1 Tɛs 2 - BAEBOLO ANZƐƐ BULUKU NWUANZANWUANZA

Pɔɔlo gyimayɛlɛ wɔ Tɛsalonaeka

¹ Mediema, bɛdabɛ bɛnwu kɛ yɛ ɛralɛ mɔɔ yɛrale bɛ nwo lɔ la anyɛ mgbane.

² Bɛdabɛ bɛze amaneɛ mɔɔ yɛnwunle ye nee aholoba mɔɔ bɛbɔle yɛ wɔ Felepae kolaa na yɛara Tɛsalonaeka la. Noko yɛ Nyamenle ne manle yɛ akɛnrasesebɛ manle yɛhanle Edwɛkpa ne mɔɔ vi ye ɛkɛ ne la yɛhilele bɛ wɔ mekɛ bɔbɔ mɔɔ ɛnee menli dɔɔnwo tia yɛ la.

³ Ɔluakɛ mɔɔ yɛvale yɛdole bɛ nyunlu la ɛngyi nvonleɛ bie anzɛɛ adwenle ɛtane biala azo, yɛɛ yɛando awie biala abɛla.

⁴ Mɔɔ yɛyɛle la a le kɛ dahuu yɛtendɛ, kɛmɔ Nyamenle kpondɛ kɛ yɛtendɛ la, ɔboalekɛ yemaa yɛzɔ ɔ nye na yeva ye Edwɛkpa ne yewula yɛ sa nu. Ɛhye ati yɛmbɔ mɔdenle kɛ yɛsɔ menli nye. Nyamenle mɔɔ ze yɛ ahonle nu la yɛɛ yɛkulo kɛ yɛsɔ ɔ nye a.

⁵ Bɛdabɛ bɛze ye wienyi kɛ yɛanva huhudi ɛdendɛlɛ kɛnlɛma yɛangeda anyebolo zo, Nyamenle di yɛ daselɛ wɔ ɛhye anwo.

⁶ Yɛambɔ mɔdenle kɛ yɛkpondɛ menli nganvolɛ, saa ɔvi bɛ ɛkɛ ne anzɛɛ ɔvi awie mɔ lɔ o,

⁷ noko kɛmɔ yɛle Kelaese ɛzoanvolɛma la, anrɛɛ yɛkola yɛka kɛ bɛyɛ ye zɔhane. Noko yɛbɛlɛle yɛ nwo aze, wɔ mekɛ mɔɔ ɛnee yɛ nee bɛ de la, na yɛdɛfɛdɛfɛle bɛ kɛ ɛrɛladane mɔɔ ɛlɛdi ɔ mra adane la.

⁸ Ɔlua bɛ nwo ɛhulolɛ mɔɔ yɛlɛ la ati yɛanga Edwɛkpa ne mɔɔ vi Nyamenle ɛkɛ ne la angome ala yɛangile bɛ; yɛvale yɛ ɛbɛlabɔlɛ noko yɛbokale nwo. Bɛ nwo hyia yɛ somaa!

⁹ Nɔhalɛ, mediema, bɛkakye kɛ yɛzile yɛyɛle gyima yɛvɛle la. Yɛyɛle gyima nɔɔzo nee ewiazo, amaa yɛanyɛ kpomgbolo yɛamkpolo bɛ kɔme wɔ mekɛ mɔɔ yɛka Edwɛkpa ne mɔɔ vi Nyamenle ɛkɛ ne la yɛahile bɛ la.

¹⁰ Bɛ nee Nyamenle bɛdi yɛ daselɛ kɛ yɛ subane mɔɔ yɛhilele yɛhilele bɛdabɛ mɔɔ bɛliele bɛlile la le bɔkɔbɔkɔ, ɔle fɔɔnwo mɔɔ evinli biala ɛnle nwo a.

¹¹ Bɛdabɛ bɛnwunle kɛ yɛyɛle bɛ nuhua ko biala kɛ selɛ kɛyɛ ɔ ra la.

¹² Yɛzile yɛ ahonle, yɛkyekyele bɛ rɛle, na yɛhɔle zolɛ yɛmanle bɛ anwosesebɛ kɛ bɛbɔ ɛbɛla mɔɔ fɛta Nyamenle ne mɔɔ fɛlɛ bɛ kɛ bɛrɛla ye anyunlunyia Belemgbunlililɛ ne anu la.

¹³ Debie bieko mɔɔ yemɔti dahuu yɛyɛ Nyamenle mo la a le kɛ, mɔɔ yɛvale Nyamenle nrɛlaleɛ ne yɛrɛlɛle bɛ la, bɛdiele na bɛzɔle nu kɛ ɔnle edwɛkɛ mɔɔ vi sonla ɛkɛ a, na ɔvi Nyamenle ɛkɛ, yɛɛ ɔle zɔhane noko. Ɔluakɛ Nyamenle ɛlɛyɛ ye gyima wɔ bɛdabɛ mɔɔ bɛdie bɛdi la anu.

¹⁴ Ayi mɔ, mɔɔ zile asɔnema mɔɔ le Kelaese ɛdeɛ la anwo zo wɔ Dwudiya la, yemɔ ala a zile bɛdabɛ noko bɛ nwo zo a. Bɛnwunle amaneɛ wɔ bɛdabɛ bɛ menli asa anu, kɛmɔ Dwuuma yɛle ala la.

¹⁵ Dwuuma hunle Awulae Gyisɛse nee kpɔmanvolɛma ne mɔ, bɛyɛle yɛ kpɔdekpɔde bɛmanle yɛnriandile. Bɛha Nyamenle ɛya kpole! Bɛkyi awie biala.

¹⁶ Bɛbɔle mɔdenle kɛ bɛtua yɛ mɔɔ yɛnga Edwɛkpa ne yɛngile bɛdabɛ mɔɔ bɛnle Dwuuma la, amaa bɛtie a bɛanyia ngoane. Bɛyɛle ɛhye bɛmanle bɛ ɛtane ne mɔ akee yɛle kpole. Na kɛkala, Nyamenle ɛya ne wɔ bɛ nwo zo.

Pɔɔlo anwo dɔ Tɛsalonaekama

¹⁷ Mediema, yɛmɛ, yɛvile bɛ nwo ɛkɛ ne mekɛ ekyi bie wɔ nwonane nu na tɛ sunsum nu ɔ, yemɔti yɛ nwo dɔ bɛ kpole, na yɛ kunlu a anrɛɛ yɛnwu bɛ nyunlu bieko.

¹⁸ Kɛmɔ yɛkpondɛ kɛ yɛsia yɛba bɛ nwo lɔ bieko la ati, medame Pɔɔlo, menyɛle biala kɛ anrɛɛ menwɔzia menwɔra, noko Seetan ammaa yɛ adenle.

¹⁹ Na ɛnee yɛ anyelazo, yɛ anyelielɛ anzɛɛ abɔtile mɔɔ yɛfa yɛtu yɛ nloa anu wɔ mekɛ mɔɔ yɛ Awulae kɛra la a le boni? Tɛ yemɔ a le bɛdabɛ ɔ?

²⁰ Nɔhalɛ, bɛmɛ a bɛle yɛ anyunlunyia nee yɛ anyelielɛ a.