1 Tem 2 - BAEBOLO ANZƐƐ BULUKU NWUANZANWUANZA

Asɔne nu ɛzonlenlɛ

¹ Zɔhane ati, edwɛkɛ mɔɔ lumua la a le kɛ, anrɛɛ bodo, sɛlɛ maa ɛ nwo nee awie mɔ na yɛ Nyamenle mo wɔ menli kɔsɔɔti ati.

² Yɛ nzɛlɛlɛ ne bie maa arelemgbunli nee menli mɔɔ tumi wɔ bɛ sa nu la amuala, amaa yɛ nwo adɔ yɛ na yɛanyia anzonudwolɛ yɛabɔ yɛ ɛbɛla, na yɛanyia adenle yɛazonle yɛ Nyamenle ne, yɛali ye eni, kɛmɔ ɔfɛta la.

³ Zɛhae nzɛlɛlɛ le kpalɛ na ɔsɔ Nyamenle yɛ Ngoanedievolɛ ne anye.

⁴ Ɔluakɛ ɛkpondɛ kɛ menli kɔsɔɔti nwu nɔhalɛ ne na bɛnyia ngoane.

⁵ Nyamenle kokye a wɔ ɛkɛ a, yɛɛ pepɛdievolɛ kpɔdavolɛ ko a gyi Nyamenle nee sonla avinli a, yemɔ a le Kelaese Gyisɛse

⁶ mɔɔ vale ɔ nwo manle kɛ ɔkpɔne menli kɔsɔɔti yeavi bɛ ɛtane nu la. Mekɛ kpalɛ ne dwule la ɔhilele kɛ Nyamenle kpondɛ kɛ menli kɔsɔɔti nyia ngoane.

⁷ Ɛhye ati yɛɛ ɔyɛle me ɛzoanvolɛ kɛ menga na mengilehile bɛdabɛ mɔɔ bɛnle Dwuuma la nɔhalɛ diedi ne a. Membɔ adalɛ, nɔhalɛ ne a melɛka la!

⁸ Saa bɛyia nuhua kɛ bɛsonle a, mekpondɛ kɛ mrenya ala a yɛ nzɛlɛlɛ a. Ɔwɔ kɛ mrenya zɛhae mɔ yɛ menli mɔɔ bɛdu bɛ nwo bɛmaa Nyamenle na bɛkola bɛmaa bɛ sa zo bɛsɛlɛ mɔɔ ɛya anzɛɛ kpolerazulɛ biala ɛnle nu a.

⁹ Eza mekpondɛ kɛ mraalɛ ne mɔ noko siezie bɛ nwo kɛnlɛma wɔ adenle mɔɔ kile kɛ bɛze deɛ na nyiane wɔ bɛ nye zo la azo; tɛ tileyɛlɛ mɔɔ bie ɛtɛbale ewiade ɛlɛ anzɛɛ avikpa nee mgbɔba mɔɔ bɛfa bɛayɛ bɛ nwo sɔɔnwo, bɛawula adɛladeɛ anzɛɛ bɛaheda ndanlɛ awolɛ ɛsesebɛ la yɛɛ melɛka a.

¹⁰ Meka ɛbɛla kpalɛ ɛbɔlɛ mɔɔ fɛta mraalɛ mɔɔ sonle Nyamenle la.

¹¹ Mraalɛ ɛyɛ koonwu, ɛbɛlɛ bɛ nwo aze ɛzukoa.

¹² Memmaa adenle kɛ mraalɛ ɛhilehile anzɛɛ ɛnyia mrenya nwo zo tumi; ɔwɔ kɛ bɛka bɛ nloa bɛto nu.

¹³ Ɔluakɛ bɛlumuale bɛbɔle Adam kolaa na bɛabɔ Yivi;

¹⁴ yɛɛ tɛ Adam a ɛwɔlɛ ne bɛlɛbɛlale ye a. Raalɛ ne a ɛwɔlɛ ne bɛlɛbɛlale ye mɔɔ ɔdonle Nyamenle mɛla ne a.

¹⁵ Noko saa raalɛ ka ɔ nwo aze, ɔbɔ mɔdenle ɔtɛnla diedi, ɛhulolɛ nee anwondelɛ nu a, ɔlua mralɛ ɛwolɛ ti bɛkɛlie ye ngoane.