1 Tɛs 4 - BAEBOLO ANZƐƐ BULUKU NWUANZANWUANZA

Ɛbɛlabɔlɛ mɔɔ sɔ Nyamenle anye la

¹ Awieleɛ ne, mediema, kɛmɔ bɛzukoale kɛ bɛkɛzi bɛkɛbɔ ɛbɛla kpalɛ mɔɔ sɔ Nyamenle anye la bɛvile yɛ ɛkɛ ne la, zɔhane ala yɛɛ bɛyɛ a. Na kɛkala yɛlua Awulae Gyisɛse duma nu yɛsɛlɛ bɛ kɛ bɛyɛ ye molozo.

² Ɔluakɛ bɛdabɛ bɛze ngilehilelɛ mɔɔ ɔlua Awulae Gyisɛse tumi zo yɛvale yɛmanle bɛ la.

³ Nyamenle ɛhulolɛdeɛ a le kɛ bɛ nwo kɛde na bɛkɛhwe bɛ nwo bɛkɛvi adwɔmane ɛbɔlɛ nwo.

⁴ Bɛdabɛ mrenya mɔɔ bɛwɔ nu la ɔwɔ kɛ nwu raalɛ gya wɔ anwondelɛ nee enililɛ nu,

⁵ tɛ wɔ atiakunluwɔzo ɛtane nu, kɛmɔ menli mɔɔ ɛnze Nyamenle la yɛ ye la.

⁶ Wɔ ɛhye ɛyɛlɛ nu, ɔnle kɛ awie biala yɛ ɔ diema bie ɛtane anzɛɛ sisi ye. Yɛha ɛhye yɛhile bɛ ɛlɛ, yɛɛ yɛbɔ bɛ nwolɛ kɔkɔ, kɛ Nyamenle badea bɛdabɛ mɔɔ bɛyɛ zɔhane ɛtane ne la.

⁷ Nyamenle anvɛlɛ yɛ kɛ yɛrabɔ ɛbɛla mgbane mgbane, ɔvɛlɛle yɛ kɛ yɛrayɛ menli mɔɔ anwo te a.

⁸ Zɔhane ati, mɔɔ kɛkpo ngilehilelɛ ɛhye la ɛmkpo sonla, na yekpo Nyamenle ne mɔɔ ɛva ye Sunsum Nwuanzanwuanza ne ɛmaa bɛ la.

⁹ Ɔngyia kɛ awie kɛhɛlɛ bɛ kɛ anrɛɛ bɛhulo bɛ gɔnwo mɔ diedima, ɔluakɛ Nyamenle ɔdaye yehilehile bɛ kɛ bɛzi bɛhulo bɛ nwo ngoko la.

¹⁰ Nɔhalɛ, zɛhae subane ne ala a bɛhile bɛmaa mediema mɔɔ wɔ Masidonea maanzinli nu la amuala a. Yemɔti yɛsɛlɛ bɛ, mediema, bɛyɛ ye zɔhane kpalɛ dahuu.

¹¹ Bɛva bɛzie bɛ nyunlu kɛ bɛkɛbɔ ɛbɛla mɔɔ le bɛtɛɛ a, bɛdwenle bɛ nwo na bɛbɔ ɛbɛla mɔɔ kɛmaa bɛkɛhola bɛ nwo nea a, kɛmɔ yɛhanle yɛhilele bɛ la.

¹² Saa bɛyɛ ye zɔhane na bɛanva bɛ rɛle bɛanzɔ awie a, bɛdabɛ mɔɔ bɛwɔ amozi na bɛnle diedima la kɛbu bɛ bie.

Awulae ɛralɛ ne

¹³ Mediema, yɛkulo kɛ bɛnwu nɔhalɛ ne mɔɔ fane bɛdabɛ mɔɔ bɛwu la anwo la, amaa bɛdabɛ noko bɛanli nyane kɛ menli mɔɔ ɛnlɛ anyelazo la.

¹⁴ Yɛdie yɛdi kɛ Gyisɛse wule na eza ɔdwazole ɔrale ngoane nu, zɔhane ala yɛɛ Nyamenle balua Gyisɛse anwo zo ava bɛdabɛ mɔɔ bɛdie ye bɛdi na bɛwu la azia ara ngoane nu a.

¹⁵ Wɔ ɛhye anwo, yɛka mɔɔ Awulae ɔdaye ye ngilehilelɛ ne se la: yɛdayɛ mɔɔ saa ɔdwu Awulae ɛralɛ ne a ɛnee yɛtɛte ngoane nu la ɛnrɛlumua bɛdabɛ mɔɔ bɛwu la anyunlu.

¹⁶ Yɛbade kɛ bɛha tumi edwɛkɛ ne wɔ anwuma lɔ, yɛbade Nyamenle soanvolɛ kpanyinli ne ane, bɛbabɔ Nyamenle aweɛne tendenle ne anu, na Awulae ɔdaye mumua ne ɔvi anwuma lɔ ɔbadwu aze. Bɛdabɛ mɔɔ bɛdie Kelaese bɛdi na bɛwu la balumua adwazo avi ewule nu;

¹⁷ na akee yɛdayɛ mɔɔ mekɛ ne anu yɛtɛte aze anzɛɛ yɛtɛwule la bɛakpogya yɛ zo anwuma na yɛ nee bɛ yɛ muala yɛahuohua yɛ nloa wɔ amungu ne anu, na yɛahɔyia Awulae wɔ anwomanyunlu. Na akee yɛ nee Awulae adɛnla dahuu.

¹⁸ Yemɔti, bɛva ɛhye mɔ bɛkyekye bɛ rɛle ng bɛkyekye bɛ rɛle ng