2 Kɔl 2 - BAEBOLO ANZƐƐ BULUKU NWUANZANWUANZA

¹ Yemɔti menyɛle me adwenle kɛ menrɛra bɛ nwo lɔ bieko na meabɔ bɛ rɛle.

² Ɔluakɛ saa mebɔ bɛ rɛle a, nwane a kɛlielie me nye a? Kyesɛ menli ko ne ala mɔɔ membɔle bɛ rɛle la ala.

³ Ɛhye ati yɛɛ mengɛlɛle bɛ kɛlata ɛhendeɛ ne a, meangulo kɛ menwɔra na menli mɔɔ anrɛɛ kɛlielie me nye la abɔ me rɛle. Ɔluakɛ meze ye wienyi kɛ me nye die a, ɛnee bɛdabɛ noko bɛ nye ɛlie.

⁴ Menvale nyanelilɛ, arɛlebɔlɛ nee monle a mengɛlɛle bɛ a, amaa bɛanwu kɛ mesi mekulo bɛ la, na tɛ kɛ asɛɛ mekulo kɛ mebɔ bɛ rɛle la ati ɔ.

Sonla ne mɔɔ ɛvo la hyia fakyɛ

⁵ Saa awie ɛmaa arɛlebɔlɛ bie ɛra a, menwudu ye ɛdeɛ, noko tɛ me ngome a yebɔ me rɛle a, bɛ muala yɛɛ yebɔ bɛ rɛle a.

⁶ Ɔle kpalɛ bɔkɔɔ ɔmaa sonla zɔhane kɛ bɛ nuhua dɔɔnwo ne ala ɛhwi ɔ nyunlu a.

⁷ Zɔhane ati bɛva ɔ nwo edwɛkɛ bɛhyɛ ye na bɛkyekye ɔ rɛle, amaa yeanli nyane somasoma yeangyakyi diedi ne anu.

⁸ Mesɛlɛ bɛ, bɛmaa ɔnwu ye kɛ amgba bɛkulo ye.

⁹ Mengɛlɛle bɛ kɛlata ɛhendeɛ ne, amaa ɔlua zo meanwu kɛ bɛzile bɛgyinlanle sɔnea ne anloa la, na eza meanlea kɛ saa dahuu bɛdi me ngilehilelɛ ne mɔ azo a.

¹⁰ Saa bɛfa awie anwo edwɛkɛ bɛkyɛ ye a, ɛnee medame noko meva mehyɛ ye. Saa ɔhyia kɛ mefa awie anwo edwɛkɛ mekyɛ ye a, meyɛ ye zɔhane wɔ bɛ ti wɔ Kelaese anyunlu,

¹¹ amaa Seetan anli yɛ nwo zo konim, ɔluakɛ yɛze ye ndenle ne mɔ amuala.

Pɔɔlo anwo andɛ ye wɔ Tulowase

¹² Mɔɔ mendwule Tulowase kɛ mekabɔ Kelaese anwo Edwɛkpa ne nolo la, menwunle kɛ Awulae ɛbuke adenle ɛmaa me kɛ menli gyima wɔ ɛkɛ.

¹³ Noko me nwo andɛ me kpalɛ biala, ɔluakɛ meannwu me diema Taetɛse wɔ ɛkɛ. Yemɔti me nee ɛkɛ ne amra lile nrɛlaleɛ na mendoale zolɛ mengɔle Masidonea.

Kelaese maa yɛdi konim

¹⁴ Yɛyɛ Nyamenle mo kɛ dahuu ɔfa yɛ kɛ menli mɔɔ Kelaese ɛhye yɛ nuokɛ na ɔfa yɛ ɔto Kelaese konimlilɛ ɛlɔnwɔne, na ɔdua yɛ nwo zo ɔmaa Kelaese anwo edwɛkɛ kpalɛ ne wolowolo ɛleka biala kɛ debie evuanlɛ la.

¹⁵ Ɔluakɛ yɛle kɛ ɛyɛlɛ evuanlɛ mɔɔ Kelaese ɛva ɛbɔ azu ɛmaa Nyamenle, na ye evuanlɛ ne bɔ wolowolo bɛdabɛ mɔɔ bɛlɛdie bɛ ngoane nee bɛdabɛ mɔɔ bɛlɛminli la;

¹⁶ ɔbɔ evuanlɛ mɔɔ maa ngoane la ɔmaa bɛdabɛ mɔɔ bɛlɛdie bɛ ngoane la, yɛɛ ɔbɔ nvoanle mɔɔ maa ewule la ɔmaa bɛdabɛ mɔɔ bɛlɛminli la. Na nwane bɔbɔ a kɛhola gyima zɛhae yɛ a?

¹⁷ Yɛmɛ, yɛnle kɛ menli mɔɔ fa Nyamenle edwɛkɛ ne si kongo la, ɔboalekɛ Nyamenle a ɛzoa yɛ a, yɛɛ yɛgyinla ɔ nyunlu yɛtendɛ kɛ Kelaese sonvolɛma.