1 Tɛs 1 - BAEBOLO ANZƐƐ BULUKU NWUANZANWUANZA

¹ Kɛlata ɛhye vi Pɔɔlo, Saelase, yɛɛ Temɔte ɛkɛ. Yɛfa yɛahɔmaa Tɛsalonaeka asɔne ne anu amra mɔɔ le Nyamenle Selɛ ne nee Awulae Gyisɛse Kelaese ɛdeɛ la. Nyamenle ɛlo bɛ na ɔmaa bɛ anzonudwolɛ.

Tɛsalonaekama ɛbɛlabɔlɛ nee diedi

² Dahuu yɛyɛ nzɛlɛlɛ a, yɛbɔ bɛ duma yɛyɛ Nyamenle mo wɔ bɛ muala bɛ ti.

³ Ɔluakɛ saa yɛkɔ yɛ Nyamenle ne nee yɛ Ze ne anyunlu a, yɛkakye kɛ bɛzile bɛhilele bɛ diedi na bɛ ɛhulolɛ manle bɛyɛle gyima ɛsesebɛ, nee kɛ bɛ anyelazo mɔɔ wɔ yɛ Awulae Gyisɛse Kelaese anu la si gyi kpundii la.

⁴ Mediema, yɛze kɛ Nyamenle lɛ bɛ nwo ɛhulolɛ na yekpa nu yeye bɛ yemaa ɔ nwo.

⁵ Ɔluakɛ yɛanva yɛ nloa mgbane a yɛvale Edwɛkpa ne yɛrɛlɛle bɛ a, yɛvale tumi nee Sunsum Nwuanzanwuanza ne nee ye nɔhalɛ ne anwo adwenle mɔɔ si pi la a yɛrale a. Bɛdabɛ bɛze kɛ yɛzile yɛbɔle yɛ ɛbɛla wɔ mekɛ mɔɔ yɛ nee bɛ de la; yɛyɛle ɛhye wɔ bɛdabɛ bɛ kpalɛ ti.

⁶ Bɛzukoale yɛ nee Awulae; yemɔti bɛnwunle amaneɛ dɔɔnwo, na bɛvale anyelielɛ ne mɔɔ vi Sunsum Nwuanzanwuanza ne anu ba la bɛliele nrɛlaleɛ ne.

⁷ Ɛhye ati bɛyɛle ndonwo kpalɛ bɛmanle diedima mɔɔ wɔ Masidonea nee Giliki (Akaya) maanzinli ne mɔ anu la.

⁸ Ɔluakɛ tɛ Awulae anwo nrɛlaleɛ ne angome yɛɛ vi bɛ ɛkɛ ne dwule Masidonea nee Akaya a, na eza bɛ diedi mɔɔ wɔ Nyamenle anu la noko ɛdwu menli mɔɔ wɔ ɛleka muala la anzo nu. Ɛhye ati, ɔngyia kɛ yɛkɛha nwolɛ edwɛkɛ bɔbɔ.

⁹ Menli zɔhane mɔ ka kɛ bɛzile bɛliele yɛ wɔ mekɛ mɔɔ yɛrale bɛ nwo lɔ la. Bɛka kɛ bɛzile bɛhwenle bɛ nwo bɛvile bɛ mmonle ngakyile ne mɔ anwo, bɛhɔle Nyamenle ɛkɛ na bɛzonlenle nɔhalɛ nee tease Nyamenle ne la.

¹⁰ Bɛkile kɛ kɛkala bɛlɛkendɛ ɔ Ra Gyisɛse kɛ ɔvi anwuma ɔbara. Yemɔ yɛɛ Nyamenle dwazole ye vile ewule nu, na ɔdie yɛ ɔfi Nyamenle ɛya kpole ne mɔɔ bara la anu a.