1 Tɛs 3 - BAEBOLO ANZƐƐ BULUKU NWUANZANWUANZA

¹ Nzinlii ɛnee akee yɛngola nu sɔ. Yemɔti yɛyɛle kɛ yɛmɛ yɛkɛha Atɛnse

² na yɛazoa adiema Temɔte mɔɔ nee yɛ yɛ Nyamenle gyima ye, yɛka Edwɛkpa ne mɔɔ fane Kelaese anwo la. Yɛzoanle ye kɛ ɔramaa bɛ anwosesebɛ na ɔboa bɛ wɔ bɛ diedi nu,

³ amaa bɛ biala andoa nyane mɔɔ bɛlɛkile bɛ la ati yeamkpo aze. Bɛdabɛ bɛze ye wienyi kɛ ɔyɛ Nyamenle ɛhulolɛ kɛ bɛkɛhile yɛ abodelɛ ɛhye mɔ amuala.

⁴ Ɔluakɛ mɔɔ yɛwɔ bɛ nwo lɔ la yɛhanle yɛhilele bɛ kɛ bɛbahile yɛ nyane, yɛɛ mɔɔ ɛzi la ɛmaa bɛnwu mɔɔ yɛhanle la nɔhalɛ.

⁵ Ɛnee akee mengola ye me kunlu di bieko, ɛhye ati menzoanle Temɔte kɛ ɔranlea kɛ bɛ diedi ne si gyi la. Ɔnrɛyɛ nɔhalɛ kɛ Abɔnsam kɛhola kɛzɔ bɛ muala kɛnlea dedee kɛmaa yɛ gyima mɔɔ yɛyɛle la amuala kɛyɛ mgbane!

⁶ Kɛkala, Temɔte vi bɛ nwo lɔ ɛzia ɛra yɛ nwo ɛke, na yeva amaneɛ fɛlɛko mɔɔ fane bɛ diedi nee ɛhulolɛ nwo la yerabɔ yɛ. Yeha yehile yɛ kɛ dahuu bɛdwenle yɛ nwo adwenle kpalɛ, yɛɛ bɛ nwo dɔ yɛ, kɛmɔ yɛdayɛ yɛ nwo dɔ bɛ la.

⁷ Yemɔti, mediema, wɔ yɛ anwongyelelɛ nee amaneɛnwunlɛ ne mɔ anu, bɛmɛ a bɛzi yɛ ahonle a. Bɛ diedi yɛɛ ɛmaa yɛ anwosesebɛ a,

⁸ ɔboalekɛ saa bɛgyinla kpundii wɔ Awulae anu a, ɛnee yɛlɛ ngoane.

⁹ Kɛkala yɛkola yɛyɛ Nyamenle mo wɔ bɛ ti. Yɛyɛ Nyamenle mo wɔ anyelielɛ mɔɔ bɛmɛ bɛ ti yɛlɛ ye wɔ ɔ nyunlu la.

¹⁰ Alehyenlɛ nee aledwolɛ kɔsɔɔti yɛfa yɛ ahonle muala yɛsɛlɛ kɛ yɛkɛnwu bɛ nyunlu na mɔɔ bɛhyia nwo wɔ bɛ diedi nu la yɛayɛ yɛamaa bɛ.

¹¹ Yɛsɛlɛ yɛ Nyamenle Selɛ mumua ne nee yɛ Awulae Gyisɛse kɛ ɔbuke adenle ɔmaa yɛnyia mekɛ yɛrɛla bɛ nwo lɔ.

¹² Awulae ɛmaa bɛnyia bɛ nwo ɛhulolɛ ngoko na ɔmaa bɛ ɛhulolɛ mɔɔ bɛlɛ ye wɔ menli nwo la ɛnyi ɛyɛ kpole kpalɛ kɛ ɛhulolɛ mɔɔ yɛlɛ ye wɔ bɛ nwo la.

¹³ Zɛhae adenle zo yɛɛ ɔbamaa bɛ nwo ayɛ se, na bɛali munli, bɛ nwo ade wɔ yɛ Nyamenle Selɛ ne anyunlu, wɔ mekɛ mɔɔ yɛ Awulae Gyisɛse nee bɛdabɛ mɔɔ bɛle ye ɛdeɛ la kɛra la a. ɛra la a.