2 Edk 35 - BAEBOLO ANZƐƐ BULUKU NWUANZANWUANZA

Dwosaya di Akpabɛnwo Ɛvoyia ne

¹ Belemgbunli Dwosaya luale Ɛdɛnkɛma duma nu lile Akpabɛnwo Ɛvoyia ne wɔ Gyɛlusalɛm. Bɛhunle Akpabɛnwo boane ne wɔ siane ne mɔɔ lumua la ye kenle bulu nee nna ne azo.

² Ɔvale sɛlɛvolɛma ne gyima mɔɔ ɔwɔ kɛ bɛyɛ la ɔmanle bɛ na ɔzile bɛ ahonle wɔ bɛ ɛzonlenlɛ gyima ne mɔɔ bɛyɛ wɔ Ɛdɛnkɛma Ɛzonlenlɛ Sua ne anu la anwo.

³ Akee ɔzele Livaema ne mɔɔ bɛmɛ bɛle menli mɔɔ bɛ nwo te wɔ Ɛdɛnkɛma anyunlu, na bɛkilehile Yizilayɛma la kɛ, “Bɛva Ɛdɛnkɛma Ngyekyeleɛ Ɛlɛka nwuanzanwuanza ne bɛzie sua ne mɔɔ Yizilayɛ Belemgbunli Devidi ara Sɔlɔmɔn zile la anu. Ɔngyia kɛ bɛkɛzoa ye bɛ kɔme zo bieko. Akee bɛbɔ mɔdenle bɛzonle Ɛdɛnkɛma bɛ Nyamenle ne nee ye menli Yizilayɛma amuala.

⁴ Bɛboɔboa bɛ nloa wɔ bɛ ekpunli ekpunli ne mɔ anu, kɛmɔ bɛ ze mɔ mbusua ne mɔ de la, na bɛyɛ bɛ gyima ne, kɛmɔ Yizilayɛ Belemgbunli Devidi nee ɔ ra Sɔlɔmɔn hyehyɛle dole ɛkɛ ne la.

⁵ Akee bɛyɛ bɛ gyima wɔ Ɛzonlenlɛ Sua ne anu, kɛmɔ bɛ ze mɔ ekpunli ekpunli ne mɔ de la, na bɛmaa bɛ bie mɔ ɛha na bɛaboa bɛ mediema Livaema ne mɔ.

⁶ Bɛhu Akpabɛnwo mboane ne mɔ na bɛnlua bɛ nwo, na bɛboa bɛ mediema ne mɔ bɛmaa bɛyɛ Ɛdɛnkɛma edwɛkɛ ne mɔɔ ɔluale Mosisi anwo zo ɔhanle la.”

⁷ Akee Belemgbunli Dwosaya bɔle menli mɔɔ rale Akpabɛnwo Ɛvoyialilɛ ne bie la ati vale mboane nee mbɔnkye mɔɔ dwu apenle ngoko abulasa, nee nlankɛ apenle nsa, mɔɔ vi ɔdaye belemgbunli ye tunli nu la bɔle azu.

⁸ Ye mgbanyima ne mɔ noko yeyele bɛ ahonle nu vale ninyɛne manle menli ne amuala, sɛlɛvolɛma ne, yɛɛ Livaema ne mɔ. Helekaya, Zɛkalaya, yɛɛ Gyɛheɛle, mɔɔ bɛmɛ a bɛle mgbanyinli wɔ Ɛzonlenlɛ Sua nu ɛkɛ ne la vale mboane nee mbɔnkye mralɛ apenle nwiɔ ɛya nsia yɛɛ nlankɛ ɛya nsa manle sɛlɛvolɛma ne mɔ bɔle azu.

⁹ Livaema mgbanyinli ɛhye mɔ: Konanaya, nee ɔ mediema Hyɛmaya nee Nɛtaniile, akee Hahyabaya, Gyiayɛle, yɛɛ Dwozabade vale mboane nee mbɔnkye mralɛ apenle nnu nee nlankɛ nyinli ɛya nnu manle Livaema ne kɛ bɛva bɛbɔ azu wɔ ɛvoyialilɛ ne anu.

¹⁰ Mekɛ dwule kɛ akee bɛbɔ ɛvoyialilɛ ne nzɛlɛlɛ bo la, sɛlɛvolɛma ne hɔgyinlanle bɛ bo zo ne, yɛɛ Livaema ne noko hɔle bɛ ekpunli ekpunli ne mɔ anu, kɛmɔ belemgbunli ne zele bɛ la.

¹¹ Akee bɛhunle Akpabɛnwo Ɛvoyia mboane mralɛ ne mɔ, na sɛlɛvolɛ ne liele mogya ne kpondenle na Livaema ne yele mboane ne mɔ nwoma.

¹² Akee bɛhyɛle nane ne mɔ mɔɔ bɛfa bɛabɔ ɛyelalɛ azu ne la bɛmanle menli ne, kɛmɔ bɛ mbusua ekpulike ekpulike ne mɔ de la, amaa bɛava bɛabɔ azu bɛamaa Ɛdɛnkɛma, kɛmɔ bɛhɛlɛ wɔ Mosisi Mɛla buluku ne anu la. Zɔhane ala noko yɛɛ bɛyɛle nlankɛ ne mɔ a.

¹³ Livaema ne dondonle Akpabɛnwo boane ne, kɛmɔ ngyehyɛlɛ ne se la, na bɛdonle azubɔdeɛ nwuanzanwuanza ne wɔ siase, danesɛne mgbole, nee ahyɛnze nu, na bɛvale bɛmanle menli ne amuala.

¹⁴ Ɛhye anzi, akee bɛdonle bie bɛmanle bɛ nwo nee sɛlɛvolɛma ne, ɔboalekɛ ɛnee Aalɔn abo zo amra ne, mɔɔ le sɛlɛvolɛma ne la asa lɛ, bɛlɛbɔ ɛyelalɛ azu nee nane ɛnlome azu ne. Bɛyɛle ɛhye toonwo nɔsolɛ nu. Yemɔti nzinlii a Livaema ne akee donle bie manle bɛ nwo nee sɛlɛvolɛma ne mɔ a.

¹⁵ Esafe abo zo amra ne noko ɛnee anye ɛbolo ɛlɛto edwɛne, kɛmɔ Belemgbunli Devidi, Esafe, Himan, nee Nyamenle kpɔmanvolɛ Gyɛdutɛn hyehyɛle dole ɛkɛ ne la. Nlenkɛ sinzavolɛma ne noko anvi bɛ bo zo ne mɔ, ɔluakɛ bɛ mediema Livaema ne vale bɛ afoa nu ɛdeɛ rɛlɛle bɛ.

¹⁶ Zɔhane ati, kɛmɔ Belemgbunli Dwosaya hyehyɛle la, kenle ko ne bɛlile Akpabɛnwo Ɛvoyia ne wɔ Ɛdɛnkɛma duma nu, bɛbɔle ɛyelalɛ azu wɔ Ɛdɛnkɛma azukponle ne azo bɛmanle Nyamenle.

¹⁷ Na Yizilayɛma mɔɔ rale la lile ɛvoyia ne nee Angye Ɛvoyia ne kenle nsuu.

¹⁸ Sumunli Nyamenle kpɔmanvolɛ Samoɛle mekɛ zo, bɛtɛdile Akpabɛnwo Ɛvoyia ne zɛhae ɛlɛ. Arelemgbunli mɔɔ rale hɔle la, biala anli ɛvoyia ne, kɛmɔ Belemgbunli Dwosaya, sɛlɛvolɛma ne, Livaema, Dwudama nee Yizilayɛma mɔɔ rale, nee Gyɛlusalɛmma lile la.

¹⁹ Mɔɔ Dwosaya lile ɛvolɛ bulu nee mɔtwɛ wɔ ebia ne azo la yɛɛ ɔlile Akpabɛnwo Ɛvoyia ne a.

Dwosaya belemgbunlililɛ ne awieleɛ

²⁰ Ɛhye amuala anzi, mɔɔ ɛnee Belemgbunli Dwosaya ɛwie Ɛzonlenlɛ Sua ne boɛ yɛ la, Yigyibiti Belemgbunli Niko vale konle doale Kaakimehyema mɔɔ wɔ Azule Yufileti ne anloa la, na Dwosaya vale ye ɛlɔnema hɔle kɛ ɔkadoa ye ɔ nee ye bɛaho.

²¹ Niko zoanle menli kɛ bɛhɔze Belemgbunli Dwosaya kɛ, “Dwuda belemgbunli, yɛ mu nwiɔ yɛnlɛ edwɛkɛ biala. Tɛ wɔmɔ ti yɛɛ melɛba a. Mɔɔ ɛha me la yɛɛ melɛba ɔ nwo zo a, yɛɛ Nyamenle ɛze me kɛ menyɛ ye waa. Mmatenda Nyamenle agyakɛ anu, na ɔgyi me nzi. Ɛtenda Nyamenle agyakɛ anu a, ɔbazɛkye wɔ.”

²² Noko Belemgbunli Dwosaya anzia, na ɔhakyile ɔ nwo sonla gyɛne kɛ ɔkadoa ye ɔ nee ye aho. Yeandie edwɛkɛ ne mɔɔ Nyamenle vale duale Niko anloa manle ɔhanle la, na ɔ nee Niko ɛlɔnema ne bɔle konle zo wɔ Mɛgedo fienemgbole ne anu.

²³ Wɔ konle ne anu, menli mɔɔ to ɛda la bie dole ye ɛda ne wɔle Belemgbunli Dwosaya; na belemgbunli ne zele ye sonla ne mɔɔ ka ye konle ehwili ne la kɛ, “Meboda na ye me fi konle ye anloa.”

²⁴ Yemɔti ye sonvolɛ ne yele ye vile konle ne anloa, ɔvale ye ɔradole ye konle ehwili ne mɔɔ tɔ zolɛ nwiɔ la anu, na ɔ nee ye rale Gyɛlusalɛm. Ɔhɔle ayile nu na bɛwulale ye mrɛlatɛlɛ nu wɔ ɔ ze mɔ anu. Na Dwudama nee Gyɛlusalɛm amra amuala zunle ye.

²⁵ Nyamenle kpɔmanvolɛ Gyɛlɛmaya ɔdaye ɔhyehyɛle ɛzunlɛ edwɛkɛdwɛndolɛ wɔ Belemgbunli Dwosaya anwo. Mraalɛ nee mrenya edwɛndolɛma ɛdo edwɛne ɛhakye Belemgbunli Dwosaya toonwo a yeradwu ɛnɛ a. Ɛhye ɛyɛ amaamuo ɛha Yizilayɛ maanle ne anu. Bɛhɛlɛ edwɛne ne mɔ wɔ Awolɛyelɛ Buluku ne anu.

²⁶ Belemgbunli Dwosaya nyɛleɛ mɔɔ ɛha, ye ɛbɛla kpalɛ mɔɔ ɔbɔle mɔɔ fane ye tieyɛ wɔ Ɛdɛnkɛma Mɛla ne anwo, nee ye gyima mɔɔ ɔlile,

²⁷ ɔvi mɔlebɛbo ne mɔɔ kɔdwu awieleɛ ne la, bɛhɛlɛ bɛ kɔsɔɔti wɔ Yizilayɛ nee Dwuda Arelemgbunli Tetedwɛkɛ Buluku ne anu.