2 Dw 1 - BAEBOLO ANZƐƐ BULUKU NWUANZANWUANZA

¹ Kɛlata ɛhye vi medame Nrenya Kpanyinli ne ɛkɛ. Melɛ mekamaa Raalɛkpa ne nee ɔ mra ne mɔ. Mekulo bɛ nɔhalɛ nu kpole kpalɛ. Tɛ me ngome a mekulo bɛ a, awie biala mɔɔ ze nɔhalɛ ne la kulo bɛ,

² ɔluakɛ nɔhalɛ ne de yɛ nu na ɔ nee yɛ badɛnla dahuu.

³ Nyamenle Selɛ ne nee Gyisɛse Kelaese, Selɛ ne Ara ne, ɛlo yɛ, ɛnwu yɛ anwunvɔne, na ɔmaa yɛ nzo nu ɛdwo yɛ dahuu wɔ nɔhalɛ nee ɛhulolɛ nu.

Nɔhalɛ nee ɛhulolɛ

⁴ Ɔyɛle me fɛ kpole kɛ menwunle kɛ ɛ mra ne mɔ bie mɔ li nɔhalɛ ne anzi, kɛmɔ Nyamenle Selɛ ne zele yɛ la.

⁵ Yemɔti, Raalɛkpa, mesɛlɛ wɔ, mɔɔ meka meahile wɔ la a le kɛ bɛmaa yɛ muala yɛhulo yɛ nwo ngoko ngoko. Mengɛlɛ mɛla fofolɛ membɛlɛ bɛ, kɛ mɛla dɛba ne mɔɔ mɔlebɛbo ne yɛ sa hanle ye la ala.

⁶ Ɛhulolɛ ɛhye a le kɛ yɛkɛli Nyamenle mɛla ne mɔ azo. Mɛla ne, kɛmɔ mɔlebɛbo ne bɛ muala bɛdele la, yemɔ a le kɛ bɛkɛdɛnla ɛhulolɛ nu.

⁷ Adalɛma dɔɔnwo ɛdwazo ewiade ɛleka muala. Bɛmɛ a le menli ne mɔɔ ɛnlie ɛndo nu kɛ Gyisɛse Kelaese rale kɛ sonla ala la. Sonla zɛhae le mɛlɛbɛla na ɔle Kelaese Kpɔvolɛ.

⁸ Bɛnlea bɛ nwo boɛ na bɛamminli mɔɔ bɛvɛ nwolɛ bɛnyia ye la, amaa bɛanyia bɛ ahatualɛ ne amuala.

⁹ Awie biala mɔɔ ɛnli Kelaese ngilehilelɛ ne azo, na ɔbɔ ɛbɛla mɔɔ ɔkulo la ɛnze Nyamenle. Awie biala mɔɔ di Kelaese ngilehilelɛ zo la ɛnwu Selɛ ne nee Ralɛ ne.

¹⁰ Saa awie ba bɛ ɛkɛ ne na ɔngilehile mɔɔ Kelaese hilehilele la a, bɛmmadie ye bɛkɔ bɛ azua nu; bɛmmayɛ ye akoaba bɔbɔ.

¹¹ Ɔluakɛ awie biala mɔɔ kɛlie ye la nee ye yɛ adwenle wɔ ye ninyɛndane ne mɔ ɛyɛlɛ nu.

Edwɛkɛ ne awieleɛ

¹² Melɛ edwɛkɛ dɔɔnwo meka mekile bɛ, noko akee menrɛhulo kɛ menwɔva kɛlata nee ɛnke menwɔhɛlɛ; me nye la kɛ ɔnrɛhyɛ na meara bɛ nwo lɔ na yɛava edwɛkɛ ne mɔ yɛali adwelie, na yɛ fɛlɛkolilɛ ne ali munli.

¹³ Bɛ kulovolɛ adiema raalɛ ne amra ne mɔ biza bɛ ahye.