2 Kɔl 7 - BAEBOLO ANZƐƐ BULUKU NWUANZANWUANZA

¹ Ayi mɔ, ɛwɔkɛ mɔɔ Nyamenle ɛbɔ yɛ la ɛne. Yemɔti, bɛmaa yɛwowo debie biala mɔɔ wɔ yɛ nwo mɔɔ gua yɛ sonlabaka ye anzɛɛ yɛ ɛkɛla ne mɔ anwo evinli la yɛgua, yɛzulo Nyamenle, na yɛmaa yɛ ɛbɛlabɔlɛ nwo ɛde bɔkɔɔ.

Pɔɔlo di fɛlɛko

² Bɛbuke bɛ munli nu bɛmaa yɛ; yɛtɛyɛle awie biala ɛtane, yɛtɛsɛkyele awie biala, yɛɛ yɛtɛdile awie biala amile.

³ Menga ɛhye membu bɛ fɔlɛ, na kɛmɔ meha ye dɛba la, saa yɛde ngoane nu o, yɛwu o, yɛlɛ bɛ nwo ɛhulolɛ kpalɛ mɔɔ kile kɛ dahuu yɛle ko a.

⁴ Medie bɛ medi, mefa bɛ metu me nwo! Me nwo tɔ me, yɛɛ wɔ yɛ anwongyelelɛ muala anu medi fɛlɛko kpole.

⁵ Mɔɔ yɛrale Masidonea la, yɛ nwo andɔ yɛ kpalɛ biala, ɔluakɛ ɛnee ɛleka biala mɔɔ yɛkɛhɔ la yɛyia ngyegyelɛ; gua zo a, konle; sua nu a, ɛzulolɛ ngome.

⁶ Noko Nyamenle mɔɔ kyekye bɛdabɛ mɔɔ bɛ rɛle ɛbɔ la arɛle la, luale Taetɛse ɛralɛ ne azo kyekyele yɛ rɛle,

⁷ yɛɛ tɛ ye ɛralɛ ne angome, na ye amaneɛ bɔbɔ mɔɔ ɔrabɔle mɔɔ fane kɛ bɛzile bɛkyekyele ɔ rɛle, bɛ nwo mɔɔ dɔ me, me nwo nyane mɔɔ bɛlɛdi, nee bɛ nye mɔɔ ɛbolo kɛ bɛpepɛ bɛalie me la ɛmaa kɛkala me nye ɛlie kpole kpalɛ.

⁸ Na saa me kɛlata ne manle bɛ rɛle bɔle bɔbɔ a, menli nwolɛ nyane kɛ mengɛlɛle a. Noko akee menlile nyane wɔ mekɛ mɔɔ menwunle kɛ kɛlata ne ɛbɔ bɛ rɛle mekɛ ekyi bie la.

⁹ Kɛkala ɛdeɛ, medi fɛlɛko, tɛ kɛ membɔle bɛ rɛle la ati ɔ, na kɛ bɛ rɛle ɛbɔlɛ ne manle bɛnlunle bɛ nwo. Nyamenle luale bɛ rɛle ɛbɔlɛ ne azo lile gyima, yemɔti yɛanyɛ bɛ ɛtane.

¹⁰ Ɔluakɛ nyanelilɛ mɔɔ Nyamenle ze nuhua la maa sonla nu ɔ nwo na ɔnyia ngoane, ɔmmaa ɔnvu ɔ nwo; ewiade ye anu nyanelilɛ maa ewule.

¹¹ Bɛnlea gyima mɔɔ Nyamenle vale bɛ rɛle ne mɔɔ bɔle la lile a: bɛ nye bolole edwɛkɛ ne anwo manle bɛhilele kɛ bɛ nwo ɛnle nu! Nea bɛ ɛya mɔɔ bɛvale, ɛzulolɛ mɔɔ bɛnyianle ye bɛ nu, bɛ nwo mɔɔ dɔ me kɛ bɛ kunlu a anrɛɛ mewɔ lɔ, bɛ nwo mɔɔ bɛyelele kɛ bɛkɛbɔ ɛbɛla kpalɛ, nee kɛ bɛzile bɛdeanle bɛdabɛ mɔɔ bɛlile ɛtane la. Adenle biala anu bɛyɛle bɛhilele kɛ bɛnli fɔlɛ fee wɔ edwɛkɛ ne anwo.

¹² Yemɔti, saa mengɛlɛle bɛ kɛlata ne a, ɛnee tɛ ahenle mɔɔ yɛle ɛtane ne la ati ɔ, anzɛɛ ahenle mɔɔ bɛyɛle ye ɛtane ne la ati ɔ; mengɛlɛle, amaa bɛ ɛhulolɛ ne mɔɔ bɛlɛ ye wɔ me nwo la ala ali amaa bɛ wɔ Nyamenle anyunlu.

¹³ Zɔhane ati yɛ rɛle ɛkyekye. Tɛ yɛ rɛle mɔɔ ɛkyekye la angome, na yɛ nye liele kpole wɔ Taetɛse anyelielɛ mɔɔ ɔnyianle ye, nee ɔ rɛle mɔɔ bɛ muala bɛboale bɛkyekyele la anwo.

¹⁴ Saa mendule me nloa anu mengilele ye wɔ bɛ nwo a, bɛangua me nyunlu aze. Debie biala anu yɛka nɔhalɛ ne yɛkile bɛ, na ɛhye ati yɛɛ yɛ nloa anu mɔɔ yɛdule yɛhilele Taetɛse la ɛyɛ nɔhalɛ a.

¹⁵ Yemɔti ɔlɛ bɛ nwo ɛhulolɛ kpole, na ɔkakye bɛ muala bɛ tieyɛ nee kɛ bɛzile bɛvale ɛzulolɛ nee anwowozolɛ bɛyɛle ye akɔaba la.

¹⁶ Medi fɛlɛko kɛ mekola medie bɛ medi bɔkɔɔ a.