2 Sam 6 - BAEBOLO ANZƐƐ BULUKU NWUANZANWUANZA

Bɛva Ngyekyeleɛ Ɛlɛka ne bɛhɔ Gyɛlusalɛm

¹ Eza Devidi boɔboale Yizilayɛ ɛlɔnema mɔɔ ze konle nye zo kpalɛ la apenle ngoko abulasa anloa.

² Ɔ nee bɛ hɔle Beeyala mɔɔ wɔ Dwuda la kɛ bɛkava Nyamenle Ngyekyeleɛ Ɛlɛka ne mɔɔ Tumivolɛ Ɛdɛnkɛma duma a la zo, mɔɔ ye belemgbunli ebia a gyi abɔdeɛ ne mɔ mɔɔ lɛ ndɛbalɛ la azo la bɛara.

³ Bɛyele Ɛlɛka ne wɔ Abenadabe sua nu wɔ boka ne azo na bɛvale bɛziele ehwili fofolɛ zo. Abenadabe amra Ɛza nee Ahayo a ɛnee ɛlɛka ehwili ne mɔɔ Ɛlɛka ne gyi zolɛ la a.

⁴ Ahayo a li Ɛlɛka ne anyunlu a.

⁵ Na Devidi nee Yizilayɛma kɔsɔɔti bubule nya vale bɛ anwosesebɛ dole edwɛne, zile agole, bɔle getaa, akɛya, aweɛne, sɔnwosɔnwo yɛɛ ahenle yele Ɛdɛnkɛma ayɛlɛ.

⁶ Mɔɔ bɛradwule Neekɔn ma ɛwozolɛ ɛleka ne la, mgbɔnwɔ ne mɔ mɔɔ ehwili ne henda bɛ la agyakɛ wuanenle bɛ na Ɛza dendenle ɔ sa zɔle Nyamenle Ngyekyeleɛ Ɛlɛka ne anu.

⁷ Ɛdɛnkɛma vale Ɛza anwo ɛya kpole na ɔhunle ye ɛkɛ ne ala, ɔboalekɛ ɔvale ɔ sa ɔhanle Ngyekyeleɛ Ɛlɛka ne. Ɛza wule lale Ɛlɛka ne anwo.

⁸ Devidi ahonle futule, ɔboalekɛ Ɛdɛnkɛma ɛva ɛya ɛdua Ɛza kakɛ; na toonwo mɔɔ yeradwu ɛnɛ la bɛfɛlɛ ɛleka zɔhane “Ɛza Ndeanlɛ Ɛleka.”

⁹ Na kenle ko ne Devidi zulole Ɛdɛnkɛma, na ɔhanle kɛ, “Kɛ ɔkɛyɛ na Ɛdɛnkɛma Ngyekyeleɛ Ɛlɛka ne adwu me nwo ɛke ɛ?”

¹⁰ Yemɔti Devidi angulo kɛ ɔkɛva Ɛdɛnkɛma Ngyekyeleɛ Ɛlɛka ne ɔkɛhɔ Devidi Suakpole zo (Gyɛlusalɛm), na ɔvale ɔhɔle Obɛde Yidɔm mɔɔ vi Gate la sua nu.

¹¹ Na Ɛdɛnkɛma Ngyekyeleɛ Ɛlɛka ne woale Obɛde Yidɔm sua nu siane nsa; Ɛdɛnkɛma yilale Obɛde Yidɔm nee ye sua nu amra.

¹² Na bɛrahanle bɛhilele Belemgbunli Devidi kɛ, “Ɛdɛnkɛma ɛyila Obɛde Yidɔm, ye awuke nu amra nee debie biala mɔɔ ɔlɛ la, ɔboalekɛ Nyamenle Ngyekyeleɛ Ɛlɛka ne wɔ ye ɛkɛ.” Yemɔti Devidi vale fɛlɛkolilɛ hɔyele Nyamenle Ngyekyeleɛ Ɛlɛka ne vile Obɛde Yidɔm sua nu hɔle Devidi Suakpole zo.

¹³ Mɔɔ menli mɔɔ zo Ɛdɛnkɛma Ngyekyeleɛ Ɛlɛka ne la dule bɛ gyakɛ nsia la, Devidi manle bɛgyinlanle na ɔvale ɛnlankɛ nyinli nee ɛnlankɛ mɔɔ ɛhye kpalɛ la ɔbɔle azu ɔmanle Ɛdɛnkɛma.

¹⁴ Devidi wulale Nyamenlezonlenlɛ tɛladeɛ ne mɔɔ bɛfɛlɛ ye “Yifɔdo” la na ɔvale ye anwosesebɛ kɔsɔɔti ɔzile agole ɔwulale Ɛdɛnkɛma anyunlunyia.

¹⁵ Yemɔti Devidi nee Yizilayɛma kɔsɔɔti vale aweɛnebɔlɛ, edwɛnedolɛ, agolezilɛ nee fɛlɛkolilɛ vale Ɛdɛnkɛma Ngyekyeleɛ Ɛlɛka ne hɔle Devidi Suakpole zo.

¹⁶ Mɔɔ Ɛdɛnkɛma Ngyekyeleɛ Ɛlɛka ne dwule Devidi Suakpole zo la, Sɔɔlo ara raalɛ Maekale wulale ɔ ti nvɛnzɛlɛ ne anu nleanle. Ɔnwunle kɛ Belemgbunli Devidi ɛlɛdi wulupe si agole wɔ Ɛdɛnkɛma anyunlu; ye adwenle zɛkyele Devidi anwo na ye ahonle yele ye bɔkɔɔ.

¹⁷ Bɛvale Ɛdɛnkɛma Ngyekyeleɛ Ɛlɛka ne bɛraziele ɛleka mɔɔ ɛnee Devidi ɛziezie wɔ Ndanlɛ Sua ne anu ɛmaa ye la. Akee Devidi bɔle ɛyelalɛ nee anzonudwolɛ azu manle Ɛdɛnkɛma.

¹⁸ Ɔwiele azu ne bɔ la, ɔyilale menli ne mɔ wɔ Tumivolɛ Ɛdɛnkɛma duma nu.

¹⁹ Na ɔvale ahyɛlɛ ninyɛne ɔmanle Yizilayɛma kɔsɔɔti, mraalɛ nee mrenya. Ɔmanle awie biala kpanwo ko, nane ndondo sinli nee vanye ma welera ndɛlamoa ko. Akee awie biala hɔle sua nu.

²⁰ Nzinlii Devidi hɔle kɛ ɔkayila ye awuke nu amra, na Sɔɔlo ara raalɛ Maekale rayiale ye na ɔzele ye kɛ, “Yizilayɛ belemgbunli ne ɛlie duma kpole ɛmaa ɔ nwo ɛnɛ. Yeye ɔ nwo yehile ye sonvolɛma sonvolɛ mraalɛ anyiemgba nu bie kɛ koasea la.”

²¹ Na Devidi zele Maekale kɛ, “Menzile agole, menyele Ɛdɛnkɛma ne mɔɔ vale ɛ ze nee ye abusua ne ziele ahane, na ɔziele me ye menli Yizilayɛma belemgbunli la ayɛlɛ. Na mebahɔ zolɛ meazi agole meawula Ɛdɛnkɛma anyunlunyia dahuu.

²² Mebagua me nyunlu aze mɔɔ tɛla ɛhye bɔbɔ la meamaa ye. Wɔmɔ, ɛ nye zo a menzɔho ɛhwee, noko sonvolɛ mraalɛ mɔɔ ɛlɛdi bɛ edwɛkɛ la bawula me anyunlunyia kpalɛ kpalɛ.”

²³ Na Sɔɔlo ara raalɛ Maekale anwo ralɛ fee na yeawu.