2 Sam 5 - BAEBOLO ANZƐƐ BULUKU NWUANZANWUANZA

Devidi di Yizilayɛ nee Dwuda belemgbunli

¹ Akee Yizilayɛ mbusua ekpunli ekpunli ne mɔ kɔsɔɔti rale Devidi anwo ɛkɛ wɔ Hibulɔn razele ye kɛ, “Nea, yɛ muala yɛle menli ko.

² Tete ne mɔɔ ɛnee Sɔɔlo a di yɛ belemgbunli la, wɔmɔ yɛɛ ɛ nee yɛ hɔle ɛ nee yɛ rale a; na Ɛdɛnkɛma zele wɔ kɛ, ‘Ɛbayɛ kɛ mboaneneavolɛ la, wɔanlea me menli Yizilayɛma na wɔali bɛ belemgbunli.’ ”

³ Yemɔti Yizilayɛ mgbanyima ne mɔ kɔsɔɔti zile nu rale Devidi anwo ɛkɛ wɔ Hibulɔn. Belemgbunli Devidi nee bɛ yɛle ngyekyeleɛ wɔ Ɛdɛnkɛma anyunlu na bɛziele ye Yizilayɛ belemgbunli.

⁴ Devidi lile ɛvolɛ abulasa la yɛɛ ɔralile belemgbunli a, na ɔziele maanle ne ɛvolɛ abulanla.

⁵ Ɔdɛnlanle Hibulɔn ɔziele Dwuda ɛvolɛ nsuu siane nsia, yɛɛ ɔdɛnlanle Gyɛlusalɛm ɔziele Yizilayɛ nee Dwuda maanle ne amuala ɛvolɛ abulasa nee nsa.

⁶ Belemgbunli Devidi nee ye ɛlɔnema hɔtetale Gyɛlusalɛm. Gyibɛsema mɔɔ lɛ maanle ne la dwenlenle kɛ Devidi ɛnrɛhola suakpole ne anwo zo konim di, yemɔti bɛzele ye kɛ, “Ɛ gyakɛ ba ɛnrɛtia sua ye azo. Anyenzinliravolɛma nee abuburama a baha wɔ ado ɛbɔ nu a.”

⁷ (Noko Devidi vale Zayɔn suakpole ne aranemgbole ne na bɛvɛlɛle ye “Devidi Suakpole.”)

⁸ Kenle ko ne, Devidi zele ye menli ne kɛ, “Awie wɔ ɛke mɔɔ kyi Gyibɛsema tɛla me, mɔɔ kɛhola kɛhu bɛ ɔ? Ɛnee bɛva azɛlɛ bo adenle ne anu na bɛva konle bɛhɔdoa anyenzinliravolɛma nee abuburama ne mɔ mɔɔ Devidi kyi bɛ la.” (Ɛhye ati yɛɛ bɛse, “Anyenzinliravolɛma nee abuburama ɛnrɛhɔ Ɛdɛnkɛma sua nu” la.)

⁹ Devidi vale aranemgbole ne la ɔdɛnlanle nuhua na ɔvɛlɛle sua ne “Devidi Suakpole”. Devidi kyekyele suakpole ne yiale, ɔbɔle ye boka ne aduduleɛ ɛleka mɔɔ bɛdule ndɛtɛlɛ bɛduale ye kuma ne la.

¹⁰ Akee Devidi anwo yɛle ɛzulolɛ kpole kpalɛ, ɔboalekɛ Tumivolɛ Ɛdɛnkɛma Nyamenle ne nee ye lua.

¹¹ Taya Belemgbunli Helam zoanle menli wɔ Devidi anwo ɛkɛ. Ɔmanle kapentama nee suazilɛma vale sida mbaka nee awolɛ hɔzile sua manle ye.

¹² Akee Devidi nwunle ye wienyi kɛ Ɛdɛnkɛma ɛzie ye Yizilayɛ belemgbunli bɔkɔɔ, na ye menli Yizilayɛma ati yekpogya ye belemgbunlililɛ ne zo.

¹³ Devidi vi Hibulɔn rale Gyɛlusalɛm la, ɔgyale mraalɛ dɔɔnwo, eza ɔvale mgbɔnla dɔɔnwo na ɔwole mralɛ mrenya nee mralɛ mraalɛ dɔɔnwo.

¹⁴ Mralɛ mɔɔ ɔwole bɛ wɔ Gyɛlusalɛm la aluma ɛne: Hyamuwa, Hyɛbabe, Neetan, Sɔlɔmɔn,

¹⁵ Yebehaa, Yelaehyua, Nɛfɛge, Gyafaya,

¹⁶ Yilaehyama, Yilayada yɛɛ Yilefɛlɛte.

Filisitiama anwo zo konimlilɛ

¹⁷ Filisitiama dele kɛ bɛzie Devidi Yizilayɛ belemgbunli, yemɔti bɛ kɔsɔɔti bɛhɔle ye ɛhyelɛ. Devidi dele nwolɛ bie na ɔhɔle ye sua ne mɔɔ bɛbɔ nwolɛ bane la azo.

¹⁸ Filisitiama rale na bɛrakpondenle Relɛfeeyem bɔnza ne anu.

¹⁹ Devidi bizale Ɛdɛnkɛma kɛ, “Mengɔ mengɔteta Filisitiama ɔ? Ɛkɛye bɛ ɛkɛmaa me ɔ?” Ɛdɛnkɛma zele ye kɛ, “Kɔ na mebaye Filisitiama ne meamaa wɔali bɛ nwo zo konim.”

²⁰ Yemɔti Devidi hɔle Beeyale Pɛleezem na ɔlile Filisitiama anwo zo konim. Ɔzele kɛ, “Ɛdɛnkɛma ɛbɔ me kpɔvolɛma asande wɔ me nyunlu kɛ azule mɔɔ ɛyi ɛbu aze la.” Yemɔti bɛfɛlɛ ɛleka zɔhane Beeyale Pɛleezem.

²¹ Mɔɔ Filisitiama gua ɛbɔ nu la, bɛgyakyile bɛ mmonle ne mɔ bɛ nzi, na Devidi nee ye menli ne mɔ sesale hɔle.

²² Eza Filisitiama ziale rale rakpondenle Relɛfeeyem bɔnza ne anu bieko.

²³ Na Devidi bizale Ɛdɛnkɛma la, ɔzele ye kɛ, “Mmakɔ ɛ nyunlu; bu bɛ nzi, ɛleka mɔɔ nee ‘belesam’ mbaka ne mɔ anye bɔ zo la.

²⁴ Saa ɛte kilikili kɛ asɛɛ menli ɛlɛtia mbaka ne mɔ ati zo a, ɛnee kɔteta bɛ ɛ nee bɛ ɛho, ɔboalekɛ ɛnee Ɛdɛnkɛma ɛlumua ɛ nyunlu ɛhɔli Filisitiama anwo zo konim.”

²⁵ Na Devidi yɛle, kɛmɔ Ɛdɛnkɛma zele ye la na ɔbɔle ye Giba ɔhunle Filisitiama toonwo ɔhɔdwule Gizɛ.