1 Tɛs 5 - BAEBOLO ANZƐƐ BULUKU NWUANZANWUANZA

Bɛziezie bɛ nwo bɛhendɛ Awulae ɛralɛ ne

¹ Mediema, ɔngyia kɛ yɛkɛhɛlɛ bɛ wɔ mekɛ nee ɛlobɔ holɛ ko mɔɔ ɛhye mɔ bazi la anwo.

² Ɔluakɛ bɛdabɛ bɛze kɛ Awulae Kenle ne bara kɛ awule ba bawua nɔɔzo la.

³ Mekɛ mɔɔ menli kɛdwenle kɛ akee “Debie biala ɛla boɛ” la, mekɛ ne anu ala yɛɛ munzule ne bazi a. Biala ɛnrɛvi ɛsalɛ, ɔbayɛ arɛlevilɛ nu kɛ raalɛ mɔɔ ako ɛha ye la.

⁴ Noko ayi mɔ, bɛmɛ bɛnde awozinli nu na Kenle ne ali bɛ nvunu kɛ awule la.

⁵ Bɛ muala bɛle wienyi nu menli, mɔɔ kile kɛ bɛle alehyenlɛ nu menli.

⁶ Yemɔti, bɛmmamaa yɛdafe kɛ ebia mɔ la; ɔwɔ kɛ yɛmaa yɛ nye gyinla zolɛ na yɛyɛ yɛ nye gyɛlɛmgbɛɛnye.

⁷ Ɔluakɛ menli mɔɔ dafe la da nɔɔzo, yɛɛ bɛdabɛ mɔɔ bɛno nza bɛbo la tinda nɔɔzo.

⁸ Na yɛmɛ, yɛle alehyenlɛ nu amra, yemɔti bɛmaa yɛzie yɛ nye gyɛlɛmgbɛɛnye na yɛva diedi nee ɛhulolɛ yɛyɛ bulalɛ enyinlike yɛbutu yɛ kɛnra azo, na yɛva yɛ ngoane ɛnyianlɛ nwo anyelazo yɛhakyi bulalɛ kyɛlɛ yɛzoa.

⁹ Nyamenle angyehyɛ kɛ yɛranwu amaneɛ wɔ ye ɛya ne anu. Yevɛlɛ yɛ kɛ yɛralua yɛ Awulae Gyisɛse Kelaese anwo zo yɛnyia ngoane.

¹⁰ Gyisɛse wule manle yɛ amaa ɔba a, saa yɛwu o, yɛde ngoane nu o, yɛ nee ye adɛnla.

¹¹ Zɔhane ati bɛboa bɛ nwo ngoko, kɛmɔ kɛkala bɛlɛyɛ ye la na bɛmaa bɛ nwo anwosesebɛ.

Folɛdulɛ mɔɔ li amozi nee ahyebizalɛ

¹² Mediema, yɛsɛlɛ bɛ kɛ bɛli menli mɔɔ bɛ nee bɛ sonle na bɛyɛ bɛ mgbanyinli mɔɔ tu bɛ folɛ, na bɛkilehile bɛ Awulae adenle ne la eni.

¹³ Bɛli bɛ eni kpole kpalɛ na bɛhulo bɛ wɔ bɛ gyima ne mɔɔ bɛyɛ la ati. Bɛmaa bɛ muala bɛ nloa ɛzɛ bɛ nwo.

¹⁴ Yɛkakye bɛ, bɛbɔ mɔɔ le mgbovonle la kɔkɔ, bɛzi mɔɔ le foanvoanle la ahonle, bɛboa mɔɔ ɛnlɛ anwosesebɛ la, na bɛnyia biala anwo abotane.

¹⁵ Bɛnlea kɛ awie ɛnrɛva ɛtane ɛnrɛdua ɛtane kakɛ. Dahuu bɛyɛ bɛ adwenle kɛ bɛkɛyɛ kpalɛ bɛkɛmaa bɛ nwo ngoko nee awie mɔ gyɛne.

¹⁶ Dahuu bɛmaa bɛ nye ɛlie,

¹⁷ bɛyɛ nzɛlɛlɛ dahuu,

¹⁸ na bɛyɛ Nyamenle mo wɔ gyinlabelɛ biala anu. Mɔɔ Nyamenle kpondɛ kɛ bɛdabɛ mɔɔ bɛ nee Kelaese Gyisɛse lua la yɛ la ɛne.

¹⁹ Bɛmmanua Sunsum Nwuanzanwuanza ne,

²⁰ bɛmmakpo Nyamenle nrɛlaleɛ kpalɛ biala.

²¹ Bɛzɔ ninyɛne kɔsɔɔti bɛnlea, bɛva mɔɔ le kpalɛ la bɛzie,

²² na bɛhyi ɛtane ngakyile biala.

²³ Nyamenle ne mɔɔ maa anzonudwolɛ la ɛde bɛ nwo wɔ adenle biala anu, na ɔva bɛ sonla mumua ne ɔzie: bɛ ɛkɛla, bɛ sunsum, yɛɛ bɛ sonlabaka ne amuala, ɔye bɛ ɔvi nvonleɛ biala anu, ɔde bɛ nwo wɔ Kenle ne mɔɔ Awulae Gyisɛse Kelaese bara la.

²⁴ Bɛkola bɛfa bɛ rɛle bɛwula Nyamenle ne mɔɔ fɛlɛ bɛ la anu, ɔluakɛ ɔkola ɔyɛ.

²⁵ Mediema, anrɛɛ bɛzɛlɛ bɛmaa yɛ.

²⁶ Bɛva atuu ɛyɛlɛ kpalɛ bɛbizebiza mediema ne mɔ ahye.

²⁷ Mese bɛ wɔ Awulae duma nu kɛ bɛgenga kɛlata ɛhye bɛhile mediema ne mɔ amuala.

²⁸ Yɛ Awulae Gyisɛse Kelaese ɛlo bɛ na ɔ nee bɛ ɛdɛnla.