2 Sam 10 - BAEBOLO ANZƐƐ BULUKU NWUANZANWUANZA

Devidi di Amɔnoma nee Seleama anwo zo konim

¹ Nzinlii Amɔnoma belemgbunli ne wule, na ɔ ra nrenya Heenɛn lile ye agya.

² Belemgbunli Devidi zele kɛ, “Me nee Neehahye ara nrenya Heenɛn badila nɔhalɛ agɔnwolɛ, kɛmɔ ɔ ze nee me dilale la.” Yemɔti Devidi zoanle menli manle bɛhɔyɛle ye gyakɔ nee ɔ ze. Mɔɔ Devidi soanvolɛma ne dwule Amɔn maanle nu la,

³ Amɔn mgbanyima ne hanle hilele Heenɛn kɛ, “Kabezɛ ɛdwenle kɛ ɛ ze ewule ne ati a Devidi ɛzoa menli kɛ bɛrayɛ wɔ gyakɔ a? Ɔnle nɔhalɛ fee. Yezoa bɛ kɛ bɛranlea kɛ suakpole ye si to kɔ la amaa yearaho yeali yɛ nwo zo konim na yeava maanle ne.”

⁴ Yemɔti Heenɛn hyele Devidi soanvolɛma ne mɔ, ɔkpale ko biala akɛsa ebule foa, ɔpɛle ko biala tɛladeɛ ne azo wɔ ɔ nze zo na akee ɔvoanle bɛ ɔmanle bɛhɔle.

⁵ Nyiane kpole hunle soanvolɛma ne mɔ. Mɔɔ bɛrabɔle Devidi amaneɛ la, ɔmanle bɛhɔyiale bɛ adenle. Na belemgbunli ne zele bɛ kɛ, “Bɛdɛnla Gyɛleko ɛkɛ toonwo kɔkpula mekɛ mɔɔ bɛ kɛsa ne mɔ kɛvi la na bɛazia bɛara.”

⁶ Amɔnoma ne nwunle kɛ bɛha Devidi ɛya. Yemɔti bɛhɔbɔle Selea ɛlɔnema mɔɔ wɔ Bɛtelihɔbo nee Zoba la apenle ngoko abulanwiɔ, ɛlɔnema apenle ngoko bulu nee nwiɔ wɔ Tɔɔbo, yɛɛ akee Meeyaka belemgbunli nee ye ɛlɔnema apenle ko ɛkpa.

⁷ Devidi dele nwolɛ bie, yemɔti ɔmanle Dwowabe nee ye ɛlɔnema mɔɔ ze konle nye zo kpalɛ la hɔyiale bɛ.

⁸ Amɔnoma vindele rayiale bɛ wɔ suakpole Relaba anlenkɛ kpole ne anloa. Akee Seleama mɔɔ vi Zoba nee Rilihɔbo nee menli mɔɔ vi Tɔɔbo nee Meeyaka la gyinlanle ye ekpunli ekpunli wɔ fienemgbole ne anu.

⁹ Mɔɔ Dwowabe nwunle kɛ bɛhyehyɛ mɔɔ ɛlɔnema babu ɔ nyunlu nee ɔ nzi la, ɔyele Yizilayɛ ɛlɔnema kpalɛ ne bie mɔ na ɔvale bɛ ɔhɔzɔle Seleama ne mɔ anloa.

¹⁰ Ɔvale ɛlɔnema ne mɔɔ hale la ɔwulale ɔ diema Abehyae asa anu. Ɔdaye noko ɔvale bɛ ɔhɔzɔle Amɔnoma anloa.

¹¹ Akee ɔzele kɛ, “Saa ɛnea na Seleama kpondɛ avo me nwo zo a, bɛla baboa me. Saa medame noko menwu kɛ Amɔnoma kpondɛ avo ɛ nwo zo a, mebara mearaboa wɔ.

¹² Si wɔ ahonle, maa yɛhile yɛ mrenya yɛmaa yɛ menli ne nee yɛ Nyamenle ne azuamgbole ne mɔ. Ɛdɛnkɛma ɛhulolɛ ɛyɛ ɛkɛ.”

¹³ Dwowabe nee ye ɛlɔnema ne hɔle bɛ nyunlu hɔtetale Seleama na bɛ muala bɛguale ɛbɔ nu.

¹⁴ Mɔɔ Amɔnoma nwunle kɛ Seleama ɛgua ɛbɔ nu la, bɛdabɛ noko bɛguale ndwɛlɛ aze wɔ Abehyae anyunlu, na bɛhɔnwenwenle suakpole ne azo. Na Dwowabe vi konle ne anloa ziale hɔle Gyɛlusalɛm.

¹⁵ Seleama nwunle kɛ Yizilayɛma ɛli bɛ nwo zo konim la, bɛboɔboale bɛ nloa.

¹⁶ Hadadizɛ zoanle manle bɛhɔvale Seleama mɔɔ wɔ Azule Yufileti aduduleɛ lɔ la bɛrale Hilam. Hyobake mɔɔ le Belemgbunli Hadadizɛ safohyenle kpanyinli la a lile bɛ ti nee bɛ rale a.

¹⁷ Mɔɔ Devidi dele la ɔboɔboale Yizilayɛ ɛlɔnema ne kɔsɔɔti anloa. Ɔpɛle Azule Dwɔdan ne na ɔzile nu ɔhɔle Hilam, ɛleka mɔɔ Seleama ɛboɔboa bɛ nloa kɛ bɛ nee ye ko la. Bɛvale konle ne bɛbɔle zolɛ,

¹⁸ na Seleama guale ye bɛ nzi. Devidi hunle Seleama ɛya nsuu mɔɔ ka konle ehwili la, menli mɔɔ ka mgbɔnwɔ la apenle ngoko abulanla na ɔbodale safohyenle kpanyinli Hyobake mɔɔ nea bɛ ɛlɔnema ne mɔ anwo zo la, na ɔwule ɛkɛ ne ala.

¹⁹ Na mɔɔ arelemgbunli mɔɔ ɛnee wɔ Hadadizɛ abo la nwunle kɛ Yizilayɛma ɛli bɛ nwo zo konim la, bɛ nee Yizilayɛma yɛle anzonudwolɛ ngyehyɛlɛ na bɛyɛle Yizilayɛma ngɛkɛlɛ. Seleama zulole, yemɔti bɛamboa Amɔnoma bieko.