2 Sam 1 - BAEBOLO ANZƐƐ BULUKU NWUANZANWUANZA

Devidi te Sɔɔlo ewule ne

¹ Sɔɔlo ewule ne anzi, Devidi hɔlile Amalɛkema anwo zo konim, ɔhunle bɛ bie mɔ dɔɔnwo kpalɛ na ɔziale ɔrale Zekelage ɔralile kenle nwiɔ wɔ ɛkɛ.

² Ye kenle nsa ne azo, nrenya bie vi Sɔɔlo konle azokoɛleɛ ne rale. Ɔkile ye nyane mɔɔ ɔlɛdi la, ɛnee yesuosua ye tɛladeɛ ne mɔɔ ɔwula la anu na yeva ndɛtɛlɛ yeyɛ ɔ ti zo. Ɔradwule Devidi anyunlu la, ɔdule ɔdɔle ɔ gyakɛ anu ɔbizale ye ahye.

³ Devidi bizale ye kɛ, “Ɛvi nienwu a wɔra a?” Nrenya ne buale ye kɛ, “Mevi Yizilayɛma azokoɛleɛ ne a menriandi mera a.”

⁴ Devidi bizale ye kɛ, “Kɛ konle ne zile wiele ye ɛ? Ka kile me.” Nrenya ne buale kɛ, “Yɛ ɛlɔnema ne ɛgua ɛbɔ nu, yɛɛ dɔɔnwo noko ɛho ɛdɔ. Sɔɔlo nee ɔ ra Dwɔnatan noko ɛwu.”

⁵ Devidi bizale kpavolɛ ne mɔɔ rabɔle amaneɛ ne la kɛ, “Kɛ ɛzile ɛnwunle kɛ Sɔɔlo nee ɔ ra Dwɔnatan ɛwu ɛ?”

⁶ Kpavolɛ ne buale kɛ, “Ɔrale ye kɛ ɛnee mewɔ Gelebowa Boka, na menwunle kɛ Sɔɔlo hisa ye atwɛ ne na kpɔvolɛma ne konle ehwili ne mɔ nee menli mɔɔ ka mgbɔnwɔ la ɛkpumgbu ye kpalɛ.

⁷ Ɔdole ɔ nye na ɔnwunle me la, ɔvɛlɛle me. Menzele ye kɛ, ‘Medame ɛ, mera.’

⁸ Ɔbizale me kɛ, ‘Na ɛdawɔ nwane ɔ?’ Mengilele nu mengilele ye kɛ mele Amalɛkenli.

⁹ Na ɔzele me kɛ, ‘Twe bikye me na ku me. Meboda kpole somaa; me nye gyi ɛbolɔ.’

¹⁰ Yemɔti mendwenle membikyele ye na mengunle ye, ɔboalekɛ menwunle ye wienyi kɛ ɔnle lɔ ɔnde kpɔkɛ bieko. Mendule ye belemgbunli kyɛlɛ ne, menyele ɔ sa akɔme nu ngɛba ne yɛɛ melɛfa mearɛlɛ wɔ a.”

¹¹ Devidi vale nyane ngome suosuanle ye tɛladeɛ ne anu, na ye menli mɔɔ nee ye lua la yɛle zɔhane ala.

¹² Bɛlile nyane, bɛhyele ɛhɔne kenle ko ne na bɛzunle Sɔɔlo nee ɔ ra Dwɔnatan nee Ɛdɛnkɛma menli Yizilayɛma kɛ bɛhu bɛ dɔɔnwo wɔ konle ne anu a.

¹³ Akee Devidi bizale kpavolɛ ne mɔɔ rabɔle amaneɛ ne la kɛ, “Ɛvi nienwu?” Kpavolɛ ne buale kɛ, “Mele Amalɛkenli bie ara, na kɛkala, mede maanle ye anu.”

¹⁴ Devidi zele ye kɛ, “Duzu ati bɔbɔ yɛɛ ɛdawɔ, ɛnzulo kɛ ɛkɛhwe dadeɛ ɛkɛhu sonla mɔɔ Ɛdɛnkɛma ɛkpokpa ye nwole, ɛzie ye belemgbunli la ɛ?”

¹⁵ Na Devidi vɛlɛle ye menli ne mɔ ko na ɔzele ye kɛ, “Ku ye!” Na ɔbɔle ye ɔhunle ye.

¹⁶ Akee Devidi zele ye kɛ, “Wɔ mogya ɛgua ɛdawɔ ɛ ngome ɛ ti zo, ɔluakɛ ɛdawɔ ɛ nloa ɛli daselɛ ɛtia wɔ kɛ wɔhu sonla mɔɔ Ɛdɛnkɛma ɛkpokpa ye nwole la.”

¹⁷ Devidi dole awolɛyelɛ edwɛne ɛhye vale zunle Sɔɔlo nee ɔ ra Dwɔnatan,

¹⁸ na ɔhanle kɛ bɛhile Dwudama kɔsɔɔti. (Bɛhɛlɛ edwɛne ɛhye wɔ Gyahya Buluku ne anu).

¹⁹ “Yɛ mgbanyima ɛwu ɛgua Yizilayɛ awoka zo! Yɛ ɛlɔne nu katakyiema ɛho ɛdɔ!

²⁰ Bɛmmabɔ ye nolo wɔ Gate, anzɛɛ Ahyekɛlɔn mgbata ne mɔ azo. Anrɛɛ Filisitia mraalɛ kɛli fɛlɛko, anrɛɛ mraalɛ mɔɔ ɛnze Nyamenle la anye kɛlie.

²¹ “Ezule anzɛɛ ɛbɔlɛ mmatɔ Gelebowa awoka zo; ye azɛlɛ ɛhwie dahuu! Ɔluakɛ katakyiema enyinlike gua ɛkɛ ne anyiemgba nu; Sɔɔlo enyinlike ɔ, ɛnɛ awie ɛnvɔ ye nwole.

²² Dwɔnatan ɛda nloa yɛ nla, Sɔɔlo konle dadeɛ ɛnze anwunvɔne, ɔka mgbolema ɔgua, ɔku kpɔvolɛma.

²³ “Sɔɔlo nee Dwɔnatan, bɛ ɛhulolɛ yɛ nwanwane; bɛde aze la bɛle ko, bɛ ewule nu, bɛ avinli antete, bɛ nwo ndɛne tɛla kɔleɛ, bɛ anwosesebɛ tɛla awenade.

²⁴ “Yizilayɛ mraalɛ, bɛzu Sɔɔlo! Yemɔ mɔɔ ɔhedale bɛ ndakpa, na ɔvale mgbɔba ɔzieziele bɛ a.

²⁵ “Ɛlɔne nu katakyiema ɛho ɛdɔ, bɛhunle bɛ wɔ konle nu. Dwɔnatan ɛwu la awoka avinli.

²⁶ “Mesu wɔ, me diema Dwɔnatan; ɛsonle bolɛ ɛmaa me somaa! Ɛhulole me ɛmanle ɔyɛle nwanwane, ɔdɛlale mraalɛ ɛhulolɛ bɔbɔ.

²⁷ Ɛlɔne nu katakyiema ɛho ɛdɔ, bɛ konle ninyɛne ɛyɛ mgbane!”