2 Edk 23 - BAEBOLO ANZƐƐ BULUKU NWUANZANWUANZA

Atalaya anwo atua ɛdelɛ

¹ Atalaya lile Dwuda ebia ne ɛvolɛ nsia. Wɔ ye ɛvolɛ nsuu ne anu, sɛlɛvolɛ Gyɛhɔyada zile ɔ kɛnra ɔ nee safohyenlema mɔɔ nea ɛlɔnema ɛya ɛya nwo zo la yɛle ngyehyɛlɛ. Safohyenlema ne mɔ a le Gyɛloham ara Azalaya, Gyihɔheenan ara Yehyemeeyɛle, Obɛde ara Azalaya, Adaya ara Meeyasaya, yɛɛ Zekelae ara Yilaehyafate.

² Bɛhɔle Dwuda azuamgbole ne mɔ azo, na bɛhɔvale Livaema mɔɔ wɔ maanle ne anu la nee Yizilayɛ mbusua mgbanyinli bɛrale Gyɛlusalɛm.

³ Na bɛ muala bɛ nee Dwowahye yiale nu wɔ Nyamenle Ɛzonlenlɛ Sua ne anu bɛbɔle kpɔkɛ, bɛkyekyele ɔ bo. Sɛlɛvolɛ Gyɛhɔyada zele bɛ kɛ, “Bɛnlea, belemgbunli ne ara nrenya ne ɛne! Bɛboa bɛmaa ɔli belemgbunli, kɛmɔ Ɛdɛnkɛma hanle wɔ Devidi abo zo amra anwo la.

⁴ Debie mɔɔ ɔwɔ kɛ bɛyɛ la a le kɛ, sɛlɛvolɛma nee Livaema mɔɔ bara gyima Ɛnwomenlelielɛ Kenle ne la bahyɛ bɛ nwo nu nsa. Ekpunli ko bazinza Ɛzonlenlɛ Sua ne nlenkɛ mgbole ne mɔ,

⁵ ekpunli ko bahɔzinza suakunlu ɛkɛ ne, na ekpunli ko ne mɔɔ ɛha la ahɔgyinla Adiabo Anlenkɛ Kpole ne anloa. Menli ne kɔsɔɔti baha Ɛdɛnkɛma Ɛzonlenlɛ Sua ne alie ne mɔ anwo.

⁶ Bɛmmamaa awie biala wolo Ɛdɛnkɛma Ɛzonlenlɛ Sua ne anu kɛ sɛlɛvolɛma nee Livaema mɔɔ bɛyɛ gyima wɔ ɛkɛ ne la ala. Bɛkola bɛwolo, ɔboalekɛ bɛmɛ, bɛ nwo te. Na menli mɔɔ ɛha la ɔwɔ kɛ di mɔɔ Ɛdɛnkɛma ɛhyehyɛ la azo na bɛgyinla alie nwo ɛkɛ.

⁷ Livaema bahɔgyinla belemgbunli ne anwo ɛkɛ azinza ye. Bɛbahwe bɛ dadeɛ ne mɔ na bɛali belemgbunli ne anzi wɔ ɛleka biala mɔɔ ɔkɔ la. Bɛhu awie biala mɔɔ kɛpele kɛ ɔba Ɛzonlenlɛ Sua ne anu la.”

⁸ Livaema nee Dwudama amuala lile ngyehyɛlɛ mɔɔ sɛlɛvolɛ Gyɛhɔyada vale manle bɛ la azo. Sɛlɛvolɛ Gyɛhɔyada anzɛkye sɛlɛvolɛ ekpunli ekpunli ne mɔ mɔɔ bɛhyehyɛ la. Yemɔti ekpunli ko biala vale ye menli mɔɔ ba gyima nee mɔɔ ɛnle gyima nu kenle ko ne la amuala rale gyima Ɛnwomenlelielɛ Kenle ne.

⁹ Gyɛhɔyada yele Belemgbunli Devidi atwɛ ne mɔ nee bɛ sa nu enyinlike mgbole nee ngyikyi ne mɔ mɔɔ ɛnee wɔ Ɛzonlenlɛ Sua ne anu la manle safohyenlema ne mɔ.

¹⁰ Akee ɔmanle menli ne gyinlanle nvonvɔɔnwo, ko biala lɛ dadeɛ na bɛbɛnrale bɛyiale Ɛzonlenlɛ Sua ne, ɔvi ye nyiakɛ ɔkɔ ye sɔlɔ afoa nu, yɛɛ azukponle ne anwo, kɛ bɛzinza belemgbunli ne.

¹¹ Akee ɔvale Dwowahye ɔvindele, ɔvale belemgbunli kyɛlɛ ne ɔzoale ye, na ɔvale belemgbunlililɛ mɛla kɛlata ne ɔwulale ɔ sa nu, na bɛziele ye belemgbunli. Sɛlɛvolɛ Gyɛhɔyada nee ɔ mra ne mɔ kpokpale ye nwole, na awie biala deanle nu kɛ, “Belemgbunli ne ɛnyi ɛhyɛ!”

¹² Atalaya dele alɛra ne mɔɔ menli ne ɛlɛyɛ nee belemgbunli ne mɔɔ bɛlɛyeyɛ ye la. Ɛhye anzi ɔhɔle Ɛzonlenlɛ Sua ne anu,

¹³ na ɔhɔnwunle kɛ belemgbunli ne gyi ye mpila ne anwo wɔ anuhɔlɛ ne, safohyenlema ne nee bɛdabɛ mɔɔ bɛbɔ aweɛne ndendenle la gyigyi ɔ nwo ɛkɛ, na menli ne kɔsɔɔti anye ɛlie, bɛlɛbɔ aweɛne, na Ɛzonlenlɛ Sua nu edwɛndolɛma li bɛ ti bɛlɛto edwɛne na bɛlɛbɔ agole bɛazi. Atalaya suosuanle ye adɛladeɛ mɔɔ ɔwula la anu ɛkɛ ne ala, na ɔdeanle nuhua kɛ, “Maamɔlɛ ɛbɛla a le ɛhye! Maamɔlɛ ɛbɛla a le ɛhye!”

¹⁴ Na Gyɛhɔyada zele safohyenlema mɔɔ ɛlɛnea ɛlɔnema ne anwo zo la kɛ, “Bɛmmaku ye wɔ Ɛzonlenlɛ Sua ye anu. Bɛva ye bɛlua sinzavolɛma ne avinli bɛvinde, na awie biala mɔɔ kɛyɛ kɛ ɔbalie ye la, bɛhu ye.”

¹⁵ Bɛhyele Atalaya na bɛvale ye bɛhɔle “Ɛkpɔnwɔ Anlenkɛ Kpole” ne mɔɔ di kɔ belemgbunli suakunlu ɛkɛ ne la anloa bɛhɔhunle ye.

Gyɛhɔyada kakyihakyi ninyɛne

¹⁶ Akee sɛlɛvolɛ Gyɛhɔyada nee belemgbunli ne yɛɛ menli ne amuala yɛle ngyehyɛlɛ na bɛhyele ɔ bo kɛ Ɛdɛnkɛma ala a bɛkɛzonle ye a.

¹⁷ Menli ne amuala hɔle bozonle Beeyale ne ɛzonlenlɛ sua ne anwo na bɛhɔbubule ye bɛguale, bɛbubule ye azukponle ne mɔ nee ye ananze ne mɔ na bɛhunle Beeyale kɔmenle Matan wɔ bozonle ne azukponle ne mɔ anyunlu ɛkɛ.

¹⁸ Na Gyɛhɔyada manle menli zinzale Ɛzonlenlɛ Sua ne na ɔvale bɛ ɔwulale sɛlɛvolɛma nee Livaema mɔɔ Devidi hyehyɛle kɛ bɛnlea Ɛzonlenlɛ Sua ne gyimayɛlɛ zo la asa anu. Akee ɔzele bɛ kɛ bɛbɔ ɛyelalɛ azu bɛmaa Ɛdɛnkɛma, kɛmɔ bɛhɛlɛ ye wɔ Mosisi mɛla ne anu la, na bɛdo edwɛne bɛmaa bɛ nye ɛlie, kɛmɔ Belemgbunli Devidi hyehyɛle la.

¹⁹ Ɔmanle sinzavolɛma gyinlegyinlanle Ɛzonlenlɛ Sua ne nlenkɛ mgbole ne mɔ anloa, amaa awie mɔɔ anwo ɛnde la anwolo Ɛzonlenlɛ Sua ne anu.

²⁰ Akee safohyenlema ne, menli titile ne mɔ, nee arane mgbanyima ne mɔ lile belemgbunli ne anyunlu na bɛvale ye bɛluale anwuma anlenkɛ kpole ne anu bɛrale belemgbunli suakunlu ɛkɛ ne, na bɛvale ye bɛdɛnlanle belemgbunli ebia ne anu.

²¹ Yemɔti menli ne amuala lile fɛlɛko, na akee anzonudwolɛ rale suakpole ne azo, ɔluakɛ bɛhu Atalaya.