Ɛzoanvolɛma Gyima ne 12 - BAEBOLO ANZƐƐ BULUKU NWUANZANWUANZA

Bɛyɛ diedima ne kpɔdekpɔde

¹ Mekɛ ɛhye anu ala Belemgbunli Hɛlɔdo vale ɔ nye wulale diedima ne bie mɔ anyunlu.

² Ɔmanle bɛpɛle Dwɔn adiema Gyemise ati.

³ Na mɔɔ ɔnwunle kɛ ɛhye ɛyɛ Dwuuma fɛ la, ɔdoale zo na ɔhyele Pita ɔdaye. (Ɛhye zile Angye Ɛvoyia ne anu.)

⁴ Mɔɔ bɛhyele Pita la, ɔdole ye efiade na ɔyele sogyama nna-nna ekpunli nna kɛ bɛzinza ye. Hɛlɔdo yɛle kɛ saa bɛdi Akpabɛnwo Ɛvoyia ne bɛwie a yɛɛ ɔkɛli ye edwɛkɛ a.

⁵ Yemɔti Pita lale efiade ne, na diedima ne noko anye bolole yɛle nzɛlɛlɛ ɛsesebɛ kpalɛ manle ye.

Bɛye Pita efiade ne

⁶ Nɔe ne mɔɔ ɛnee aleɛ kye a Hɛlɔdo kɛye Pita kɛmaa menli ne la, ɛnee Pita la sogyama nwiɔ mɔɔ ɛlɛsinza ye la avinli, na bɛva nwɔnzɔnwɔnzɔ nwiɔ bɛgua ye, na bɛva bɛsosɔ sogyama nwiɔ ne, yɛɛ eza sogyama bie mɔ noko gyigyi anlenkɛ ne anloa ɛlɛsinza.

⁷ Arɛlevilɛ nu ala Nyamenle soanvolɛ rale ɛkɛ na wienyi kpole bie dale efiade ne. Nyamenle soanvolɛ ne bɔle Pita abati dunwuele ye na ɔzele ye kɛ, “Maa ɔyɛ ndɛ dwazo!” Na ɛkɛ ne ala nwɔnzɔnwɔnzɔ ne vi ɔ sa wɔlɔle guale.

⁸ Na Nyamenle soanvolɛ ne zele ye kɛ, “Fa wɔ tɛladeɛ ne nee wɔ mgbɔlaboa ne wula.” Pita yɛle ye zɔhane na Nyamenle soanvolɛ ne eza zele ye kɛ, “Akee fa wɔ tabule ne kye na toa me.”

⁹ Pita lile ɔ nzi na bɛvi efiade ne bɛvindele. Noko akee ɛnee ɔnnwu ye kpalɛ saa mɔɔ Nyamenle soanvolɛ ne ɛlɛyɛ la le amgba o; ɔdwenlenle kɛ ɛlalɛ ɔ.

¹⁰ Bɛdɛlale sinzavolɛma ekpunli ne mɔɔ lumua nee mɔɔ tɔ zolɛ nwiɔ, na bɛdwule mbulalɛ anlenkɛ ne mɔɔ bɛfa nu bɛfinde suakpole ne azo la anwo la, anlenkɛ ne angome bukele manle bɛ, na bɛvindele. Bɛhɔle ekyii la, Nyamenle soanvolɛ ne gyakyile Pita na ɔhɔle.

¹¹ Pita anye zo tetele ye la ɔzele kɛ, “Akee bɔ zo mɔɔ menwu kɛ debie biala mɔɔ ɛlɛkɔ zolɛ la le nɔhalɛ a. Awulae ɛzoa ɛmaa bɛraye me bɛvi Hɛlɔdo asa anu, nee ninyɛne mɔɔ Dwuuma anye la kɛ bɛkɛyɛ me la amuala anu.”

¹² Mɔɔ ɔnwunle ye zɛhae la, Pita luale zolɛ hɔle Dwɔn Maake ɔ nli Mɛle sua nu, ɛnee menli dɔɔnwo ɛyia ɛkɛ na bɛlɛyɛ nzɛlɛlɛ.

¹³ Pita bɔle anuhɔlɛ lɔ anlenkɛ ne anu, na sonvolɛ bɛlɛra bie mɔɔ bɛfɛlɛ ye Wuloda la rale kɛ ɔbanlea ahenle holɛ.

¹⁴ Mɔɔ ɔdele Pita ane kɛ yemɔ a ɔlɛfɛlɛ la, fɛlɛko ngome ti, kɛ ɔkɛdukue anlenkɛ ne la, ɔziale ɔhɔbɔle amaneɛ kɛ Pita ɛra na ɔgyi anlenkɛ ne anzi lɔ.

¹⁵ Bɛzele ye kɛ, “Debie ɛlɛyɛ wɔ.” Na ɔtinlinle zolɛ ɔhanle ye anyebololɛ nu kɛ ɔle nɔhalɛ, yemɔti bɛhanle kɛ, “Ɛnee noko ye nwomenle ɔ.”

¹⁶ Pita bɔle anlenkɛ ne anu ndinlizo; nzinlii bɛrabukele ye, na bɛnwunle ye la, ɔyɛle bɛ azibɛnwo.

¹⁷ Ɔmanle ɔ sa zo kɛ bɛyɛ koonwu, na ɔhanle kɛ Awulae zile yele ye wɔ efiade ne la ɔhilele bɛ. Ɔzele bɛ kɛ, “Bɛha bɛhile Gyemise nee mediema mɔɔ ɛha la amuala,” na ɔvindele ɔhɔle.

¹⁸ Mɔɔ aleɛ hyenle la, sinzavolɛma ne adwenle zɛkyele kpalɛ, ɔluakɛ ɛnee bɛngola bɛnnwu mɔɔ ɛzi Pita anwo zo a.

¹⁹ Hɛlɔdo manle bɛkpondɛle ye biala, na bɛannwu ye. Yemɔti ɔmanle bɛhyele sinzavolɛma ne nuokɛ na ɔzele kɛ bɛhu bɛ bɛdua. Ɛhye anzi, Hɛlɔdo vi Dwudiya hɔle Sizalia hɔlile mekɛ ekyi wɔ ɛkɛ.

Hɛlɔdo ewule nu

²⁰ Hɛlɔdo vale menli mɔɔ wɔ Taya nee Saedɛn la anwo ɛya, ɛhye ati bɛdule menli kɛ bɛhɔnwu ye. Bɛlumuale bɛ sa hanle Belasetɛse mɔɔ nea belemgbunli suakunlu ɛkɛ ne la moalɛ, na akee bɛhɔle Hɛlɔdo anyunlu bɛhɔkpɔdale ye. Ɔluakɛ bɛ aleɛ mɔɔ bɛnyia ye la amuala vi belemgbunli ne maanle nu.

²¹ Kenle mɔɔ bɛhilele la dwule la, Hɛlɔdo wulale ye belemgbunli tɛladeɛ ne na ɔhɔdɛnlanle ye ebia nu na ɔdendɛle ɔhilele menli ne mɔ.

²² Menli ne mɔ bɔle ɔse zele kɛ, “Ɛhye, yemɔ nyamenle bie ane ɔ, na tɛ sonla ne ɔ.”

²³ Na arɛlevilɛ nu ala Awulae soanvolɛ rabɔle Hɛlɔdo dole aze manle ɔ nwo dole ye, ɔlɔle azonlɛ na ɔwule, ɔluakɛ yeanva anyunlunyia yeammaa Nyamenle.

²⁴ Nyamenle edwɛkɛ ne hɔle zolɛ dɛlɛle.

²⁵ Baanabase nee Sɔɔlo wiele bɛ gyima ne di la, bɛvi Gyɛlusalɛm bɛhɔle, na bɛvale Dwɔn Maake bɛbokale bɛ nwo.