Ɛzoanvolɛma Gyima ne 10 - BAEBOLO ANZƐƐ BULUKU NWUANZANWUANZA

Pita nee Kɔnileɛse

¹ Nrenya bie wɔ Sizalia, bɛfɛlɛ ye Kɔnileɛse. Ɔle Wulomu Ɛlɔne ekpunli ne mɔɔ bɛfɛlɛ ye “Yetalea” la safohyenle.

² Ɔle sonla mɔɔ sulo Nyamenle a, yɛɛ ɔ nee ye sua nu amra amuala bɛsonle Nyamenle. Ɔ sa do Dwuuma ehyianvolɛma anwo zo, yɛɛ ɔnva ye nzɛlɛlɛ wɔ Nyamenle anyunlu ɔndo aze.

³ Kenle ko ewiazo kɛyɛ dɔne nsa ɔhɔle nzɛlɛlɛ ɛyɛlɛ la ɔnwunle ɛnyelɛzodeɛnwunlɛ. Nyamenle soanvolɛ ragyinlanle ɔ nyunlu ɛkɛ na ɔvɛlɛle ye kɛ, “Kɔnileɛse!”

⁴ Ɔnwunle Nyamenle soanvolɛ ne la, ɛzulolɛ hanle ye na ɔhanle kɛ, “Yɛmenle, duzu edwɛkɛ ɔ?” Nyamenle soanvolɛ ne buale ye kɛ, “Nyamenle ɛde wɔ nzɛlɛlɛ na yenwu wɔ ahunlunyele gyima ne amuala.

⁵ Yemɔti soa maa bɛhɔ Dwɔpa bɛhɔva nrenya bie mɔɔ bɛfɛlɛ ye Saemɔn Pita la.

⁶ Ɔde nrenya bie mɔɔ yɛ nwoma nwo gyima mɔɔ bɛfɛlɛ ye Saemɔn la sua nu, wɔ nyevile ne anloa ɛkɛ ne ala.”

⁷ Mɔɔ Nyamenle soanvolɛ ne wiele la ɔhɔle. Kɔnileɛse vɛlɛle ye sua nu ɛkɛ ne ngɛkɛlɛ ne mɔ nwiɔ yɛɛ sogyanli ko mɔɔ sulo Nyamenle na ɔboka menli mɔɔ sinza ɔdaye Kɔnileɛse la anwo la,

⁸ ɔhanle mɔɔ ɛzi la amuala ɔhilele bɛ na ɔzoanle bɛ wɔ Dwɔpa.

⁹ Aleɛ hyenle, na mɔɔ bɛlua adenle zo na ɔka ekyii bɛdwu Dwɔpa la, ɛnee Pita ɔdaye yevo yehɔ sua ne mɔɔ ɔwɔ nu la ati zo anwuma kɛ ɔkayɛ ewiazo nzɛlɛlɛ.

¹⁰ Ɛhɔne hunle ye na mɔɔ ɔlɛkendɛ aleɛ mɔɔ bɛlɛto bɛamaa ye la, ɔ nye hɔle dɔɔnwo na ɔnwunle

¹¹ kɛ anwuma ɛbuke, na bɛlɛdwula debie bie mɔɔ le kɛ ɛdanlɛ mɔɔ bɛsosɔ ɔ nloa nna ne amuala anu la aze.

¹² Wɔ deɛ ne anu, ɔnwunle nane, nwɔlɛ, yɛɛ nloma ngakyile dɔɔnwo.

¹³ Na ɛnelɛ bie zele ye kɛ, “Pita, dwazo na ku bie di!”

¹⁴ Na Pita zele kɛ, “Kyɛkyɛ, Awulae, debie mɔɔ nwolɛ ɛnde na ɔle kyibadeɛ la, metɛdile bie ɛlɛ.”

¹⁵ Ɛnelɛ ne eza zele ye kɛ, “Debie mɔɔ Nyamenle ɛde nwolɛ la, mmaka kɛ nwolɛ ɛnde.”

¹⁶ Ɛhye zile fane nsa, na bɛhwenle deɛ ne bɛhɔle anwuma.

¹⁷ Mɔɔ Pita ɛlɛdwenle mɔɔ yenwu ye la anwo la, ɛnee menli mɔɔ Kɔnileɛse zoanle bɛ la noko ɛbizebiza dedee bɛnwu Saemɔn sua nu na bɛra, bɛwɔ anuhɔlɛ ɛkɛ ne.

¹⁸ Bɛvɛlɛle na bɛbizale kɛ, “Ɛyɛvolɛ bie wɔ ɛke mɔɔ bɛfɛlɛ ye Saemɔn Pita ɔ?”

¹⁹ Mɔɔ Pita gua zolɛ tɛdwenle mɔɔ yenwu ye la anwo na ɔkulo kɛ ɔte ɔ bo la, Nyamenle Sunsum ne zele ye kɛ, “Nea, menli nsa ɛra ɛke bakpondɛ wɔ.

²⁰ Yemɔti dwu aze kɔyia bɛ; mmadwenle nwolɛ, ɛ nee bɛ ɛhɔ. Ɔluakɛ medame a mezoa bɛ a.”

²¹ Pita dwule aze na ɔzele bɛ kɛ, “Ahenle mɔɔ bɛkpondɛ ye la a le medame. Na bɛ ɛdialɛ nu ɛ?”

²² Bɛbuale ye kɛ, “Safohyenle Kɔnileɛse a ɛzoa yɛ a. Ɔle sonlakpalɛ somaa, ɔsulo Nyamenle, yɛɛ Dwuuma amuala bu ye bie kpalɛ. Ɛkenle Nyamenle soanvolɛ bie zele ye kɛ ɔrava wɔ ɔhɔ ye sua nu, na ɔdie mɔɔ ɛlɛ ye ɛka wɔahile ye la.”

²³ Na Pita vale bɛ hɔle sua nu na ɔmanle bɛ ɛleka bɛlale. Aleɛ hyenle la ɔboɔboale ɔ nwo na ɔ nee bɛ hɔle; diedima bie mɔ mɔɔ wɔ Dwɔpa la nee ye hɔle.

²⁴ Bɛzile nu la ye alehyenlɛ nu yɛɛ bɛdwule Sizalia a, na bɛhɔdole kɛ Kɔnileɛse nee ye sua nu amra, nee ɔ gɔnwo mɔ mɔɔ yedo ɛsalɛ yevɛlɛ bɛ la ɛwie yia na bɛlɛkendɛ ye.

²⁵ Kɔnileɛse yiale Pita wɔ anlenkɛ ne anloa, ɔdule ɔdɔle ɔ gyakɛ anu na ɔzonlenle ye.

²⁶ Na Pita manle ɔdwazole na ɔzele ye kɛ, “Dwazo na medame mele sonla.”

²⁷ Mɔɔ Pita anloa wɔ zolɛ ɔlɛtendɛ yeahile Kɔnileɛse la, bɛhɔwolole sua ne anu, na ɔnwunle kɛ menli dɔɔnwo kpalɛ ɛrayia.

²⁸ Na ɔzele bɛ kɛ, “Bɛdabɛ bɛze ye wienyi kɛ wɔ Dwuu ɛzonlenlɛ ne anu, bɛmmaa adenle bɛmmaa yɛ nee bɛdabɛ mɔɔ bɛnle Dwuuma la ɛnfonla. Noko Nyamenle ɛye ɛhile me kɛ memmabu awie biala kɛ ɔ nwo ɛnde.

²⁹ Ɛhye ati yɛɛ bɛzoanle kɛ bɛrava me la meandwenlehwenle me bo aze na mera a. Yemɔti mebiza bɛ kɛ duzu ati a bɛravale me a?”

³⁰ Kɔnileɛse zele ye kɛ, “Ɛnɛ le kenle nna, kɛyɛ bekezɛ ala, ɛnee melɛyɛ ewiazo dɔne nsa nzɛlɛlɛ wɔ me sua ye anu, na nrenya bie mɔɔ wula tɛladeɛ fufule la ragyinlanle me nyunlu ɛkɛ

³¹ na ɔzele me kɛ, ‘Kɔnileɛse! Wɔ nzɛlɛlɛ ɛdwu Nyamenle anyunlu na yenwu wɔ ahunlunyele gyima ne amuala.

³² Yemɔti soa awie wɔ Dwɔpa maa ɔhɔva nrenya ne mɔɔ bɛfɛlɛ ye Saemɔn Pita la. Ɔ nee Saemɔn mɔɔ yɛ nwoma nwo gyima la a de a, wɔ nyevilenloa ɛkɛ.’

³³ Ɛhye ati a menzoanle kɛ bɛrava wɔ a, yɛɛ ɛdawɔ noko wɔandwenlehwenle ɛ bo aze na wɔra a. Yemɔti yɛ muala yɛyia wɔ Nyamenle anyunlu ɛke kɛ yɛtie mɔɔ Awulae ɛva ɛmaa wɔ kɛ ɛraha ɛhile yɛ la.”

Pita tendɛ ahile menli ne

³⁴ Na Pita zele bɛ kɛ, “Nɔhalɛ, menwu ye wienyi kɛ Nyamenle bu menli kɔsɔɔti kɛ bɛsɛ.

³⁵ Awie biala mɔɔ sulo ye na ɔdi boɛ la ɔdie ye ɔto nu, yɛɛ ɔnnea ɛleka mɔɔ ɔvi nee maanle holɛ ko mɔɔ ɔvi nu la.

³⁶ Bɛdabɛ bɛze kɛ ɔzile mɔɔ ɔlua Gyisɛse Kelaese, mɔɔ le menli kɔsɔɔti Awulae la anwo zo Nyamenle vale anzonudwolɛ nwo Edwɛkpa ne rɛlɛle Yizilayɛma la.

³⁷ Bɛbɔle Edwɛkpa ɛhye nolobɔlɛ bo wɔ Galeli, na bɛbɔle ye Dwudiya amuala wɔ mekɛ mɔɔ Dwɔn bɔle ɛzɔnenlɛ nwo nolo wiele la.

³⁸ Bɛze Gyisɛse mɔɔ vi Nazalɛte la anwo edwɛkɛ nee kɛ Nyamenle zile vale Sunsum Nwuanzanwuanza ne wulale ye na ɔmanle ye tumi la amuala. Gyisɛse kpɔsale ɛleka dɔɔnwo yɛle ahunlunyele gyima, na ɔyɛle bɛdabɛ mɔɔ Abɔnsam ɛlɛfa ye tumi ne agyegye bɛ la ayile, ɔluakɛ Nyamenle nee ye lua.

³⁹ Yɛdi mɔɔ ɔyɛle ye wɔ Yizilayɛ maanle ne anu nee Gyɛlusalɛm la amuala anwo daselɛ. Bɛbɔle ye meanubaka nu bɛhunle ye.

⁴⁰ Na ye kenle nsa ne azo Nyamenle dwazole ye vile mɔwuamra anu na ɔmanle ɔyele ɔ nwo ɔhilele

⁴¹ yɛmɛ mɔɔ Nyamenle ɛye yɛ kɛ yɛli daselɛ la. Yɛ nee ye lile, nlonle, wɔ mekɛ mɔɔ ɔdwazole ɔvile ewule nu la,

⁴² na ɔzele yɛ kɛ yɛha ɔ nwo Edwɛkpa ne yɛhile menli kɔsɔɔti, na yɛli ɔ nwo daselɛ kɛ yemɔ yɛɛ Nyamenle ɛyɛ ye mɔwuamra nee anyewɔzoamra ndɛnebuavolɛ a.

⁴³ Nyamenle kpɔmanvolɛma amuala ka ɔ nwo edwɛkɛ kɛ awie biala mɔɔ kɛlie ye kɛli la, ɔlua ye duma ne tumi zo bɛkɛva ye ɛtane bɛkɛhyɛ ye.”

Menli mɔɔ ɛnle Dwuuma la nyianle Sunsum Nwuanzanwuanza ne

⁴⁴ Mɔɔ Pita anloa wɔ zolɛ ɛlɛtendɛ la, Sunsum Nwuanzanwuanza ne rawolole bɛdabɛ mɔɔ bɛlɛtie edwɛkɛ ne la.

⁴⁵ Ɛhye yɛle Dwuuma mɔɔ ɛlie Edwɛkpa ne ɛli na bɛ nee Pita vi Dwɔpa rale la azibɛnwo kpole kɛ Nyamenle Sunsum Nwuanzanwuanza ahyɛlɛdeɛ ne ɛra menli mɔɔ ɛnle Dwuuma la noko anwo zo a.

⁴⁶ Ɔluakɛ bɛdele kɛ ɛnee bɛlɛka ɛdendɛlɛ ngakyile bɛahanvo Nyamenle ye bedevinli mɔɔ ɔde la. Na Pita manle ɔ ne zo zele kɛ,

⁴⁷ “Menli ɛhye mɔ ɛnyia Sunsum Nwuanzanwuanza ne, kɛmɔ yɛnyianle ye ala la. Anzɛɛ awie kɛhola kɛze kɛ ɔnle kɛ yɛfa nzule yɛsɔne bɛ ɔ?”

⁴⁸ Yemɔti ɔmanle bɛzɔnenle bɛ wɔ Gyisɛse Kelaese duma nu. Na bɛzɛlɛle ye bɛ nee ye dɛnlanle mekɛ ekyi.