2 Kɔl 5 - BAEBOLO ANZƐƐ BULUKU NWUANZANWUANZA

¹ Yɛze kɛ saa bɛgolo yɛ nwonane sua ye mɔɔ yɛde nu la bɛgua aze kɛ ndanlɛ sua wɔ ewiade ye anu a, Nyamenle bamaa yɛ sua mɔɔ bɛanva ɛsalɛ bɛanzi, na ɔwɔ ɛkɛ ne dahuu la wɔ anwuma.

² Yɛsu yɛ kunlu, ɔluakɛ yɛkulo kɛ bɛfa yɛ anwuma nwonane sua ne bɛkpolo yɛ wɔ mekɛ mɔɔ yɛwɔ aze ɛke la,

³ amaa saa yɛfa yɛkpolo a bɛanwu kɛ yɛnlɛ yɛ nwo zɔ.

⁴ Mekɛ mɔɔ yɛde ndanlɛ sua ɛhye anu la, yɛsu yɛ kunlu kpalɛ wɔ anwongyelelɛ nu; tɛ kɛ asɛɛ bɛkpa yɛ azɛlɛ ye azo ndanlɛ sua bɛvi yɛ nwo ɔ, na yemɔ a le kɛ, yɛkpondɛ kɛ bɛfa anwuma ndanlɛ sua ɛdeɛ fofolɛ ne bɛkpolo yɛ, amaa ngoane aheda mɔɔ wu la azo.

⁵ Nyamenle a ɛziezie yɛ ɛmaa ngakyile ɛhye a, na yeva ye Sunsum ne yeli ninyɛne mɔɔ ɔbava yeamaa yɛ la anwo agyinlanu.

⁶ Zɔhane ati yɛlɛ akɛnrasesebɛ dahuu. Yɛze kɛ mekɛ mɔɔ yɛde nwonane sua ɛhye anu ala la, ɛnee yɛ nee Awulae yɛ avinli twe.

⁷ Ɔluakɛ yɛfa diedi a yɛbɔ yɛ ɛbɛla a, na tɛ deɛ mɔɔ ɛnyelɛ nwu ye la ɔ.

⁸ Yɛlɛ akɛnrasesebɛ na yɛkɛhulo ye kpalɛ kɛ yɛkɛvi nwonane sua ɛhye anu na yɛ nee Awulae kɛhɔdɛnla.

⁹ Debie mɔɔ hyia kpalɛ la a le kɛ, saa yɛwɔ yɛ sua nu ɛke o, anzɛɛ nehane o, yɛkɛzɔ ɔ nye.

¹⁰ Ɔluakɛ ɔwɔ kɛ yɛ muala yɛfinde Kelaese anyunlu na ɔbua yɛ ndɛne, amaa yɛ nuhua ko biala asa aha ahatualɛ mɔɔ ɔfɛta la, kpalɛ o, ɛtane o, kɛmɔ ye ɛbɛla mɔɔ ɔdaye ɔlua ye sonlabaka ye azo yebɔ la de la.

Yɛdua Kelaese anwo zo yɛfa Nyamenle agɔnwolɛ

¹¹ Kɛmɔ yɛze kɛ Nyamenlezulolɛ si de la ati, yɛbɔ mɔdenle kɛ yɛkɛmaa menli kɛzulo Nyamenle; na kɛ yɛmɛ yɛde la, Nyamenle ɔdaye ɔze, yɛɛ meze kɛ bɛdabɛ bɛze ye wɔ bɛ adwenle nu.

¹² Tɛ kɛ asɛɛ yɛkulo kɛ yɛkanvo yɛ nwo yɛkile bɛ bieko ɔ, na yɛlɛbɔ mɔdenle kɛ bɛkɛva yɛ bɛkɛdu bɛ nwo, na bɛahola bɛanyia edwɛkɛ bɛaha bɛahile bɛdabɛ mɔɔ bɛfa menli gyinlabelɛ a bɛtu bɛ nloa anu na bɛnva bɛ subane a bɛtu bɛ nloa anu la.

¹³ Asoo yɛzɛ? Saa yɛzɛ a, ɛnee Nyamenle ati ɔ, yɛɛ saa yɛ adwenle la ɛkɛ ne a, ɛnee ɔla ɛkɛ ɔmaa bɛmɛ.

¹⁴ Ɔluakɛ Kelaese ɛhulolɛ ne a sie yɛ a, ɔboalekɛ yɛdie yɛto nu kɛ sonla ko wule manle menli kɔsɔɔti, na ye zɔhane ati menli kɔsɔɔti ɛwu.

¹⁵ Ɔwule ɔmanle menli muala, amaa bɛdabɛ mɔɔ bɛde ngoane nu la andɛnla ammaa bɛ ngome bɛ nwo, na bɛadɛnla bɛamaa sonla ne mɔɔ bɛ ti a ɔwule na bɛdwazole ye bɛrale ngoane nu la.

¹⁶ Ɛhye ati, ɔvi ɛnɛ mɔɔ kɔ la, yɛnnea awie biala anyunlu yɛmbua ndɛne. Saa mekɛ bie mɔɔ ɛze ɛhɔ la yɛbuale Kelaese ndɛne wɔ zɔhane adenle zo bɔbɔ a, ɛnɛ yɛnyɛ ye zɔhane bieko.

¹⁷ Zɔhane ati awie biala mɔɔ le Kelaese ɛdeɛ la le abɔdeɛ fofolɛ; dɛba ne ɛpɛ nu ɛhɔ, fofolɛ ɛra.

¹⁸ Nyamenle a ɛyɛ ɛhye amuala a, na yelua Kelaese anwo zo yeyɛ yɛ ɔ gɔnwo mɔ, yɛɛ yemaa yɛ gyima kɛ yɛdayɛ noko yɛhwe menli yɛrayɛ bɛ ɔ gɔnwo mɔ.

¹⁹ Yemɔ a le kɛ, Nyamenle lua Kelaese anwo zo ɛlɛtwe menli muala ayɛ bɛ ɔ gɔnwo mɔ. Nyamenle ambu bɛ ɛtane ne mɔ anwo mgbonda antia bɛ na yeva edwɛkɛ ne mɔɔ fane kɛ menli si yɛ ɔ gɔnwo mɔ la yewula yɛ sa nu.

²⁰ Yɛle Kelaese agyakɛ anu gyinlavolɛma, na ɔlua yɛ nwo zo Nyamenle ɛlɛtu folɛ. Zɔhane ati yɛgyi Kelaese agyakɛ anu yɛbodo yɛsɛlɛ bɛ kɛ bɛmaa Nyamenle adenle bɛmaa ɔhakyi bɛ kɛ bɛnle agbɔvolɛ na bɛle ɔ gɔnwo mɔ.

²¹ Kelaese anyɛ ɛtane, noko ɔlua yɛmɛ yɛ ti Nyamenle vale ye yɛle ɛtane mumua ne, amaa ɔlua ɔ nwo zo yɛanyia Nyamenle kpalɛyɛlɛ ne.