Ɛzoanvolɛma Gyima ne 11 - BAEBOLO ANZƐƐ BULUKU NWUANZANWUANZA

Pita bɔ ye amaneɛ ahile Gyɛlusalɛm Asɔne ne

¹ Ɛzoanvolɛma ne nee diedima mɔɔ wɔ Dwudiya la dele kɛ menli mɔɔ ɛnle Dwuuma la noko ɛlie Nyamenle edwɛkɛ ne ɛli.

² Yemɔti mɔɔ Pita hɔle Gyɛlusalɛm la, bɛdabɛ mɔɔ bɛmɛ bɛ adwenle wɔ mrenyanu nzonlɛyɛlɛ zo la dendɛle ye nwolɛ,

³ na bɛbizale ye kɛ, “Kɛ ɔyɛle mɔɔ ɛhɔle menli mɔɔ ɛtɛyɛle bɛ mrenyanu nzonlɛ la sua nu na ɛ nee bɛ dole bɛ sa ɛyɛba ko anu ɛ?”

⁴ Na Pita bɔle ɔ bo hanle edwɛkɛ ne nee mɔɔ zile la amuala hilele bɛ.

⁵ Ɔse, “Ɛnee mewɔ suakpole ne mɔɔ bɛfɛlɛ ye Dwɔpa la azo melɛyɛ nzɛlɛlɛ, na me nye hɔle dɔɔnwo, na menwunle debie bie mɔɔ le kɛ ɛdanlɛ mɔɔ bɛdedɛ ɔ nloa nna ne amuala anu la kɛ ɔvi anwuma na bɛlɛdwula ye aze, na ɔradwule me nyunlu ɛkɛ ne la, ɔgyinlanle.

⁶ Mɔɔ meneanle nuhua la menwunle nane, nwɔlɛ, yɛɛ nloma ngakyile wɔ nuhua.

⁷ Na mendele kɛ ɛnelɛ bie se, ‘Pita, dwazo na ku bie di!’

⁸ Na menganle kɛ, ‘Kyɛkyɛ, Awulae, debie mɔɔ le kyibadeɛ anzɛɛ nwolɛ ɛnde la metɛdile bie ɛlɛ.’

⁹ Na ɛnelɛ ne vi anwuma rale bieko kɛ, ‘Debie biala mɔɔ Nyamenle ɛde nwolɛ la mmabu ye kɛ nwolɛ ɛnde!’

¹⁰ Ɛhye zile fane nsa, na nzinlii bɛhwenle ye bɛhɔle anwuma.

¹¹ Mekɛ ne anu ala yɛɛ menli nsa mɔɔ ɛnee bɛzoa bɛ vi Sizalia wɔ me nwo ɛkɛ ne la rale sua nu ɛkɛ a.

¹² Na Sunsum Nwuanzanwuanza ne zele me kɛ me nee bɛ ɛhɔ, memmasi aze. Mediema nsia ɛhye mɔ mɔɔ vi Dwɔpa la bokale me nwo manle yɛ muala yɛhɔle Sizalia wɔ Kɔnileɛse sua nu.

¹³ Kɔnileɛse hanle kɛ ɔzile ɔnwunle Nyamenle soanvolɛ bie wɔ sua ne anu na ɔzele ye kɛ, ‘Soa maa bɛhɔ Dwɔpa bɛhɔva nrenya bie mɔɔ bɛfɛlɛ ye Saemɔn Pita la,

¹⁴ na ɔbaha edwɛkɛ mɔɔ kɛmaa ɛ nee wɔ sua nu amra kɛnyia ngoane la.’

¹⁵ Na membɔle ɔ bo kɛ metendɛ ala la yɛɛ Sunsum Nwuanzanwuanza ne rale bɛ nwo zo, kɛmɔ mɔlebɛbo ne ɔrale yɛ nwo zo la a.

¹⁶ Na mengakyele mɔɔ Awulae hanle la, ɔse, ‘Dwɔn vale nzule a zɔnenle a, na bɛmɛ, bɛbava Sunsum Nwuanzanwuanza ne a bɛazɔne bɛ a.’

¹⁷ Na saa Nyamenle ɛmaa bɛdabɛ mɔɔ bɛnle Dwuuma la ahyɛlɛdeɛ, kɛmɔ mɔlebɛbo ne ɔvale ɔhyɛle yɛ kɛ yɛlie Awulae Gyisɛse Kelaese yɛli la a, ɛnee mame a le nwane, mɔɔ ɔwɔ kɛ metua Nyamenle adenle a!”

¹⁸ Bɛdele ɛhye la, bɛgyakyile bɛ nvefenu ne na bɛyeyɛle Nyamenle bɛzele kɛ, “Nyamenle ɛmaa bɛdabɛ mɔɔ bɛnle Dwuuma la noko adenle kɛ bɛnlu bɛ nwo na bɛnyia ngoane mɔɔ ɛnlɛ awieleɛ.”

Anteɔko asɔne ne

¹⁹ Sitivin ɛhunlɛ ne anzi, kpɔdekpɔde mɔɔ bɛyɛle diedima ne la manle bɛbɔle asande, bie mɔ hɔvindele Fonehyea, Saepelɛse nee Anteɔko bɛhɔhanle Edwɛkpa ne bɛhilele Dwuuma mɔɔ wɔ lɔ la ala.

²⁰ Diedima ne bie mɔ mɔɔ vi Saepelɛse nee Saelin la noko hɔhanle Edwɛkpa ne wɔ Anteɔko hilele bɛdabɛ mɔɔ bɛnle Dwuuma la.

²¹ Awulae lile bɛ nzi manle menli dɔɔnwo liele lile na bɛhakyile bɛrale Awulae ɛkɛ.

²² Gyɛlusalɛm asɔne ne dele ɛhye, na bɛzoanle Baanabase wɔ Anteɔko.

²³ Mɔɔ ɔhɔdwule na ɔnwunle kɛ Nyamenle ɛzi ɛlo menli ne la, ɔlile fɛlɛko na ɔzile bɛ kɛnra kɛ bɛva bɛ ahonle muala bɛzɔ diedi ne anu kpalɛ na bɛli nɔhalɛ bɛmaa Awulae.

²⁴ Baanabase mumua ne le sonlakpalɛ mɔɔ diedi nee Sunsum Nwuanzanwuanza ne ɛyi ye tɛkɛɛ la ati, ɔhwenle menli dɔɔnwo ɔrale Awulae ɛkɛ.

²⁵ Baanabase akee hɔle Taasɛse kɛ ɔkakpondɛ Sɔɔlo.

²⁶ Mɔɔ ɔnwunle ye la ɔ nee ye rale Anteɔko. Bɛ mu nwiɔ bɛ nee asɔnema ne dɛnlanle ɛvolɛ ko na bɛhilehilele bɛ. Na Anteɔko ɛkɛ yɛɛ bɛlumuale bɛvɛlɛle ɛdoavolɛma ne Keleseɛnema a.

²⁷ Mekɛ ne anu ala Nyamenle kpɔmanvolɛma bie vi Gyɛlusalɛm rale Anteɔko.

²⁸ Bɛ nuhua ko mɔɔ bɛfɛlɛ ye Agabɛse la dwazole luale Sunsum ne tumi ne azo hanle dole ɛkɛ kɛ ɛhɔne kpole bie bara ewiade amuala. (Ɛhye yɛle zɔhane wɔ Maanle Maanle Belemgbunli Kolɔdeɛse mekɛ zo.)

²⁹ Yemɔti diedima ne bɔle kpɔkɛ kɛ bɛkeha bɛ sa aze na mɔɔ bɛkɛnyia ye la bɛava bɛahɔboa mediema mɔɔ wɔ Dwudiya la.

³⁰ Bɛyɛle ɛhye na bɛvale mɔɔ bɛnyianle ye la bɛmanle Baanabase nee Sɔɔlo hɔmanle mgbanyima ne mɔ wɔ Gyɛlusalɛm.