2 Kɔl 6 - BAEBOLO ANZƐƐ BULUKU NWUANZANWUANZA

¹ Kɛmɔ yɛ nee Kelaese bɔ nu yɛ gyima la, yɛbodo yɛsɛlɛ bɛ kɛ bɛmmamaa Nyamenle ɛlolɛ ne mɔɔ bɛ sa ɛha ye la yɛ mgbane.

² Bɛdie mɔɔ Nyamenle se la; ɔse, “Mekɛ ne dwule mɔɔ ɔwɔ kɛ mese bɛ anwunvɔne la, mendiele bɛ. Mekɛ ne dwule mɔɔ ɔwɔ kɛ medie bɛ ngoane la, memboale bɛ.” Bɛdie ɛ! Nyamenle ɛlolɛ mekɛ ne a le ɛnɛ. Ɛnɛ a le ngoanelielɛ kenle ne a.

³ Yɛmkpondɛ kɛ yɛtenda awie agyakɛ anu na awie anyia yɛ gyima ne anwo edwɛkɛ ɛtane aha.

⁴ Wɔ yɛ nyɛleɛ biala anu yɛfa abotane yɛgyinla ngyegyelɛ, anwongyelelɛ nee abodelɛ biala anloa, yɛkile kɛ yɛle Nyamenle sonvolɛma.

⁵ Bɛbila yɛ mbaka, bɛgua yɛ efiade na bɛwudo yɛ bagua nu; bɛmaa yɛyɛ gyima ɛsesebɛ, yɛsi epe, yɛɛ bɛkye yɛ ɛhɔne.

⁶ Noko ɔlua yɛ anwondelɛ, nrɛlɛbɛ, abotane, atiakunlukpalɛ nee Nyamenle Sunsum Nwuanzanwuanza ne nee yɛ nɔhalɛ ɛhulolɛ,

⁷ yɛ nɔhalɛ nrɛlaleɛ ne, nee Nyamenle tumi ne azo yɛla yɛ nwo ali yɛhile kɛ yɛle Nyamenle sonvolɛma. Pɛlepɛlelilɛ a le yɛ konle dadeɛ mɔɔ yɛfa yɛko na yɛfa yɛpepɛ yɛdie yɛ nwo a.

⁸ Bɛdi yɛ eni yɛɛ bɛgua yɛ nyunlu aze; bɛbɔ yɛ aholoba yɛɛ bɛye yɛ ayɛlɛ. Bɛbu yɛ alanema, noko yɛdi nɔhalɛ;

⁹ bɛyɛ kɛ bɛnze yɛ, noko bɛ muala bɛze yɛ; bɛfa yɛ kɛ yɛwu bɔbɔ a, bɛnlea, yɛtɛte aze. Saa bɛtwi yɛ nyunlu a, bɛtɛkunle yɛ.

¹⁰ Saa bɛbɔ yɛ rɛle a, yɛ nye die yɛ nwo dahuu; ɔzɔho kɛ yɛle ehyianvolɛma, noko yɛyɛ menli dɔɔnwo sukoavolɛma; ɔzɔho kɛ yɛnlɛ bie, noko nɔhalɛ, yɛlɛ debie biala.

¹¹ Me gɔnwo mɔ Kɔlentema! Yɛbuke yɛ munli nu a yɛlɛtendɛ yɛahile bɛ a.

¹² Yɛnzi bɛ aze; saa azezilɛ bie wɔ ɛkɛ a ɛnee ɔvi bɛdabɛ bɛ atiakunluwɔzo.

¹³ Melɛtendɛ meahile bɛ kɛ metendɛ mekile me mra la. Yemɔti bɛbuke bɛ munli nu, kɛmɔ yɛyɛ yɛmaa bɛ la.

Kɔkɔbɔlɛ wɔ bozonle ɛzonlenlɛma anwo

¹⁴ Bɛ nee bɛdabɛ mɔɔ bɛnlie Kelaese bɛnli la mmatu. Kɛ ɔkɛyɛ na kpalɛ nee ɛtane adila agɔnwolɛ ɛ? Kɛ ɔkɛyɛ na wienyi nee awozinli abɔ nu adɛnla ɛ?

¹⁵ Kɛ ɔkɛyɛ na Kelaese nee Abɔnsam anloa azɛ bɛ nwo ɛ? Duzu a diedinli nee bozonle ɛzonlenlɛnli lɛ ye yɛ a?

¹⁶ Duzu ngitanwo a wɔ Nyamenle Ɛzonlenlɛ Sua nee awozonle ɛzonlenlɛ sua avinli a? Yɛle tease Nyamenle ne ɛzonlenlɛ sua! Kɛ ɔdaye Nyamenle mumua ne yeha la ɛne. Ɔse, “Mebabu me awuke wɔ me maanlema avinli na me nee bɛ adɛnla; Mebayɛ bɛ Nyamenle na bɛayɛ me menli.”

¹⁷ Yemɔti kɛ Awulae se la ɛne, “Bɛgyakyi bɛ na bɛhwe bɛ nwo bɛvi bɛ nwo. Bɛmmafa bɛ sa bɛka debie mɔɔ anwo ɛnde la, na menwɔlie bɛ.

¹⁸ Mebayɛ bɛ ze, na bɛayɛ me mra mrenya nee mraalɛ, kɛ Tumivolɛ Awulae se la ɛne!”