2 Edk 25 - BAEBOLO ANZƐƐ BULUKU NWUANZANWUANZA

Dwuda Belemgbunli Amazaya

¹ Amazaya lile ɛvolɛ abulanwiɔ nee nnu la yɛɛ ɔbɔle ɔ bo kɛ ɔdi belemgbunli a. Ɔdɛnlanle Gyɛlusalɛm yɛɛ ɔlile ebia ne ɛvolɛ abulanwiɔ nee ngɔnla. Ɔ nli a le Gyɛhowadan mɔɔ vi Gyɛlusalɛm la.

² Ɔbɔle ɛbɛla ɔmanle ɔzɔle Ɛdɛnkɛma anye, noko ɛnee ɔ nwo lɛ dɛne;

³ ɔnyianle gyinlagyakɛ wɔ ye belemgbunlililɛ nu ala la yɛɛ ɔhunle sonvolɛma nwiɔ ne mɔɔ hunle ɔ ze la a.

⁴ Noko yeanva ɔ sa yeanga bɛ mra ne mɔ, kɛmɔ bɛhɛlɛ ye wɔ Mosisi Mɛla Buluku ne anu la. Ɛdɛnkɛma zele kɛ, “Ɔnle kɛ selɛ biala wu wɔ ɔ ra ɛtane ti, anzɛɛ ralɛ wu wɔ ɔ ze ɛtane ti. Awie biala ɔwɔ kɛ wu wɔ ɔdaye ye ɛtane mɔɔ yeyɛ la ati.”

Dwudama nee Yidɔmma konle ne

⁵ Akee Amazaya boɔboale Dwuda ɛlɔnema anloa na ɔhyɛle bɛ ekpunli ɛya ngoko nee apenle ngoko, kɛmɔ bɛ ze mɔ mbusua ne mɔ de wɔ Dwuda nee Bɛngyaman maanzinli ne mɔ anu la, na ɔvale safohyenlema ɔlile bɛ ti. Ɔboɔboale menli mɔɔ ɛli ɛvolɛ abulanwiɔ mɔɔ kɔ la anloa. Bɛlua menli apenle ngoko ɛya nsa mɔɔ kola fa atwɛ nee bɛ sa nu enyinlike ko kpalɛ kpalɛ a.

⁶ Eza ɔbɔle Yizilayɛ ɛlɔnema mɔɔ ze ko kpalɛ la menli apenle ngoko ɛya ko ɛkpa dwɛtɛ fufule tone nu kilo apenle nsa ɛya nna.

⁷ Na Nyamenle kpɔmanvolɛ razele ye kɛ, “Nana, mmamaa Yizilayɛ ɛlɔnema ne nee wɔ kɔ, ɔluakɛ Ɛdɛnkɛma ɛnle Yizilayɛma, mɔɔ le Yifelaem abo zo amra ɛhye mɔ afoa.

⁸ Saa wɔ adwenle yɛ wɔ kɛ ɛhye mɔ yɛɛ bamaa ɛ nwo ayɛ se wɔ konle nu a, ɛnee nwu ye kɛ, Nyamenle bamaa wɔ kpɔvolɛma ali ɛ nwo zo konim, ɔluakɛ Nyamenle lɛ tumi, ɔkola ɔmaa ɛdi konim, yɛɛ ɔkola ɔmaa wɔ kpɔvolɛma di ɛ nwo zo konim.”

⁹ Amazaya bizale Nyamenle kpɔmanvolɛ ne kɛ, “Ɛnee akee dwɛtɛ fufule kilo apenle nsa ɛya nna ne mɔɔ medua memaa Yizilayɛ ɛlɔnema ne la, kɛ menyɛ ye ɛ?” Nyamenle kpɔmanvolɛ ne zele ye kɛ, “Ɛdɛnkɛma kola maa wɔ ɛhye anwo mɔnwo kɛyɛ nyɛ.”

¹⁰ Zɔhane ati Amazaya manle Yifelaem ɛlɔnema ne ziale hɔle bɛ sua zo. Yifelaemma ne ahonle futule kpalɛ, na bɛvale Dwudama anwo ɛya kpole kpalɛ na bɛziale bɛhɔle.

¹¹ Amazaya akee zile ahonle na ɔvale ye ɛlɔnema ne ɔhɔle Ngyenle Bɔnza, ɔhɔhonle na ɔhunle Yidɔm ɛlɔnema apenle bulu.

¹² Eza Dwudama hyele Yidɔmma apenle bulu nuokɛ bɛ nee bɛ hɔle suakpole Selea boka kelengele ne azo na bɛtiale bɛ kɔme anzi bɛguale bɛ kuma ne anu, na bɛtetele nzokanzoka.

¹³ Mekɛ ne anu ala Yizilayɛ ɛlɔnema ne mɔɔ Amazaya ammaa bɛangɔ konle ne bie na ɔzianenle bɛ la, sia ahɔ la, bɛvale bɛ ɛya ne bɛhɔguale Dwuda azuamgbole mɔɔ bɔ ye Samɛlea kɔgua Bɛte Hɔlɔn la anwo zo. Bɛhunle menli apenle nsa wɔ azuamgbole ɛhye mɔ azo, na bɛwuale bɛ nwo ninyɛne dɔɔnwo bɛhɔle.

¹⁴ Amazaya lile Yidɔmma anwo zo konim na ɔziale ɔrale la, ɔziele Yidɔm mmonle mɔɔ ɔsesale ɔrale la aze kɛ ɔdaye Amazaya ye mmonle ɔ, na ɔzonlenle bɛ, ɔbɔle azu ɔmanle bɛ.

¹⁵ Yemɔti Ɛdɛnkɛma vale Amazaya anwo ɛya na ɔzoanle Nyamenle kpɔmanvolɛ hɔzele ye kɛ, “Duzu ati a wɔhakyi ɛlɛsonle menli ne mɔ nyamenle ne mɔ mɔɔ angola anlie bɛ anvi ɛ sa nu la ɛ?”

¹⁶ Na Amazaya zɔle Nyamenle kpɔmanvolɛ ne anloa na ɔbizale ye kɛ, “Na ɛdawɔ mumua ne, yɛva wɔ kɛ ɛdu belemgbunli folɛ ɔ? Gyakyi mɔɔ ɛlɛka la, na anrɛɛ menwɔmaa bɛkɛhu wɔ.” Nyamenle kpɔmanvolɛ ne zɔle menle, yeanga Nyamenle nrɛlaleɛ ne, noko ɔhanle kɛ, “Menwu kɛ Nyamenle ɛyɛ kɛ ɔsɛkye wɔ, ɛhye ati a wɔyɛ ɛhye na eza wɔandie me folɛdulɛ ne a.”

Dwudama nee Yizilayɛma konle ne

¹⁷ Akee Dwuda Belemgbunli Amazaya nee ye mgbanyima hanle bɛ ti kpulale nwolɛ na bɛzoanle bɛmanle bɛhɔzele Yizilayɛ Belemgbunli Gyɛhowahye kɛ ɔrɛla ɔmaa bɛva bɛ kɛnra bɛbɔ zolɛ. Gyɛhowahye ɔ ze a le Gyɛhowahaze yɛɛ ɔ nlenya a le Gyihu.

¹⁸ Na Gyɛhowahye manle bɛhɔzele Amazaya kɛ, “Kenle ko Lɛbanɔn mbowunyɛma zoanle manle bɛhɔzele Lɛbanɔn sida baka kɛ, ‘Fa ɛ ra raalɛ ne maa me ra nrenya ne ɛgya ye;’ na Lɛbanɔn nanemgbole ravale ɛleka mɔɔ mbowunyɛma ne wɔ la na ɔtietiale zolɛ.

¹⁹ Wɔmɔ ɛse, ‘Nea, meli Yidɔmma anwo zo konim,’ ɛhye ati ɛ nzo ɛmemaa zolɛ, ɛ nwo ndɛkɛ ɛdwazo, ɛlɛtu ɛ nloa anu. Tɛnla aze die wɔ ɛnwomenle bie. Duzu ati a ɛlɛtwehwe ngyegyelɛ wɔamaa ɛ nwo nee Dwudama ɛ?”

²⁰ Noko Amazaya andie; ɔluakɛ Nyamenle a ɛhyehyɛ a, amaa yeaye Dwudama yeamaa bɛ kpɔvolɛma ali bɛ nwo zo konim, ɔboalekɛ bɛzonle Yidɔm awozonle ne mɔ.

²¹ Yemɔti Yizilayɛ Belemgbunli Gyɛhowahye hɔle na ɔ nee Dwuda Belemgbunli Amazaya hɔbɔle ye zo wɔ Bɛte Hyimɛhye mɔɔ wɔ Dwuda la.

²² Yizilayɛma lile Dwudama anwo zo konim, na Dwuda ɛlɔnema ne nriandile hɔle bɛ azua zo.

²³ Yizilayɛ Belemgbunli Gyɛhowahye hyele Dwuda Belemgbunli Amazaya nuokɛ. Amazaya ɔ ze a le Dwowahye yɛɛ ɔ nlenya a le Ehazaya mɔɔ vi Bɛte Hyimɛhye la. Gyɛhowahye vale Amazaya rale Gyɛlusalɛm na ɔrabubule Gyɛlusalɛm bane ne foa ko mɔɔ vi Yifelaem Anuhɔlɛ ne kɔdwu Muleɛzo Anuhɔlɛ ne la ɔguale. Ye tendenle kɛyɛ mita ɛya nwiɔ.

²⁴ Akee ɔvale Nyamenle Ɛzonlenlɛ Sua ne anu ezukoa nvutuke nee dwɛtɛ fufule nee ahyɛnze biala mɔɔ ɔ sa hanle bɛ la boka Obɛde Yidɔm ɔhɔle; ɔvale nlenkɛ sinzavolɛma ne amuala ɔhɔle. Eza ɔhɔvale belemgbunli suakunlu ɛkɛ ne gya ne anu ninyɛne ne na ɔhyele menli ne bie mɔ nuokɛ ɔ nee bɛ hɔle Samɛlea.

²⁵ Dwuda Belemgbunli Amazaya ɔ ze a le Dwowahye. Mɔɔ Gyɛhowahye wule la, ɔ nzi ɛvolɛ bulu nee nnu yɛɛ Amazaya ɔdaye ɔwule a. Belemgbunli Gyɛhowahye ɔ ze a le Gyɛhowahaze.

²⁶ Akee Amazaya nyɛleɛ mɔɔ ɔyɛle, ɔvi mɔlebɛbo ne mɔɔ kɔdwu awieleɛ ne la, bɛhɛlɛ bɛ muala wɔ Dwuda nee Yizilayɛ Arelemgbunli Tetedwɛkɛ Buluku ne anu.

²⁷ Ɔvi mekɛ ne mɔɔ ɔhakyile ɔ nzi ɔzile Ɛdɛnkɛma la yɛɛ menli bɔle ɔ bo kɛ bɛbɔ ɔ nwo tokule wɔ Gyɛlusalɛm a, yemɔti ɔnriandile ɔhɔle Leekehye. Noko bɛzoanle menli wɔ Leekehye bɛmanle bɛhɔhunle ye wɔ ɛkɛ ne.

²⁸ Na bɛvale ye funli ne wɔ mgbɔnwɔ zo bɛradole ye wɔ ɔ ze mɔ anwo ɛkɛ wɔ Devidi Suakpole zo.