2 Edk 1 - BAEBOLO ANZƐƐ BULUKU NWUANZANWUANZA

Belemgbunli Sɔlɔmɔn sɛlɛ abiza nrɛlɛbɛ

¹ Devidi ara Sɔlɔmɔn agyakɛ dwule aze na ɔ sa yiale ye belemgbunli maanle ne. Ɛdɛnkɛma ye Nyamenle ne nee ye luale na ɔmanle ɔyɛle sonlakpole.

² Belemgbunli Sɔlɔmɔn dendɛle hilele Yizilayɛma amuala: safohyenlema mɔɔ nea ɛlɔnema apenle apenle nee ɛya ɛya nwo zo, ndɛnebuavolɛma, Yizilayɛ maanle mgbanyima ne mɔ, yɛɛ mbusua mgbanyinli.

³ Sɔlɔmɔn lile bɛ ti na ɔ nee menli ne hɔle Gebɛyɔn, ɔluakɛ ɛkɛ ne yɛɛ Ndanlɛ Sua ne mɔɔ bɛsonle Nyamenle wɔ nu, mɔɔ Ɛdɛnkɛma sonvolɛ Mosisi zile wɔ fienemgbole ne anu la wɔ a.

⁴ (Belemgbunli Devidi ɛnee ɛva Nyamenle Ngyekyeleɛ Ɛlɛka ne ɛvi Keleate Gyialem ɛra Ndanlɛ Sua ne mɔɔ yezi yemaa ye wɔ Gyɛlusalɛm la anu.)

⁵ Eza kɔbele azukponle ne mɔɔ Huuli ara Yulae ara Bɛzalii zile ziele Ɛdɛnkɛma Ndanlɛ Sua ne anyunlu wɔ Gebɛyɔn la tɛbɔ ɛkɛ. Na Sɔlɔmɔn nee menli ne amuala zonlenle Ɛdɛnkɛma wɔ ɛkɛ.

⁶ Sɔlɔmɔn hunle nyɛmoa apenle, yelale bɛ bɔle azu wɔ kɔbele azukponle ne mɔɔ gyi ɛleka mɔɔ bɛsonle la anyunlu ɛkɛ ne la azo manle Ɛdɛnkɛma.

⁷ Kenle ko ne nɔe ne, Nyamenle yele ɔ nwo hilele Sɔlɔmɔn na ɔzele ye kɛ, “Biza debie mɔɔ menyɛ memaa wɔ la.”

⁸ Sɔlɔmɔn buale Nyamenle kɛ, “Wɔhile ɛhulolɛ kpole mɔɔ ɛmbɔ aze ɛlɛ la wɔ me ze Devidi anwo na wɔva me wɔzie belemgbunli wɔzie egya agyakɛ anu.

⁹ O Ɛdɛnkɛma Nyamenle, maa wɔ ɛwɔkɛ ne mɔɔ ɛbɔle egya Devidi la ɛyɛ zɔhane, ɔluakɛ wɔva me wɔzie menli mɔɔ zonle kɛ ɛnwea la belemgbunli.

¹⁰ Zɔhane ati maa me nrɛlɛbɛ nee ndelebɛbo maa menva menzie menli ɛhye mɔ, ɔluakɛ awie biala ɛnrɛhola wɔ menli pemgbenleamgbe ɛhye mɔ anwo zo nea.”

¹¹ Nyamenle buale Sɔlɔmɔn kɛ, “Kɛmɔ ɛhye a wɔ wɔ ahonle nu, na wɔambiza agyadeɛ, anwonyia, enililɛ, anzɛɛ wɔanze me kɛ mengu menli mɔɔ kpɔ wɔ, na wɔambiza ngoane tendenle bɔbɔ, na wɔbiza kɛ ɛkpondɛ nrɛlɛbɛ nee ndelebɛbo wɔava wɔazie me menli ne mɔɔ ɛdi bɛ nwo zo belemgbunli la,

¹² meva nrɛlɛbɛ nee ndelebɛbo ne memaa wɔ. Mebamaa wɔ anwonyia nee agyadeɛ, na eza wɔanyia duma kpole mɔɔ arelemgbunli mɔɔ li ɛ nyunlu nee mɔɔ bavinde ɛ nzi la ɛnrɛnyia bie ɛlɛ a.”

Belemgbunli Sɔlɔmɔn tumi nee anwonyia

¹³ Yemɔti Sɔlɔmɔn vile Ɛdɛnkɛma Ndanlɛ Sua ne anyunlu na ɔrale Gyɛlusalɛm. Na akee ɔziele Yizilayɛ maanle ne kɔsɔɔti.

¹⁴ Sɔlɔmɔn boɔboale konle ehwili nloa na ɔnyianle menli mɔɔ ka mgbɔnwɔ la; ɔnyianle konle ehwili apenle ko ɛya nna, yɛɛ menli mɔɔ ka mgbɔnwɔ la apenle ngoko bulu nee nwiɔ, na ɔyele bɛ ɔziele azuamgbole ne mɔ mɔɔ ɔwɔ kɛ bɛsie konle ehwili zolɛ la azo, yɛɛ eza bie woale belemgbunli ne anwo ɛkɛ ne wɔ Gyɛlusalɛm.

¹⁵ Belemgbunli Sɔlɔmɔn manle ezukoa nvutuke nee dwɛtɛ fufule bule kɛ awolɛ la wɔ Gyɛlusalɛm, na ɔmanle sida mbaka bule kɛ Hyifɛla sikamɔ mbaka la.

¹⁶ Sɔlɔmɔn mgbɔnwɔ mɔɔ ɔlɛ la, ye gualilɛma tɔ bɛ fi Mɛzelae nee Selesea,

¹⁷ yɛɛ bɛtɔ ye konle ehwili ne mɔ bɛfi Yigyibiti. Bɛtɔ konle ehwili ko dwɛtɛ fufule ɛya nsia yɛɛ ɛkpɔnwɔ ko dwɛtɛ fufule ɛya ko abulanlu, na bɛazia bɛadɔne bɛ bɛamaa Hɛte nee Selea arelemgbunli.