2 Sam 2 - BAEBOLO ANZƐƐ BULUKU NWUANZANWUANZA

Bɛzie Devidi Dwuda belemgbunli

¹ Ɛhye anzi, Devidi bizale Ɛdɛnkɛma kɛ, “Mengɔ Dwuda azuamgbole ne mɔ bie azo ɔ?” Ɛdɛnkɛma zele ye kɛ, “Kɔ.” Devidi bizale kɛ, “Boni azo a mengɔ a?” Ɛdɛnkɛma buale ye kɛ, “Kɔ Hibulɔn.”

² Yemɔti Devidi nee ye mraalɛ nwiɔ ne, Ahenoam mɔɔ vi Gyɛzɛli yɛɛ Abegeli mɔɔ anrɛɛ Neebale mɔɔ vi Kamɛle mɔɔ ɛha ɛleka bie la gya ye la hɔle Hibulɔn.

³ Devidi vale ye ɛlɔnema ne, bɛ mraalɛ nee bɛ awuke nu amra kɔsɔɔti nee bɛ nwo ninyɛne, ɔ nee bɛ hɔle Hibulɔn.

⁴ Na Dwudama rale raziele Devidi belemgbunli. Devidi dele kɛ Gyeebɛhyema mɔɔ wɔ Geleade la ɛzie Sɔɔlo la,

⁵ ɔzoanle ɔmanle bɛhɔzele bɛ kɛ, “Ɛdɛnkɛma ɛyila bɛ kɛ bɛli nɔhalɛ ɛhye bɛmaa bɛ Belemgbunli Sɔɔlo na bɛzie ye a.

⁶ Ɛdɛnkɛma ɛhile ye ɛhulolɛ kpole ne nee ye kpalɛyɛlɛ ne wɔ bɛ nwo zo. Ɛhye mɔɔ bɛyɛ la ati, medame noko mebayɛ bɛ boɛ.

⁷ Bɛgyinla kpundii na bɛmia bɛ nwo. Bɛ Belemgbunli Sɔɔlo ɛwu, na Dwudama ɛzie me belemgbunli.”

Bɛzie Yehyebɔhyɛte Yizilayɛ belemgbunli

⁸ Nɛɛ ara nrenya Abenɛɛ mɔɔ nea Sɔɔlo ɛlɔnema ne anwo zo la ɛva Sɔɔlo ara nrenya Yehyebɔhyɛte ɛnriandi ɛhɔpɛ Azule Dwɔdan ne ɛhɔ Meehaneeyem;

⁹ na yehɔzie ye Geleade, Ahya, Gyɛzɛli, Yifelaem, Bɛngyaman nee Yizilayɛ maanle ne kɔsɔɔti belemgbunli.

¹⁰ Yehyebɔhyɛte lile ɛvolɛ abulanla la yɛɛ bɛziele ye Yizilayɛ belemgbunli a, na ɔziele maanle ne ɛvolɛ nwiɔ. Dwuda abusua ekpunli ne lile nɔhalɛ manle Devidi,

¹¹ na ɔdɛnlanle Hibulɔn ɔziele Dwuda ɛvolɛ nsuu nee foa.

Yizilayɛ nee Dwuda konle ne

¹² Nɛɛ ara Abenɛɛ nee Sɔɔlo ara Yehyebɔhyɛte mgbanyima ne mɔ vi Meehaneeyem hɔle Gebɛyɔn.

¹³ Dwowabe mɔɔ ɔ nli a le Zɛluaya la nee Devidi mgbanyima ne mɔ noko hɔyiale bɛ wɔ Gebɛyɔn nzubula ne azo na bɛdɛnlanle aze. Ekpunli ko wɔ nzubula ne anzi foa ko yɛɛ ekpunli ko noko wɔ ye foa ko.

¹⁴ Abenɛɛ zele Dwowabe kɛ, “Maa yɛmaa yɛ mgbavolɛ ne bie mɔ ɛraho ye menli nwiɔ nwiɔ, ko ɛvi wɔ ekpunli ne anu na ko noko ɛvi me ekpunli ye anu na yɛnlea.” Dwowabe buale kɛ, “Maa bɛrɛla.”

¹⁵ Yemɔti menli bulu nee nwiɔ ragyinlanle Yehyebɔhyɛte nee Bɛngyaman mbusua ne agyakɛ anu, yɛɛ menli bulu nee nwiɔ noko vi Devidi afoa nu vindele.

¹⁶ Bɛgyinlanle ye nwiɔ nwiɔ, ko biala nee ye sonla, na akee bɛbɔle ye zo. Ko biala zɔle ɔ gɔnwo ati na ɔvale ye konle dadeɛ ne ɔwɔle ɔ nvenle. Na bɛdabɛ menli abulanwiɔ nee nna ne, bɛgulule nu bɛguale aze bɛwule. Yemɔti Gebɛyɔn ɛleka zɔhane, bɛfɛlɛ ye “Dadeɛ Azɛlɛ.”

¹⁷ Kenle ko ne konle ne yɛle ɛzulolɛ. Devidi ɛlɔnema ne lile Abenɛɛ nee Yizilayɛ ɛlɔnema ne anwo zo konim.

¹⁸ Ɛnee Zɛluaya amra mrenya nsa ne, Dwowabe, Abehyae nee Asahɛle wɔ ɛkɛ ne. Asahɛle anwo yɛ ndɛ tɛla ɛhoayelɛ nu kɛtɛboɛ.

¹⁹ Asahɛle voanle Abenɛɛ ndinlizo, yeando ɔ nye bɛne anzɛɛ fema.

²⁰ Abenɛɛ dole ɔ nye ɔ nzi na ɔhanle kɛ, “Asahɛle, wɔmɔ ɛhye ɔ?” Na ɔbuale ye kɛ, “Ɛhɛe, medame ɛ!”

²¹ Abenɛɛ zele ye kɛ, “Mmafoa me ko; to ɛ nye fema anzɛɛ bɛne zo na kye ɛlɔnema ne mɔ ko na sa ye die debie biala mɔɔ ɔlɛ la.” Noko Asahɛle angyakyi ye ɛvoanlɛ.

²² Abenɛɛ eza zele Asahɛle kɛ, “Mmafoa me ko; duzu ati a ɛgyegye me wɔamaa meahu wɔ a? Kɛ ɔkɛyɛ na meahola ɛ diema Dwowabe anyunlu nea ɛ?”

²³ Noko Asahɛle amkponle na ɔvoanle Abenɛɛ ndinlizo. Abenɛɛ dole ye atwɛ ne abo ne ɔ nzi wɔle Asahɛle akunlu manle atwɛ ne vindele ɔ nzi. Asahɛle dɔle aze na ɔwule. Menli mɔɔ rale ɛleka mɔɔ Asahɛle honle dɔle la gyinlanle ɛkɛ ne koonwu.

²⁴ Na Dwowabe nee Abehyae bɛdabɛ bɛbelele bɛzile Abenɛɛ zo, na mɔɔ ɔka ekyii na sɛnzɛne ne adɔ la, bɛdwule Amaa boka ne mɔɔ wɔ Gaya aduduleɛ wɔ Gebɛyɔn fienemgbole nu adenle zo la azo.

²⁵ Bɛngyaman abusua ekpunli ne anu amra boɔboale bɛ nloa zuanle Abenɛɛ anzi, bɛyɛle ɛlɔne ko na bɛhɔvole boka bie azo.

²⁶ Akee Abenɛɛ deanle nu vɛlɛle Dwowabe na ɔzele ye kɛ, “Anzɛɛ ɔnle kɛ konle dadeɛ ne da koonwu ɔ? Anzɛɛ ɛnze kɛ konle nzi lɛ ɛkpɔlɛ ɔ? Kenlenzu yɛɛ ɛkɛmaa wɔ ɛlɔnema ne kɛgyakyi bɛ mediema ne mɔ mgbaliko ɛdulɛ a?”

²⁷ Na Dwowabe zele kɛ, “Meka tease Nyamenle ne kɛ, saa wɔanga ɛ nloa edwɛkɛ a anrɛɛ me ɛlɔnema ne badu mediema ne mɔ mgbaliko toonwo ɛhyema nwonlomɔ.”

²⁸ Akee Dwowabe wule aweɛne tendenle nu na ɛlɔnema ne gyakyile Yizilayɛma mgbaliko ɛdulɛ yɛɛ bɛ nee bɛ ango bieko.

²⁹ Aledwolɛ ne kɔsɔɔti Abenɛɛ nee ye ɛlɔnema ne diale vale Dwɔdan Bɔnza hɔpɛle Azule Dwɔdan ne. Alehyenlɛ ne anu eza bɛdiale toonwo na nzinlii bɛradwule Meehaneeyem.

³⁰ Dwowabe gyakyile Abenɛɛ ɛvoanlɛ, na mɔɔ bɛboɔboale menli ne anloa la, saa ɛye Asahɛle nu a, ɛnee Devidi ɛlɔnema ne mɔɔ ɛmboka nwo la le bulu nee ngɔnla.

³¹ Na ɛnee Devidi ɛlɔnema ne ɛhu Abenɛɛ ɛlɔnema mɔɔ vi Bɛngyaman abusua ekpunli ne anu la ɛya nsa abulasia.

³² Dwowabe nee ɔ sa zo ne mɔ vale Asahɛle funli ne na bɛziele ye wɔ ɔ ze nla ne anu wɔ Bɛtelɛhɛm. Bɛdiale nɔe ne toonwo mɔɔ aleɛ kahye la ɛnee bɛwɔ Hibulɔn.