2 Kɔl 1 - BAEBOLO ANZƐƐ BULUKU NWUANZANWUANZA

¹ Pɔɔlo, mɔɔ Nyamenle ɛhulo ɛyɛ ye Kelaese Gyisɛse ɛzoanvolɛ la, nee yɛ diema Temɔte a ɛlɛkɛlɛ kɛlata ɛhye ahɔmaa Nyamenle menli ne mɔɔ wɔ suakpole Kɔlente azo, nee Nyamenle menli ne amuala mɔɔ wɔ Akaya (Giliki) maanle ne kpokpoti anu la a.

² Yɛsɛlɛ kɛ yɛ Ze Nyamenle ne nee Awulae Kelaese Gyisɛse ɛlo bɛ na ɔmaa bɛ anzonudwolɛ.

Pɔɔlo yɛ Nyamenle mo

³ Bɛmaa yɛyɛ Nyamenle, yɛ Awulae Kelaese Gyisɛse ɔ Ze ne, anwunvɔnezelɛ Selɛ ne nee arɛlekyekyelɛ Nyamenle ne mo.

⁴ Ɔkyekye yɛ rɛle wɔ amaneɛnwunlɛ kɔsɔɔti anu na yɛdua ye arɛlekyekyelɛ ne azo yɛkyekye bɛdabɛ mɔɔ bɛ nwo ɛhyele bɛ wɔ ndenle ngakyile dɔɔnwo anu la arɛle.

⁵ Kɛmɔ yɛ nee Kelaese nwu ye amaneɛ ne mɔ la, zɔhane ala yɛɛ ɔlua ɔ nwo zo yɛ nee ye nyia ye arɛlekyekyelɛ ne mɔ a.

⁶ Saa yɛnwu amaneɛ a, ɛnee bɛ ngoanelielɛ nee bɛ arɛlekyekyelɛ ti ɔ; yɛɛ saa bɛkyekye yɛ rɛle a, ɛnee bɛkyekye bɛdabɛ noko bɛ rɛle, na bɛmaa bɛ anwosesebɛ, amaa bɛava abotane bɛagyinla amaneɛnwunlɛ ko ne ala mɔɔ yɛdayɛ yɛgyi bie anwo la anloa.

⁷ Yemɔti yɛ nye la bɛ nwo zo ɛsesebɛ; yɛze kɛ, kɛmɔ bɛ nee yɛ nwu yɛ amaneɛnwunlɛ ne mɔ la, zɔhane ala yɛɛ bɛ nee yɛ nyia yɛ arɛlekyekyelɛ ne mɔɔ yɛ sa ka ye noko la a.

⁸ Mediema, yɛkpondɛ kɛ bɛnwu kɛ yɛ nwo zile hyelele yɛ wɔ Ehyea maanzinli ne anu la. Yɛ nwo hyelele yɛ kpole manle ɔbole yɛ nwo zo mɔɔ ɔhale yɛ nee ewule ala.

⁹ Yɛvale ye kɛ bɛbua yɛ ewule fɔlɛ bɛwie ala ɛne. Ɛhye zile amaa yɛdayɛ yɛanzi yɛ kɛnra, na yɛava yɛ nwo amuala yɛado Nyamenle ne mɔɔ dwazo mɔwuamra la anwo zo.

¹⁰ Ewule ɛzulolɛ zɛhae anu yɛɛ ɔyele yɛ ɔvile a, yɛɛ ɔkɛye yɛ nu somaa; yɛɛ eza yɛ rɛle wɔ ye nu kɛ ɔkɛye yɛ nu bieko,

¹¹ ɔlua bɛ nzɛlɛlɛ ti. Zɔhane ala yɛɛ menli dɔɔnwo bayɛ Nyamenle mo wɔ yɛ ti, kɛ ɔlua menli somaa nzɛlɛlɛ zo yelo yɛ ɛlolɛ kpole zɛhae a.

Pɔɔlo kakyi ye ngyehyɛlɛ ne mɔ

¹² Mɔɔ yɛfa yɛtu yɛ nwo la a le ɛhye: yɛ ti kanrɛlɛ ne di daselɛ kɛ yɛlua Nyamenle nwuanzanwuanzayɛlɛ nee nɔhalɛlilɛ, nee Nyamenle ɛlolɛ ne tumi zo yɛɛ yɛfa yɛbɔ yɛ ɛbɛla wɔ ewiade ye anu a, bɔbɔ wɔ bɛ avinli, na tɛ ewiade nrɛlɛbɛ zo a yɛlua a.

^13-14 Yɛlɛ edwɛkɛ mɔɔ bɛkola ye kenga na bɛte ɔ bo la a yɛlɛkɛlɛ bɛ a. Me nye la kɛ mɔɔ kɛkala bɛte ɔ bo afoa afoa la, akee bɛbade ɔ bo kpalɛ, amaa yɛ Awulae Gyisɛse ɛralɛ bieko Kenle ne, bɛahola bɛava yɛ bɛadu bɛ nwo kɛmɔ yɛkola yɛfa bɛ yɛtu yɛ nwo la.

¹⁵ Adwenle ɛhye a wɔ me ti anu ɛsesebɛ mɔɔ manle menlumuale mengyehyɛle kɛ mebarakpɔla bɛ, amaa bɛanyia nyilalɛ mɔnwo la.

¹⁶ Ɔluakɛ menyɛle kɛ saa mese meahɔ Masidonea a mebamakyi bɛ nwo ɛkɛ, yɛɛ eza saa mevi Masidonea mesia meara a meamakyi bɛ nwo ɛkɛ ne bieko, amaa bɛagua me adenle bɛamaa meahɔ Dwudiya.

¹⁷ Yemɔti ngyehyɛlɛ ɛhye mɔɔ menyɛle la kile kɛ mele sonla mɔɔ meka a menyɛ ɔ? Anzɛɛ meyɛ me ngyehyɛlɛ kɛ adalɛ sonla bie mɔɔ meka kɛ “ɛhɛe” a ɛnee mekile “kyɛkyɛ” ɔ?

¹⁸ Kɛmɔ Nyamenle le nɔhalɛ, na yɛkola yɛfa yɛ rɛle yɛwula ye nu la, me ɛwɔkɛ ne mɔɔ membɔle bɛ la ɛnle ɛwɔkɛ mɔɔ meka “ɛhɛe” a ɛnee mekile “kyɛkyɛ” a.

¹⁹ Ɔluakɛ Gyisɛse Kelaese mɔɔ le Nyamenle Ara ne, mɔɔ me nee Seleveenɛse nee Temɔte yɛbɔle ɔ nwo edwɛkɛ ne nolo yɛhilele bɛ la, ɛnle “Ɛhɛe” nee “Kyɛkyɛ” sonla. Ɔle Nyamenle nu “Ɛhɛe”;

²⁰ ɔluakɛ yemɔ a ɔle Nyamenle ɛwɔkɛ ne mɔ anu “Ɛhɛe” ne a. Ɛhye ati a yɛdua Gyisɛse Kelaese anwo zo yɛka “Amen” ne yɛwula Nyamenle anyunlunyia a.

²¹ Nyamenle ɔdaye a ɔsi yɛ nee bɛdabɛ pi wɔ Kelaese ati a; Nyamenle ɔdaye mumua ne a yeye yɛ yezie ɛkɛ,

²² yeyɛ yɛ nzonlɛ yemaa ɔ nwo, na yeva ye Sunsum Nwuanzanwuanza ne yewula yɛ ahonle nu kɛ ninyɛne mɔɔ kenle bie ɔbava yeamaa yɛ la amuala anwo awoba a.

²³ Nyamenle di daselɛ, yɛɛ ɔze me ti anu! Memkpondɛ kɛ mebɔ bɛ rɛle la ati yɛɛ menyɛle me adwenle kɛ menrɛra Kɔlente a.

²⁴ Tɛ kɛ asɛɛ yɛkile bɛ debie mɔɔ ɔwɔ kɛ bɛdie bɛdi la ɔ, ɔluakɛ bɛlɛ diedi ne anu kpundii. Yɛ nee bɛ a ɛlɛyɛ gyima ne a wɔ bɛ kpalɛyɛlɛ ti.