2 Tem 1 - BAEBOLO ANZƐƐ BULUKU NWUANZANWUANZA

¹ Medame Pɔɔlo, mɔɔ ɔlua Nyamenle ɛhulolɛ zo merayɛ Kelaese Gyisɛse ɛzoanvolɛ, na yezoa me kɛ membɔ ngoane ne mɔɔ Kelaese ati bɛvale bɛbɔle yɛ ɛwɔkɛ la nolo la, yɛɛ melɛkɛlɛ kɛlata ɛhye a.

² Mefa meahɔmaa me ra Temɔte mɔɔ la me ahonle nwo la. Nyamenle Selɛ ne nee yɛ Awulae Kelaese Gyisɛse ɛlo wɔ, ɔnwu wɔ anwunvɔne na ɔmaa wɔ anzonudwolɛ.

Moyɛlɛ nee akɛnrazilɛ

³ Meyɛ Nyamenle ne mɔɔ mesonle ye nɔhalɛ nu, kɛmɔ me nlenya mɔ yɛle la mo kɛ mekakye wɔ wɔ me nzɛlɛlɛ nu alehyenlɛ nee aledwolɛ biala a.

⁴ Kɛmɔ mekakye monle mɔɔ ɛhwinle la ati, me nwo dɔ wɔ nɔɔzo nee ewiazo amuala, na me kunlu a anrɛɛ menwu wɔ, amaa me nye alie.

⁵ Mekakye nɔhalɛ diedi ne mɔɔ ɛlɛ ye, diedi ne mɔɔ ɛnee ɛ nla Loyese nee ɛ nli Yunaesi lɛ ye la bie, na medie medi kɛ ɛdawɔ noko ɛlɛ zɔhane diedi ne.

⁶ Zɔhane ati meka meahile wɔ kɛ fa ahyɛlɛdeɛ ne mɔɔ Nyamenle manle wɔ, wɔ mekɛ mɔɔ menvale me sa menguale ɛ ti zo la yɛ gyima.

⁷ Ɔluakɛ Nyamenle ammaa yɛ sunsum mɔɔ le foanvoanle a; Nyamenle manle yɛ Sunsum mɔɔ lɛ tumi nee ɛhulolɛ na ɔmaa yɛkola yɛkomo yɛ nwo zo la.

⁸ Mmamaa Awulae anwo daselɛlilɛ yɛ wɔ nyiane; yɛɛ mmamaa medame noko mɔɔ Kelaese ati mela efiade la me nwo yɛ wɔ nyiane. Ɛdawɔ dua anwosesebɛ ne mɔɔ Nyamenle ɛva ɛmaa wɔ la azo nwu Edwɛkpa ne anwo amaneɛ ne bie.

⁹ Ɔliele yɛ ngoane na ɔvɛlɛle yɛ kɛ yɛrayɛ ye menli, tɛ yɛ gyima mɔɔ yɛyɛ la ati ɔ, na ɔlua ɔdaye ye bodane nee ye ɛlolɛ ti. Ɔluale Kelaese Gyisɛse anwo zo ɔvale ɛlolɛ ɛhye ɔmanle yɛ ɔvi aloamɔleɛ,

¹⁰ yɛɛ ɛnɛ bɛlua yɛ ngoanedievolɛ Kelaese Gyisɛse ɛralɛ ne ati bɛla ye ali a. Ɔpɛle ewule tumi ne anu na ɔluale Edwɛkpa ne azo ɔlale ngoane mɔɔ ɛnlɛ awieleɛ la ali ɔhilele yɛ.

¹¹ Edwɛkpa ɛhye yɛɛ Nyamenle ɛyɛ kɛ membɔ ye nolo, menyɛ ɛzoanvolɛ na mengilehile a.

¹² Zɔhane ati yɛɛ menwu amaneɛ ɛhye mɔ a. Noko ɔnyɛ me nyiane, ɔluakɛ meze mɔɔ meva me rɛle mewula ye nu la, na medie medi kɛ ɔkɛhola ɔkɛzie mɔɔ meva mewula ɔ sa nu la gyɛlɛɛnye ɔkɛhɔkpula Awulae Kenle ne.

¹³ Sɔ nɔhalɛ ne mɔɔ ɛdele ɛvile me ɛkɛ ne la anu boɛ, fa yɛ ndonwo di zo, na tɛnla diedi nee ɛhulolɛ ne mɔɔ Kelaese Gyisɛse ati ɔle yɛ ɛdeɛ la anu.

¹⁴ Sɔ nɔhalɛ ne mɔɔ ɔlua Sunsum Nwuanzanwuanza ne mɔɔ wɔ yɛ nu la tumi zo bɛva bɛwula ɛ sa nu la anu boɛ.

¹⁵ Ɛze kɛ awie biala mɔɔ wɔ Ehyea maanzinli ne anu la ɛnriandi me; Fegyɛlɛse nee Hɛmɔgyɛnize bɛdabɛ bɛboka bɛ.

¹⁶ Awulae ɛnwu Onɛsefɔlɛse awuke nu amra anwunvɔne, ɔboalekɛ ɔkyekyele me rɛle mekɛ dɔɔnwo ne ala. Yeanyɛ ye nyiane kɛ mela efiade a.

¹⁷ Ɔdwule Wulomu ala la yɛɛ ɔbɔle ɔ bo kɛ ɔkpondɛ me a, na ɔkpondɛle me toonwo ɔnwunle me.

¹⁸ Awulae ɛnwu ye anwunvɔne wɔ Awulae Kenle ne anu! Ɛdawɔ ɛze dɔɔnwo mɔɔ ɔyɛle ɔmanle me wɔ Ɛfɛsɛse a.