1 Tem 3 - BAEBOLO ANZƐƐ BULUKU NWUANZANWUANZA

Asɔne ne anu mgbanyima

¹ Ɛhye le nɔhalɛ edwɛkɛ bɔkɔɔ: Saa awie anye bolo kɛ ɔyɛ asɔne kpanyinli a, ɛnee yeva gyima kpalɛ.

² Ɔwɔ kɛ asɔne kpanyinli biala yɛ sonla mɔɔ ngehanleɛ biala ɛnle ɔ nwo, ɔ ye kokye, ɔ nye gyi ɔ ti anwo, ɔkola ɔsɔ ɔ nwo, ɔ nye ka aze, ɔdie nyɛvolɛ na ɔkola ɔkilehile;

³ ɔnle kɛ ɔyɛ nzanli anzɛɛ ɔdi mgbonde; ɔwɔ kɛ ɔyɛ sonla bɛtɛɛ mɔɔ kyi manzonle; ɔnle kɛ ɔ nye bolo ezukoa.

⁴ Ɔwɔ kɛ ɔyɛ sonla mɔɔ kola bu ɔdaye ye awuke ne kpalɛ na ɔ mra fa enililɛ tie ye edwɛkɛ a.

⁵ Awie mɔɔ ɛngola ɛmbu ɔdaye ye awuke la, kɛ ɔkɛyɛ na yeahola yeanlea Nyamenle asɔne ne azo ɛ?

⁶ Ɔnle kɛ ɔyɛ sonla mɔɔ rale asɔne ne anu la ɛtɛkyɛle a, anrɛɛ ɔkɛmemaa ɔ nwo zo ɔkɛmaa bɛkɛbua ye fɔlɛ kɛ bɛbua Abɔnsam la.

⁷ Ɔwɔ kɛ ɔyɛ sonla mɔɔ bɛdabɛ mɔɔ bɛngɔ asɔne la di ye eni, amaa yeangua ɔ nyunlu aze, yeangɔndɔ Abɔnsam ɛhane nu.

Asɔne nu boavolɛma

⁸ Zɔhane ala yɛɛ ɔwɔ kɛ asɔne nu boavolɛma yɛ menli mɔɔ lɛ subane kpalɛ na bɛdi nɔhalɛ a; ɔnle kɛ bɛyɛ nzama anzɛɛ bɛyɛ ezukoa nwo anyebolo.

⁹ Ɔwɔ kɛ bɛfa adwenle mɔɔ anu te la bɛsɔ diedi ne mɔɔ bɛye bɛhile bɛ la anu nɔhalɛ nu.

¹⁰ Bɛzɔ menli zɛhae mɔ bɛnlea kolaa na saa edwɛkɛ ɛnle bɛ nwo a, bɛazonle asɔne ne kɛ bɛle boavolɛma.

¹¹ Zɔhane ala yɛɛ bɛ ye mɔ noko ɔwɔ kɛ yɛ mraalɛ mɔɔ bɛ nye gyi bɛ ti anwo na bɛdi nɔhalɛ wɔ debie biala anu a.

¹² Sonla mɔɔ le asɔne nu boavolɛ la ɔwɔ kɛ gya raalɛ ko, na ɔkola ɔ mra nwo zo nee ye awuke zo nea kpalɛ.

¹³ Ɔluakɛ bɛdabɛ boavolɛma mɔɔ bɛkɛyɛ bɛ gyima kpalɛ la nyia bɛ nyunlu na bɛkola bɛka bɛ diedi mɔɔ wɔ Kelaese Gyisɛse anu la anwo edwɛkɛ mɔɔ bɛnzulo a.

Fealera nu edwɛkɛ kpole ne

¹⁴ Melɛkɛlɛ wɔ kɛlata ɛhye, noko me nye la kɛ ɔnrɛhyɛ biala na meara lɔ.

¹⁵ Na saa mekyɛ ɛralɛ nu a, kɛlata ɛhye bamaa wɔanwu kɛ ɔwɔ kɛ ɛsi ɛbɔ wɔ ɛbɛla wɔ Nyamenle sua nu la, meka tease Nyamenle ne asɔne ne mɔɔ le nɔhalɛ ne sika nee ye bodane la.

¹⁶ Yɛka yɛto gua kɛ nɔhalɛ, awozinli nu debie mɔɔ wɔ yɛ nyamenlezonlenlɛ ne anu la yɛ nwanwane: Ɔrale ewiade kɛ sonla, noko Sunsum nu a ɔle saanwu. Nyamenle soanvolɛma nwunle ye, bɛbɔle ɔ nwo nolo wɔ maanle maanle kɔsɔɔti anu. Ewiade amra amuala liele ye lile, na bɛvale ye bɛhɔle anwuma anyu