2 Tɛs 3 - BAEBOLO ANZƐƐ BULUKU NWUANZANWUANZA

Bɛzɛlɛ bɛmaa yɛ

¹ Mediema, edwɛkɛ mɔɔ li amozi la a le kɛ, bɛzɛlɛ bɛmaa yɛ kɛ Awulae edwɛkɛ ne kɛdɛlɛ ndɛndɛ na ɔkɛli konim, kɛmɔ ɔyɛle ye wɔ bɛ nu la.

² Bɛzɛlɛ kɛ Nyamenle kɛlie yɛ kɛvi menli munzule atisesebɛma asa anu; ɔluakɛ tɛ menli ne amuala a die edwɛkɛ ne di a.

³ Bɛkola bɛfa bɛ rɛle bɛwula Awulae anu. Ɔbamaa bɛ nwo ayɛ se na yealie bɛ gyɛlɛɛnye yeavi Ɛtanenli ne asa anu.

⁴ Awulae ɛmaa yɛ adwenle ɛzi pi wɔ bɛ nwo, yemɔti yɛze kɛ bɛlɛyɛ mɔɔ yɛhanle yɛhilele bɛ la, na eza bɛbahɔ zolɛ bɛayɛ ye zɔhane dahuu.

⁵ Yɛsɛlɛ kɛ Awulae ɛha bɛ ahonle ɛmaa bɛnyia Nyamenle ɛhulolɛ ne anwo ndelebɛbo kpalɛ na bɛgyinla kpundii wɔ Kelaese anwo ngilehilelɛ ne anu.

Gyimayɛlɛ nwo ɛzonlelilɛ

⁶ Mediema, yɛlua Awulae Gyisɛse Kelaese duma nu, yɛka yɛahile bɛ kɛ bɛhwe bɛ nwo bɛvi mediema mɔɔ ɛlɛyɛ mgbovonle na bɛngulo kɛ bɛdi folɛ mɔɔ yɛdule bɛ la azo la anwo.

⁷ Bɛdabɛ bɛze kɛ ɔwɔ kɛ bɛyɛ kɛ mɔɔ yɛyɛle la. Yɛanyɛ mgbovonle wɔ mekɛ mɔɔ yɛ nee bɛ de la.

⁸ Yɛanli awie biala debie mɔɔ yɛandua a. Yɛyɛle gyima, yɛhwinle yɛ ti anwo alehyenlɛ nee aledwolɛ, amaa yɛanyɛ kpomgbolo yɛamkpolo awie biala akɔme.

⁹ Tɛ kɛ asɛɛ yɛnlɛ adenle kɛ yɛbiza awie debie ɔ, na yɛyɛle ye zɔhane amaa bɛdabɛ noko bɛanlea zolɛ bɛayɛ bie.

¹⁰ Mɔɔ yɛwɔ bɛ nwo lɔ la, ɛnee yɛta yɛka yɛkile bɛ kɛ, “Mɔɔ ɛngulo kɛ ɔyɛ gyima la, ɔnle kɛ ɔdi aleɛ.”

¹¹ Yɛka ɛhye ɔboalekɛ yɛde kɛ bɛ bie mɔ ɛlɛbɔ mgbovonle ɛbɛla, mɔɔ bɛnyɛ ɛhwee kɛ awie mɔ edwɛkɛ nu yɛɛ bɛyɛ ye nwotonlonwotonlo a.

¹² Yɛka yɛahile menli mɔɔ le zɛhae la kɛ yɛlua Awulae Gyisɛse Kelaese duma nu, yɛbɔ bɛ kɔkɔ anzɛɛ yɛkakye bɛ kɛ, bɛbɔ ɛbɛla mɔɔ maa anzonudwolɛ la na bɛyɛ gyima mɔɔ kɛmaa bɛ sa kɛhɔ bɛ nloa dahuu la.

¹³ Mediema, bɛmmagyakyi kpalɛyɛlɛ.

¹⁴ Saa awie wɔ ɛkɛ ne mɔɔ ɔnrɛli mɔɔ yɛhɛlɛ ye wɔ kɛlata ɛhye anu la azo a, bɛmɛ bɛyɛ ahenle zɔhane nzonlɛ, bɛmmayɛ ye ɛhwee, na ɔdaye ɔ ngome ɔ nyunlu bagua aze.

¹⁵ Bɛmmayɛ ye kɛ ɔle kpɔvolɛ; bɛbɔ ye kɔkɔ kɛ adiema.

Folɛdulɛ mɔɔ li amozi

¹⁶ Yɛsɛlɛ kɛ Awulae mumua ne, mɔɔ le anzonudwolɛ maavolɛ la ɛmaa bɛ nzo nu ɛdwo bɛ mekɛ biala nee adenle biala anu. Awulae nee bɛ ɛdɛnla.

¹⁷ Medame Pɔɔlo, me sa anloa ɛ. Mebiza bɛ ahye. Kɛ medwula me kɛlata biala mɔɔ menwɔhɛlɛ la ɛne; kɛ mekɛlɛ ye ala la ɛne.

¹⁸ Yɛ Awulae Gyisɛse Kelaese ɛlo bɛ na ɔ nee bɛ ɛdɛnla.