2 Edk 31 - BAEBOLO ANZƐƐ BULUKU NWUANZANWUANZA

Hɛzikaya kakyihakyi ninyɛne wɔ Nyamenlezonlenlɛ nu

¹ Mɔɔ ɛhye mɔ amuala wiele la, Yizilayɛma mɔɔ rale la hɔle Dwuda azuamgbole ne mɔ azo, bɛhɔbubule mpila ne mɔ mɔɔ bɛsisi, bɛ bozonle raalɛ Ahyela ne ananze ne mɔ, ɛleka ne mɔ mɔɔ menli mɔɔ ɛnze Nyamenle la sonle la, nee azukponle ne mɔ kɔsɔɔti mɔɔ wɔ Dwuda nee Bɛngyaman maanzinli ne mɔ anu, nee Yifelaem nee Manasɛ maanzinli ne mɔ anu la amuala. Akee awie biala hɔle ye sua zo.

² Belemgbunli Hɛzikaya ziale hyɛle sɛlɛvolɛma nee Livaema anu ekpunli ekpunli, yɛɛ ekpunli ko biala nee ye gyima. Bɛmɛ a le sɛlɛvolɛma nee Livaema mɔɔ nea ɛyelalɛ nee anzonudwolɛ azubɔlɛ ninyɛne zo, bɛdabɛ mɔɔ bɛsinza Ɛzonlenlɛ Sua ne nlenkɛ mgbole ne mɔ, yɛɛ bɛdabɛ mɔɔ bɛyɛ Nyamenle mo bɛaye ye ayɛlɛ la.

³ Belemgbunli afoa nu ɛdeɛ a le kɛ, ɔvale nane ɔmanle bɛvale bɛbɔle nwonlomɔ nee nɔsolɛ ɛyelalɛ azu ne mɔ, nee Ɛnwomenlelielɛ Kenle ɛyelalɛ azu ne mɔ, Siane Fofolɛ Ɛvoyialilɛ azu ne mɔ, nee ɛvoyia mɔɔ ɛha la azu ne mɔ, kɛmɔ bɛhɛlɛ bɛ wɔ Ɛdɛnkɛma Mɛla Buluku ne anu la.

⁴ Eza belemgbunli ne zele menli mɔɔ wɔ Gyɛlusalɛm la kɛ bɛva azubɔlɛ ninyɛne ne mɔ mɔɔ le sɛlɛvolɛma nee Livaema ne ɛdeɛ la bɛrɛlɛ bɛ, amaa bɛanyia adenle bɛava bɛ mekɛ muala bɛali bɛ gyima ne, kɛmɔ Ɛdɛnkɛma kpondɛ la.

⁵ Mɔɔ edwɛkɛ ɛhye kpondenle na ɔdwule amaanvoa la, Yizilayɛma vale bɛ ma mɔɔ bɛlumuale bɛdele la, nwanye, nwole, wolɛ, nee bɛ bɛyɔba biala dɔɔnwo rale, yɛɛ bɛvale bɛ ninyɛne ngyɛnu bulu ɛkpɔ ko ne bɛrale.

⁶ Na Dwudama nee Yizilayɛma mɔɔ dede Dwuda azuamgbole ne mɔ azo la hyɛle bɛ nlankɛ nee mboane nu bulu bulu na bɛdule ɛkpɔ ngoko bɛrale. Eza bɛvale bɛ ninyɛne mɔɔ bɛdu bɛzie ahane bɛmaa Ɛdɛnkɛma bɛ Nyamenle ne la bɛrale. Ninyɛne mɔɔ bɛ nee bɛ rale la zonle kpalɛ na bɛhuohuanle bɛ edukue edukue.

⁷ Siane nsa ne anu, bɛbɔle ɔ bo kɛ bɛ nee ahyɛlɛ ninyɛne ne mɔ ba, yɛɛ bɛvale bɛrale dedee ɔhɔdwule siane nsuu ne anu.

⁸ Belemgbunli Hɛzikaya nee ye mgbanyima ne mɔ ranwunle ninyɛne mɔɔ bɛ nee bɛ ɛra la somaa la, bɛyele Ɛdɛnkɛma ayɛlɛ na bɛyele ye menli Yizilayɛma noko ayɛlɛ.

⁹ Na Hɛzikaya bizale sɛlɛvolɛma nee Livaema ninyɛne ne mɔ anwo edwɛkɛ.

¹⁰ Na Sɛlɛvolɛ Kpanyinli Azalaya, mɔɔ vi Zeedɔko sua nu la buale ye kɛ, “Sumunli kɛ bɛbɔle ɔ bo kɛ bɛ nee ahyɛlɛ ninyɛne ne mɔ ba Ɛdɛnkɛma Ɛzonlenlɛ Sua ye anu ɛke la, dahuu yɛ sa kɔ yɛ nloa, bie bɔbɔ ka. Yɛnyia ninyɛne ɛwolaa ɛhye yɛzie ɛkɛ, ɔluakɛ Ɛdɛnkɛma ɛyila ye menli ne.”

¹¹ Belemgbunli Hɛzikaya manle bɛsisile ekpumgbunli dɔɔnwo wɔ Ɛdɛnkɛma Ɛzonlenlɛ Sua ne anwo na bɛzieziele nuhua.

¹² Bɛvale ninyɛne ne mɔɔ bɛdu bɛzie ahane bɛmaa Ɛdɛnkɛma la nee ngyɛnu bulu ɛkpɔ ngoko ne amuala bɛziele nu. Abɔlɔba kpanyinli mɔɔ ɛnee nea zolɛ la a le Livaenli Konanaya, yɛɛ mɔɔ li ɔ nzi la a le ɔ diema Hyemɛyae.

¹³ Bɛdule Livaema bulu mɔɔ nee bɛ yɛ gyima a. Bɛmɛ a le Gyɛheɛle, Azazaya, Neehate, Asahɛle, Gyɛlimo, Dwozabade, Yilayɛle, Yesemakaya, Meehate, yɛɛ Bɛnaya. Menli bulu ɛhye mɔ wɔ Konanaya nee ɔ diema Hyemɛyae abo. Belemgbunli Hɛzikaya nee Sɛlɛvolɛ Kpanyinli Azalaya a yele bɛ kɛ bɛyɛ zɔhane gyima ne a.

¹⁴ Livaenli Yemena mɔɔ sinza Aduduleɛ Anlenkɛ Kpole ne la ara Kɔli a nea azubɔlɛ ninyɛne ne mɔ mɔɔ bɛyeyele bɛ ahonle nu bɛvale bɛrɛlɛle Nyamenle la azo a, na ɔnea ɔfa mɔɔ bɛva bɛzie ahane bɛmaa Ɛdɛnkɛma la ɔsie, na ɔfa mɔɔ bɛfa bɛabɔ azu nwuanzanwuanza la ɔmaa.

¹⁵ Menli mɔɔ boale ye wɔ azuamgbole mɔɔ sɛlɛvolɛma wɔ zolɛ la a le Livaema ɛhye mɔ: Yidɛn, Menayamen, Gyɛhyua, Hyɛmaya, Amalaya, yɛɛ Hyɛkanaya. Bɛkyɛ aleɛ ne bɛmaa bɛ mediema Livaema ne mɔ, mgbanyinli nee ngakula, kɛmɔ ko biala gyima ne ɛsesebɛ si de la.

¹⁶ Bɛngyɛ ye mbusua nu. Nrenya biala mɔɔ ɛli ɛvolɛ abulasa mɔɔ kɔ, na ɔkola ɔyɛ Ɛzonlenlɛ Sua ne anu gyima ne bie alehyenlɛ biala la nyia bie, kɛmɔ ye gyinlabelɛ ne si de la.

¹⁷ Bɛfa sɛlɛvolɛma ne bɛfi bɛ ze mɔ anu, yɛɛ Livaema mɔɔ ɛli ɛvolɛ abulanwiɔ mɔɔ kɔ la, bɛnea gyima mɔɔ bɛyɛ wɔ bɛ ekpunli ekpunli ne mɔ anu la na bɛava bɛ.

¹⁸ Saa bɛkɛlɛ sɛlɛvolɛma ne aluma a bɛkɛlɛ bɛ mra ngyikyi, bɛ mraalɛ, yɛɛ bɛ mra mrenya nee mraalɛ kɔsɔɔti bɛboka nwolɛ, ɔluakɛ bɛ muala bɛnea bɛ nwo boɛ bɛmaa bɛ nwo te.

¹⁹ Akee menli wɔ azuamgbole ne mɔ mɔɔ Aalɔn abo zo amra nee sɛlɛvolɛma ne bie mɔ dede zolɛ la azo; bɛmɛ a bɛnea na bɛfa aleɛ bɛkɔmaa nrenya biala mɔɔ boka sɛlɛvolɛma abusua ne nee awie biala mɔɔ bɛhɛlɛ ye duma bɛboka Livae mbusua ne mɔ anwo la a.

²⁰ Belemgbunli Hɛzikaya lile nɔhalɛ na ɔbɔle mɔdenle ɔyɛle mɔɔ le kpalɛ na ɔsɔ Ɛdɛnkɛma ye Nyamenle ne anye la wɔ Dwuda amuala.

²¹ Belemgbunli ne kpazile, ɔboalekɛ ɔdule ɔ nwo ɔmanle ye Nyamenle ne na ɔkpɔlale ɔ kunlu ɔlile gyima biala mɔɔ wɔ Ɛzonlenlɛ Sua ne anu, anzɛɛ Nyamenle Mɛla ne azo ɛlilɛ nu la.