenle ɛsa ɛ ne.” Na Pɔɔlo manle ɔ sa zo na ɔzale ɔ ne kɛ:

² “Belemgbunli Agelepa, ɔyɛ me fɛ kpole kɛ mesa me ne wɔ ɛ nyunlu ɛnɛ wɔ ɛzonle mɔɔ Dwuuma ɛva ɛdo me nwo zo la anwo a.

³ Ɔluakɛ wɔmɔ, ɛze Dwuuma maamɛla ne kpalɛ. Yemɔti, mesɛlɛ wɔ, nyia abotane na tie me.

⁴ “Ɔvi me ngakula nu, Dwuuma amuala ze kɛ mezi mebɔ me ɛbɛla la. Bɛze kɛ membɔle me ɛbɛla bo wɔ me maanle ye anu, nee Gyɛlusalɛm.

⁵ Bɛze, yɛɛ saa bɛdi nɔhalɛ a, anrɛɛ bɛkola bɛdi daselɛ kɛ mɔlebɛbo ne amuala ɛnee meboka ɛzonlenlɛ fane ɛsesebɛ ne mɔɔ bɛfɛlɛ ye Falasii la anwo.

⁶ Kɛkala megyi ɛke kɛ bɛdi me edwɛkɛ, ɔluakɛ melɛ anyelazo wɔ Nyamenle ɛwɔkɛ ne mɔɔ ɔbɔle yɛ nlenya mɔ la anu.

⁷ Ɛwɔkɛ ne ati yɛɛ yɛ mbusua ekpunli bulu nee nwiɔ ye gua ɛzonlenlɛ zo alehyenlɛ nee aledwolɛ, kɛ saa bɛkɛnyia ye a. Na anyelazo ɛhye ala ati, Nana, yɛɛ Dwuuma ɛlɛto me ɛzonle zɛhae a.

⁸ Na duzu ati yɛɛ bɛmɛ Dwuuma bɛnlie bɛnli kɛ Nyamenle badwazo mɔwuamra ɛ?

⁹ “Medame, ɛnee medwenle kɛ ɔle me gyima kɛ ɔwɔ kɛ mebɔ mɔdenle meyɛ debie biala metia Gyisɛse ɛhye mɔɔ vi Nazalɛte la duma ne,

¹⁰ yɛɛ mɔɔ menyɛle ye wɔ Gyɛlusalɛm la ɛne. Menliele tumi wɔ sɛlɛvolɛ mgbanyinli ne mɔ ɛkɛ ne na menguale Nyamenle menli ne dɔɔnwo efiade. Eza saa bɛbua bɛ ewule fɔlɛ a, meto me ɛma mefua zolɛ.

¹¹ Mekɛ dɔɔnwo ne ala memanle bɛdeanle bɛ wɔ nyianu azua ne mɔ anu, na membɔle mɔdenle kɛ memaa bɛ ngome bɛaha ɛtane bɛatia bɛ ɛzonlenlɛ ne. Me nye bolole bɛ nwo kpalɛ manle ɔrale kɛ akee mekɔ azuamgbole zo wɔ maanle maanle zo yɛɛ mekɔkye bɛ meba a.

Pɔɔlo ka kɛ ɔzile ɔrayɛle diedinli la

¹² “Ɛhye ala anwo bie yɛɛ sɛlɛvolɛ mgbanyinli ne mɔ manle me tumi kɛlata manle mengɔle Dɛmasekɛse a.

¹³ Na wɔ adevinli ne, kɛyɛ sɛnzɛngyinla, Nana, yɛɛ menwunle kɛ wienyi mɔɔ ta tɛla sɛnzɛne la, vi anwuma ɛrabɛnra ɛyia me nee menli mɔɔ me nee bɛ lua la a.

¹⁴ Yɛ muala yɛpɛle yɛfinle, na mendele ɛnelɛ bie kɛ ɔlɛtendɛ yeahile me wɔ Hibulu aneɛ nu kɛ, ‘Sɔɔlo, Sɔɔlo! Duzu ati a ɛlɛyɛ me kpɔdekpɔde ɛ? Ɛto ɛ gyakɛ ɛwɔ evileni bowule a, ɛboda ɛ nwo o!’

¹⁵ Na membizale ye kɛ, ‘Awulae, na ɛdawɔ nwane ɔ?’ Na Awulae zele kɛ, ‘Mame a mele Gyisɛse mɔɔ ɛlɛyɛ me kpɔdekpɔde la.

¹⁶ Na dwazo gyinla ɛ gyakɛ anu. Meye me nwo mehile wɔ, amaa meayɛ wɔ me sonvolɛ na wɔali me nwo daselɛ wɔ mɔɔ wɔnwu ye ɛnɛ, nee mɔɔ nzinlii mebaye meahile wɔ la amuala anwo.

¹⁷ Mebalie wɔ meavi Dwuuma nee bɛdabɛ mɔɔ bɛnle Dwuuma mɔɔ mebazoa wɔ bɛ avinli la asa anu.

¹⁸ Mesoa wɔ, amaa wɔahɔbuke bɛ nye na wɔahwe bɛ wɔavi awozinli nu nee Seetan tumi ne abo wɔara wienyi nu nee Nyamenle ɛkɛ, amaa ɔlua bɛ diedi mɔɔ wɔ me nu la azo bɛanyia ɛtanefakyɛ na bɛanyia ɛleka wɔ Nyamenle menli ne mɔɔ yekpa nu yeye bɛ la avinli.’

Pɔɔlo ka ye gyimayɛlɛ nwo edwɛkɛ

¹⁹ “Ɛhye ati, Belemgbunli Agelepa, meanyɛ anzosesebɛ wɔ anwuma ɛnyelɛzodeɛnwunlɛ ɛhye anwo.

²⁰ Na menlumuale menganle ye wɔ Dɛmasekɛse nee Gyɛlusalɛm yɛɛ Dwudiya maanle ne mɔ amuala anu, nee maanle maanle mɔɔ ɛmboka Dwuuma anwo la anu, kɛ bɛnlu bɛ nwo na bɛzia bɛrɛla Nyamenle ɛkɛ, na bɛbɔ ɛbɛla mɔɔ kile kɛ bɛnlu bɛ nwo la.

²¹ Na ɔlua ɛhye ala ati yɛɛ Dwuuma rahyele me wɔ Ɛzonlenlɛ Sua ne anu mɔɔ anrɛɛ bɛku me a.

²² Noko Nyamenle moalɛ ti, ɛnɛ megyi ɛke metɛdi daselɛ metɛkile bɛ mgbanyinli nee bɛ ngakula muala. Mɔɔ Mosisi nee Nyamenle kpɔmanvolɛma hanle dole ɛkɛ ne kɛ ɔbazi la, yemɔ ala a le mɔɔ melɛka la.

²³ Ɔwɔ kɛ Mɛzaya ne nwu amaneɛ na ɔyɛ sonla mɔɔ lumua mɔɔ badwazo avi mɔwuamra anu, na yeabɔ wienyi nwo nolo yeahile Dwuuma nee bɛdabɛ mɔɔ bɛnle Dwuuma la amuala.”

²⁴ Mɔɔ Pɔɔlo anloa wɔ zolɛ ɔlɛka edwɛkɛ ne la, Fɛsetɛse deanle ye nu zele kɛ, “Pɔɔlo, wɔzɛ! Ɛdoa nwomazukoalɛ dedee ɛlɛbɔ ɛlane.”

²⁵ Pɔɔlo buale ye kɛ, “Nana Fɛsetɛse, metɛsɛle. Nɔhalɛ komii ne a melɛka la.

²⁶ Belemgbunli Agelepa, mekpa edwɛkɛ ne anwo ɛdanlɛ mɔɔ menzulo ɔ nzi a, ɔluakɛ ɛdawɔ ɛze ɛhye mɔ amuala. Meze noko kɛ ɛyɛle bɛ nzonlɛ kpalɛ kpalɛ, ɔluakɛ ɛhye mɔ biala anzi fealera nu.

²⁷ Belemgbunli Agelepa, asoo ɛdie Nyamenle kpɔmanvolɛma edwɛkɛ ne ɛdi? Meze kɛ ɛdie ɛdi somaa!”

²⁸ Agelepa bizale Pɔɔlo kɛ, “Ɛnee ɛdwenle kɛ mekɛ ekyi ɛhye ala anu ɛmaa meayɛ Keleseɛnenli ɔ?”

²⁹ Pɔɔlo buale ye kɛ, “Saa mekɛ ekyi nu o, saa mekɛ tendenle nu o, me nzɛlɛlɛ a le kɛ anrɛɛ Nyamenle amaa ɛdawɔ nee bɛdabɛ mɔɔ bɛlɛtie me ɛnɛ la amuala ayɛ ye sonvolɛma kɛ medame la, mɔɔ nwɔnzɔnwɔnzɔ ye ɛmboka nwolɛ a.”

³⁰ Na belemgbunli ne, amɛnlado ne, yɛɛ Bɛnaesi nee bɛdabɛ mɔɔ bɛha la amuala dwazole.

³¹ Bɛvindele la, bɛhanle bɛhilele bɛ nwo kɛ, “Sonla ɛhye ɛtɛyɛle debie mɔɔ fɛta kɛ bɛku ye anzɛɛ bɛto ye efiade bɔbɔ a.”

³² Na Agelepa zele Fɛsetɛse kɛ, “Saa sonla ye ambɔ ye edwɛkɛ ne atua ammaa Maanle Maanle belemgbunli ne a anrɛɛ ɔwɔ kɛ bɛgyakyi ye bɛmaa ɔkɔ.”