1 Sam 30 - BAEBOLO ANZƐƐ BULUKU NWUANZANWUANZA

Amalɛkema konle ne

¹ Devidi nee ye ɛlɔnema ne zile nu la ye kenle nsa ne azo yɛɛ bɛdwule Zekelage a, na bɛnwunle kɛ Amalɛkema ɛrava Dwuda nyiakɛ maanle ne na bɛbɔ Zekelage, bɛyela sua bɔdenle ne,

² na bɛhye mraalɛ ne mɔ nee awie biala mɔɔ wɔ zolɛ la, mgbolema nee koahweabanema donvula bɛ nee bɛ ɛhɔ. Bɛangu awie biala ɛdeɛ, noko bɛvulale bɛ kɔsɔɔti nee debie biala bɛhɔle.

³ Devidi nee ye ɛlɔnema ne ranwunle kɛ bɛyela sua ne na bɛhye bɛ mraalɛ ne mɔ, bɛ mra mrenya nee mraalɛ bɛhɔ la,

⁴ bɛdukuele nuhua bɛzunle toonwo bɛ ɛnwomenle wiele bɔkɔɔ.

⁵ Devidi mraalɛ nwiɔ ne, Ahenoam mɔɔ vi Gyɛzɛli nee Abegeli mɔɔ vi Kamɛle na Neebale mɔɔ ɛha ɛleka bie la gyale ye bie la boka nwolɛ a bɛhyele bɛ a.

⁶ Edwɛkɛ dole Devidi, ɔluakɛ ye menli ne yɛle kɛ bɛsi ye awolɛ, ɔboalekɛ awie biala ɛlɛdi nyane kpole kɛ bɛhye ɔ ye nee ɔ mra bɛhɔ a. Na Devidi Ɛdɛnkɛma ye Nyamenle ne manle ye akɛnrazilɛ.

⁷ Devidi zele sɛlɛvolɛ Abayata, Ahemɛlɛke ara nrenya ne kɛ, “Fa yifɔdo ne bɛla.” Na Abayata vale yifɔdo ne rɛlɛle Devidi.

⁸ Na Devidi bizale Ɛdɛnkɛma kɛ, “Memkpo nwule ne mɔ ɔ? Menwɔhola bɛ kye ɔ?” Ɛdɛnkɛma buale kɛ, “Foa bɛ, ɛbahye bɛ na wɔalie menli mɔɔ bɛhye bɛ la.”

⁹ Yemɔti Devidi nee ye ɛlɔnema ɛya nsia ne belele zile bɛ zo, na mɔɔ bɛradwule Bisɔ azudenle ne anloa la bie mɔ hale ɛkɛ.

¹⁰ Devidi vale ɛlɔnema ɛya nna doale bɛ; ɛya nwiɔ hale azule ne anloa, ɔluakɛ ɛnee bɛvɛ somaa mɔɔ bɛpɛ azule Bisɔ ne a ɔnyɛ boɛ a.

¹¹ Ɛlɔnema mɔɔ nee Devidi lua la nwunle Yigyibitinli bie wɔ fienemgbole ne anu na bɛvale ye bɛrɛlɛle Devidi. Bɛmanle ye kpanwo ɔlile, bɛmanle ye nzule ɔnlonle,

¹² bɛmanle ye keeki mɔɔ bɛva feege ma bɛyɛ la, yɛɛ vanye ma welera aziakɛ nwiɔ. Mɔɔ ɔlile ɔwiele la, ɔ nwo gyinlanle ye, ɔluakɛ ɛnee kenle kɔkɔlɛ nsa, ɔtɛdile ɛhwee na yeanlo nzule.

¹³ Devidi bizale ye kɛ, “Ɛ menle a le nwane? Ɛvi nienwu?” Ɔbuale kɛ, “Mele Yigyibitinli, yɛɛ mele Amalɛkenli bie sonvolɛ. Me menle gyakyile me hɔle la ɛnɛ le kenle nsa, ɔboalekɛ me nwo dole me.

¹⁴ Yɛhɔvale Kɛlɛte maanle ne mɔɔ wɔ Dwuda nyiakɛ la anu ninyɛne kɔsɔɔti nee Kalɛbe abusua ne maanle ne anu debie biala, yɛɛ yɛyelale Zekelage.”

¹⁵ Devidi bizale ye kɛ, “Ɛ nee me kɛhɔ nwule ɛhye mɔ anwo lɔ ɔ?” Yigyibitinli ne buale ye kɛ, “Ka Nyamenle kɛ ɛnrɛhu me yɛɛ ɛnrɛye me ɛnrɛmaa me menle ne, na me nee wɔ kɛhɔ.”

¹⁶ Na ɔlile Devidi anyunlu ɔ nee ye hɔle. Menli ne mɔ ɛde ɛkponde ɛleka mɔɔ bɛwɔ la amuala, bɛlɛdi, bɛanlo na bɛlɛdi wulupe, bɛ nye ɛlie wɔ anwonyia mɔɔ bɛwua bɛvi Filisitia nee Dwuda la anwo.

¹⁷ Kenle ko ne aleɛbahye ne, Devidi hɔtetale bɛ, ɔ nee bɛ honle ɔhunle bɛ kɔsɔɔti, ɔhale menli ɛya nna mɔɔ lɛ afunlumu na bɛnriandile la.

¹⁸ Debie biala mɔɔ Amalɛkema ne wuale la, Devidi asa hanle bɛ muala, na ɔliele ye mraalɛ nwiɔ ne nee awie biala ɔvile munzule nu.

¹⁹ Debie biala fee amminli. Devidi liele ye menli ne mɔ mraalɛ ne mɔ, bɛ mra mrenya nee mraalɛ nee debie biala mɔɔ Amalɛkema ne wuale la.

²⁰ Devidi eza liele mboane, nlankɛ, yɛɛ nyɛmoa kɔsɔɔti. Ye menli ne mɔ hanle bɛ lile bɛ nyunlu na bɛzele kɛ, “Ɛhye mɔ kɔsɔɔti le Devidi ɛdeɛ.”

²¹ Akee Devidi ziale doale ɛlɔnema ɛya nwiɔ ne mɔɔ hale Bisɔ ne anzi la. Ɛnee bɛvɛ somaa na bɛ nwo ɛyɛ bɛtɛɛ la ati bɛangola bɛ nee Devidi angɔ. Bɛdule bɛrayiale Devidi nee menli mɔɔ nee Devidi hɔle la. Na Devidi bikyele bɛ na ɔvale anyelielɛ ɔbizale bɛ ahye.

²² Menli amumuyɛ nee agbamgbanvolɛ bie mɔ mɔɔ nee Devidi hɔle la zele kɛ, “Bɛ nee yɛ angɔ la ati, debie biala mɔɔ yɛnyianle nee bɛ ninyɛne bɔbɔ mɔɔ yɛza menli ne mɔ yɛlie la, yɛnrɛmaa bɛ. Mɔɔ yɛyɛ yɛamaa bɛ la a le kɛ, awie biala ɛva ɔ ye nee ɔ mra na ɔhɔ.”

²³ Devidi zele bɛ kɛ, “Me mediema, bɛmmayɛ ɛhye wɔ debie mɔɔ Ɛdɛnkɛma ɛva ɛmaa yɛ la anwo; yezinza yɛ na yeye nwule ne mɔ mɔɔ rawuale yɛ la yemaa yɛ.

²⁴ Mɔɔ bɛlɛka la awie biala nee bɛ ɛnrɛyɛ adwenle. Mɔɔ ɛlɔnenli biala mɔɔ hɔle konle ne bie la kɛnyia ye la, zɔhane ala yɛɛ mɔɔ zinzale ninyɛne la ɔwɔ kɛ nyia ye a. Ɔwɔ kɛ bɛkyɛ ye pɛpɛ.”

²⁵ Devidi lile ɛhye anwo mɛla na ɔvi mekɛ ne anu mɔɔ ɛradwu ɛnɛ la kɛ ɔde ala la ɛne wɔ Yizilayɛ maanle ne anu.

²⁶ Devidi ziale hɔle Zekelage la, ɔvale ninyɛne mɔɔ bɛnyianle bɛ wɔ konle ne anu la bie ɔhɔmanle ɔ gɔnwo mɔ Dwuda mgbanyima na ɔzele kɛ, “Ninyɛne mɔɔ yɛnyianle bɛ wɔ Ɛdɛnkɛma kpɔvolɛma ne mɔ lɔ la bɛdabɛ noko bɛ ahyɛlɛdeɛ ɛne.”

²⁷ Ɔzoanle ɔmanle bɛvale ahyɛlɛdeɛ ne mɔ bɛhɔmanle Bɛtɛlema, Releemama mɔɔ wɔ Dwuda nyiakɛ la, yɛɛ menli mɔɔ wɔ azua ɛhye mɔ azo la: Gyatɛɛ,

²⁸ Alowɛ, Sefemo, Ɛhyetɛmowa,

²⁹ Releekale; ɔvale bie ɔhɔmanle Gyɛlamile abusua ne, Kinama,

³⁰ yɛɛ ezuavolɛ mɔɔ wɔ Hɔma, Bolahyan, Etake,

³¹ yɛɛ Hibulɔn la. Ɔvale bie ɔhɔmanle menli mɔɔ wɔ ɛleka biala mɔɔ ɔ nee ye ɛlɔnema hɔkpɔsale la.