1 Sam 6 - BAEBOLO ANZƐƐ BULUKU NWUANZANWUANZA

Ngyekyeleɛ Ɛlɛka ne ɛzianenlɛ

¹ Ɛdɛnkɛma Ngyekyeleɛ Ɛlɛka ne lile siane nsuu wɔ Filisitia maanle nu.

² Filisitiama vɛlɛvɛlɛle bɛ ahɔmenle nee menli mɔɔ bɔ menli munzule la na bɛbizale bɛ kɛ, “Ɛdɛnkɛma Ngyekyeleɛ Ɛlɛka ne kɛ yɛyɛ ye ɛ? Bɛha deɛ holɛ ko mɔɔ saa yɛfa yɛahɔzie ɔ bo zo dɛba ne a yɛva yɛboka nwolɛ la bɛhile yɛ.”

³ Bɛzele kɛ, “Saa bɛfa Yizilayɛ Nyamenle ne Ngyekyeleɛ Ɛlɛka ne bɛahɔzie ɔ bo zo ne a ɛnee bɛmmafa ye mgbane bɛkɔ. Wɔ adenle biala anu, ɔwɔ kɛ bɛfa mgbɔdalɛ azubɔdeɛ bɛboka nwolɛ, amaa bɛanyia bɛ ti na bɛanwu debie mɔɔ yemɔti sumunli kɛ de la yedua bɛ kakɛ kpole ɛhye la.”

⁴ Menli ne bizale kɛ, “Ɛnee duzu mgbɔdalɛ azubɔdeɛ a yɛva yɛhɔmaa ye a?” Ahɔmenle ne mɔ buale kɛ, “Bɛdabɛ arelemgbunli nnu ne, bɛbɔ ko biala ati bɛva ezukoa nvutuke ngunguma mɔɔ zɔho mutulemutule yɛɛ ko noko mɔɔ le kɛ kila la bɛgua Ɛlɛka ne anu, ɔluakɛ ewule nzane ne hanle menli ne nee arelemgbunli ne mɔ noko.

⁵ Yemɔti bɛyɛ mutulemutule ne nee ahila ne mɔ mɔɔ zɛkyele bɛ maanle ne la ananze bɛwula Yizilayɛ Nyamenle ne anyunlunyia, na wɔannea a ɔkɛgyakyi bɛ nee bɛ awozonle ne mɔ nee bɛ maanle ne kakɛdualɛ.

⁶ Duzu ati a bɛyɛ anzosesebɛ, kɛmɔ Yigyibiti belemgbunli nee Yigyibitima yɛle la ɛ? Bɛhakye kɛ Nyamenle zile dole bɛ agyiba na nzinlii ɔyɛle bɛ koasea ɔmanle Yizilayɛma vile Yigyibiti la.

⁷ Yemɔti bɛbobɔ ehwili ko na bɛziezie nlankɛ mbelɛ nwiɔ mɔɔ bɛtɛfale bɛtɛyɛle gyima ɛlɛ la; bɛva ehwili ne bɛhenda bɛ na bɛha bɛ mra ne mɔ bɛwula tunli nu.

⁸ Akee bɛva Ɛdɛnkɛma Ngyekyeleɛ Ɛlɛka ne bɛzie ehwili ne azo, na bɛva ɛlɛka ne mɔɔ bɛgua ezukoa nvutuke mgbɔdalɛ azubɔdeɛ ne mɔ nu la bɛzie ye foa ko; bɛha nlankɛ ne mɔ bɛmaa bɛ ngome bɛva ehwili ne bɛdɔ adenle zo.

⁹ Na akee bɛnlea saa ɔsia ɔkɔ Bɛte Hyimɛhye sua zo a ɛnee Yizilayɛ Nyamenle yɛɛ ɛmaa ewule nzane ne ɛdɔ yɛ nwo a. Saa yeangɔ ɛkɛ ne a ɛnee ɔkile kɛ nzia nee nzia yɛɛ ɛyia nu a.”

¹⁰ Menli ne yɛle, kɛmɔ bɛhanle bɛhilele bɛ ala la. Bɛvale ehwili ne bɛhendanle nlankɛ mbelɛ nwiɔ ne na bɛhanle bɛ mra ne mɔ bɛwulale tunli nu.

¹¹ Bɛvale Ɛdɛnkɛma Ngyekyeleɛ Ɛlɛka ne bɛziele ehwili ne azo, bɛvale ɛlɛka ne mɔɔ mutulemutule nee kila ananze ne mɔ wɔ nu la noko bɛziele zolɛ.

¹² Nlankɛ ne mɔ bɔle bɛ ti Bɛte Hyimɛhye adenle zo, bɛammakyi ɛleka biala. Bɛkɔ la ɛnee bɛ ɛzunlɛ ne la zolɛ. Filisitia arelemgbunli ne doale bɛ toonwo bɛdwule Bɛte Hyimɛhye ɛweɛne zo.

¹³ Mekɛ ne anu ɛnee Bɛte Hyimɛhyema ɛlɛte hwiiti (ma bie mɔɔ le kɛ awule la) wɔ bɔnza bie anu. Arɛlevilɛ nu bɛkpogyale bɛ ti zo la bɛnwunle Ɛdɛnkɛma Ngyekyeleɛ Ɛlɛka ne na bɛlile fɛlɛko.

¹⁴ Ehwili ne hɔle Dwɔhyua mɔɔ vi Bɛte Hyimɛhye ɛkɛ ne la ɛya avule ɛdeɛ ne anu na ɔhɔgyinlanle bolɛ kpole bie anwo. Menli ne mɔ zianyinle nlankɛ ne na bɛbubule ehwili ne bɛyɛle ɛyɛne bɛyelale nlankɛ ne mɔ bɛbɔle azu bɛmanle Ɛdɛnkɛma.

¹⁵ Livaema ne dwulale Ɛdɛnkɛma Ngyekyeleɛ Ɛlɛka ne nee ɛlɛka ne mɔɔ ezukoa nvutuke ananze ne mɔ wɔ nu la aze, na bɛvale bɛziele bodane ne azo. Kenle ko ne Bɛte Hyimɛhyema vale ɛyelalɛ azubɔdeɛ bɔle azu manle Ɛdɛnkɛma.

¹⁶ Filisitia arelemgbunli nnu ne nwunle ɛhye la, bɛziale bɛhɔle Ɛkelɔn kenle ko ne ala.

¹⁷ Filisitiama vale ezukoa nvutuke mutulemutule ananze ne yɛle azubɔdeɛ yɛle bɛ ɛtane ne mɔ anwo mgbɔdalɛ manle Ɛdɛnkɛma: Ahyedɔdo ɛdeɛ ko, Gaza ɛdeɛ ko, Ahyekɛlɔn ɛdeɛ ko, Gate ɛdeɛ ko, yɛɛ Ɛkelɔn noko ɛdeɛ ko.

¹⁸ Zɔhane ala yɛɛ bɛyɛle ezukoa nvutuke kila ananze nnu ne mɔ a; azuamgbole nnu ne mɔɔ arelemgbunli nnu ne dede zolɛ mɔɔ bɛlie nwolɛ bane nee mɔɔ bɛtɛdiele nwolɛ bane la ko biala ɛdeɛ ko. Bodane ne mɔɔ bɛziele Ɛdɛnkɛma Ngyekyeleɛ Ɛlɛka ne zolɛ la, ɛnɛ nee ɛnɛ ala tɛbɔ Dwɔhyua mɔɔ vi Bɛte Hyimɛhye la ɛya nu di mɔɔ zile la anwo daselɛ.

¹⁹ Ɛdɛnkɛma manle Bɛte Hyimɛhye menli abulasuu wule, ɔboalekɛ bɛnleanle Ɛdɛnkɛma Ngyekyeleɛ Ɛlɛka ne anu. Na menli ne vale ɛzunlɛ lile nyane, ɔboalekɛ Ɛdɛnkɛma ɛmaa menli ɛzɛkye bɛ avinli.

Ngyekyeleɛ Ɛlɛka ne wɔ Keleate Gyialem

²⁰ Yemɔti Bɛte Hyimɛhyema hanle kɛ, “Nwane a kɛhola Ɛdɛnkɛma Nyamenle Nwuanzanwuanza ɛhye anyunlu gyinla a? Yɛɛ ɔvi yɛ ɛke a ɛnee nwane ɛkɛ ne yɛɛ ɔkɔ a?”

²¹ Yemɔti bɛzoanle menli wɔ Keleate Gyialem bɛhɔzele bɛ kɛ, “Filisitiama ɛziane Ɛdɛnkɛma Ngyekyeleɛ Ɛlɛka ne ɛra. Bɛrɛla bɛrava bɛhɔ.”