2 Kɔl 8 - BAEBOLO ANZƐƐ BULUKU NWUANZANWUANZA

Kelaese ɛdoavolɛ debie ɛhyɛlɛ

¹ Mediema, yɛkpondɛ kɛ bɛnwu gyima mɔɔ Nyamenle ɛlolɛ ne ɛli wɔ asɔne ne mɔ mɔɔ wɔ Masidonea la anu la.

² Bɛhɔle sɔnea nu kpole wɔ ndenle dɔɔnwo anu, noko bɛlile fɛlɛko kpole. Ɛnee bɛnlɛ bie suzuamgba ɛdeɛ, noko bɛluale bɛ amaneɛnwunlɛ ne anu bɛvale ninyɛne bɛhyɛle, bɛhilele bɛ atiakunlukɛnlɛma.

³ Medi daselɛ kɛ bɛmanle ahyɛlɛdeɛ, kɛmɔ bɛkɛhola ala la, na bɛboale bɔbɔ bɛmanle ɔbole zolɛ. Bɛvale ɛhulolɛ

⁴ bɛtinlinle zo bɛkpale yɛ kyɛlɛ kɛ yɛmaa bɛ adenle yɛmaa bɛboa Nyamenle menli ne mɔɔ wɔ ɛhyianlɛ nu la.

⁵ Yɛ nye anla fee. Bɛlumuale bɛvale bɛ nwo bɛmanle Awulae, na akee ɔlua Nyamenle ɛhulolɛ zo bɛava bɛ nwo bɛamaa yɛdayɛ noko.

⁶ Zɔhane ati yɛzɛlɛ Taetɛse mɔɔ lumuale bɔle gyima ɛhye abo la kɛ ɔrazɔ zolɛ wɔ bɛ nwo lɔ na ɔboa bɛ ɔmaa bɛwie ɛhulolɛ ɛzonlenlɛ ɛhye.

⁷ Kɛmɔ debie biala anu bɛdi munli, wɔ diedi nu, ɛdendɛlɛ nu, adwenlenubukelɛ nu, bɛ nye mɔɔ ɛkpota bɛ ti anwo kɛ bɛboa, nee ɛhulolɛ mɔɔ bɛlɛ ye wɔ yɛ nwo la, zɔhane ala yɛɛ yɛ nye la kɛ bɛkɛhile bɛ atiakunlukɛnlɛma noko wɔ ɛlolɛ ɛzonlenlɛ ɛhye anu bɛkɛmaa ɔkɛbo zolɛ a.

⁸ Mengyehyɛ mɛla memmaa bɛ. Melɛ moalɛ mɔɔ awie mɔ anye ɛbolo ɛlɛboa la menea kɛ bɛ ɛhulolɛ si to kɔ la.

⁹ Ɔluakɛ bɛze kɛ Awulae Gyisɛse Kelaese ɛlolɛ ne si de la; ɔle sukoavolɛ, noko ɔlua bɛ ti ɔyɛle ɔ nwo ehyianli, amaa yealua ye ehyia ne azo yeayɛ bɛ sukoavolɛma.

¹⁰ Me folɛ mɔɔ metu bɛ wɔ edwɛkɛ ɛhye anwo la a le kɛ, ɔle kpalɛ kɛ bɛkɛwie gyima mɔɔ ɛvolɛ ko mɔɔ ɛraze ɛhɔ la anu bɛhulole kɛ bɛkɛyɛ la yɛ kɛkala. Bɛmɛ a bɛlumuale bɛnyianle nwolɛ ɛhulolɛ kɛ bɛkɛyɛ a, yɛɛ bɛdabɛ noko a bɛlumuale bɛbɔle ɔ bo a.

¹¹ Bɛhɔ zo bɛli gyima ne bɛhɔ awieleɛ, amaa mɔdenle mɔɔ bɛbɔle bɛhyehyɛle la awie kɛnlɛma kɛ bɛvale mɔɔ bɛlɛ ye la bɛwiele gyima ne.

¹² Ɔluakɛ saa ɔwɔ bɛ nuhua kɛ bɛkɛmaa debie a, ɛnee mɔɔ bɛlɛ ye la azo a Nyamenle balua alie bɛ ahyɛlɛdeɛ ne a. Ɔnrɛnlea mɔɔ bɛnlɛ ye la azo ɔnrɛlie.

^13-14 Menzoa bɛ adesoa kpole memmaa awie mɔ anwo ɛndɔ bɛ; na ɔle kpalɛ kɛ ɛnɛ mɔɔ bɛlɛ ye dɔɔnwo la, bɛkɛboa bɛdabɛ mɔɔ bɛnlɛ bie la, amaa mekɛ mɔɔ bɛdabɛ noko bɛkɛhyia la menli mɔɔ lɛ bie dɔɔnwo la aboa bɛ. Ɔba ye zɛhae a ɛnee moalɛ ne ɛyɛ sɛsɛ.

¹⁵ Nyamenle Edwɛkɛ ne se, “Sonla mɔɔ sesale bɛ dɔɔnwo la annyia bɛ molozo, yɛɛ sonla mɔɔ sesale ekyi la angyia.”

Taetɛse nee ɔ gɔnwo mɔ

¹⁶ Yɛyɛ Nyamenle mo somaa kɛ yemaa Taetɛse noko ɛnyia ɛhulolɛ kɛ yɛdayɛ la, kɛ ɔba yearaboa bɛ a.

¹⁷ Tɛ kɛ yekponle mɔɔ yɛbizale ye la azo angome ɔ, na ɔlɛba bɛ nwo lɔ kɛ sonla mɔɔ ɔdaye ɔlɛtu ɔ ti anwo adenle la.

¹⁸ Yɛlɛsoa ye nee adiema ne mɔɔ asɔne ne mɔ amuala di ye eni wɔ Edwɛkpa ne nolobɔlɛ nwo la.

¹⁹ Yeanga ye zɔhane, asɔnema ne ɛnlea nu ɛye ye na bɛyɛ ye kɛ ɔ nee yɛ ɛkpɔsa ɛyɛ ɛhulolɛ ɛzonlenlɛ gyima ɛhye, yɛva yɛde Awulae anyunlu, na yɛhile kɛ yɛkulo kɛ yɛboa.

²⁰ Yɛlɛbɔ mɔdenle kɛ awie ɛnrɛnyia edwɛkɛ ɛtane biala ɛnrɛha wɔ kɛ yɛsi yɛnea ahyɛlɛdeɛ kɛnlɛma ye azo la.

²¹ Debie titile mɔɔ gyi yɛ nye zo la a le kɛ yɛkɛyɛ mɔɔ tenrɛ wɔ Nyamenle nee menli nyunlu la.

²² Yemɔti yɛlɛsoa bɛ nee yɛ muala yɛ diema ne mɔɔ mekɛ dɔɔnwo ne ala yɛzɔ ye yɛnlea na yɛnwu kɛ ɔkulo kɛ dahuu ɔboa la bɛ nwo lɔ. Kɛkala yelie bɛ yeli, yɛɛ yenyia ɛhulolɛ kpole kɛ ɔboa.

²³ Taetɛse ɛdeɛ, ɔle me gɔnwo mɔɔ yɛbɔ nu yɛyɛ gyima yɛboa bɛ a; mediema mɔɔ nee ye ɛlɛba la gyigyi asɔne ne mɔ agyakɛ anu, yɛɛ bɛte Kelaese anyunlu.

²⁴ Zɔhane ati bɛhile bɛ ɛhulolɛ, amaa asɔne ne mɔ ali nwolɛ daselɛ, na bɛanwu kɛ yɛanva bɛ yɛandu yɛ nwo mgbane.