1 Sam 14 - BAEBOLO ANZƐƐ BULUKU NWUANZANWUANZA

Dwɔnatan ahonle ɛzilɛ kpole ne

¹ Kenle ko Dwɔnatan zele kpavolɛ ne mɔɔ soa ye konle ninyɛne ne mɔ la kɛ, “Maa yɛhɔ Filisitiama azokoɛleɛ lɔ.” Noko yeambɔ ɔ ze amaneɛ.

² Ɛnee Sɔɔlo ɛyɛ ye azokoɛleɛ wɔ baka bie mɔɔ le kɛ akutue la abo wɔ Megelɔn mɔɔ zua Gebɛya la, ɔ nee ye ɛlɔnema kɛyɛ ɛya nsia a lua a.

³ Sɛlɛvolɛ mɔɔ ɛnee yɛ gyima wɔ Hyaelo la a le Ayekabɔdo adiema nrenya Ahaetɛbe ara Ahaegya. Ahaetɛbe ɔ ze a le Fenɛhaze yɛɛ ɔ nlenya a le Yilae. Menli ne annwu kɛ Dwɔnatan ɛvi ɛkɛ ne ɛhɔ.

⁴ Adenle ne mɔɔ la Mekemahye awoka ne mɔ avinli mɔɔ ɔwɔ kɛ Dwɔnatan dua nuhua kɔ Filisitiama azokoɛleɛ ne la, awolɛ mgbole kpalɛ nwiɔ mɔɔ anloa yɛ nla la wɔ ye bɛne nee fema. Bɛfɛlɛ ko Bozɛze yɛɛ bɛfɛlɛ ko ne Sɛni.

⁵ Ko wɔ adenle ne sɔlɔ mɔɔ di kɔ Mekemahye la, yɛɛ ko ne noko wɔ nyiakɛ mɔɔ di kɔ Giba la.

⁶ Dwɔnatan zele kpavolɛ ne mɔɔ soa ye konle ninyɛne ne la kɛ, “Maa yɛhɔ menli ne mɔɔ ɛnze Nyamenle la azokoɛleɛ lɔ; ɔkɛyɛ kɛ Ɛdɛnkɛma bayɛ gyima ne amaa yɛ, ɔluakɛ kanzɛ yɛanzo bɔbɔ a, debie biala ɛnle ɛkɛ mɔɔ kola tua Ɛdɛnkɛma adenle mɔɔ ɔnrɛmaa ɔnrɛlie yɛ a.”

⁷ Kpavolɛ ne buale ye kɛ, “Debie biala mɔɔ wɔ adwenle se wɔ la, yɛ; megyi ɛ nzi. Wɔ adenle biala anu, menrɛgyakyi ɛ nzi ɛlilɛ.”

⁸ Dwɔnatan zele kɛ, “Mede, yɛkɔ yɛamaa Filisitiama anwu yɛ.

⁹ Saa bɛnwu yɛ na bɛse yɛ kɛ, ‘Bɛhendɛ bɛmaa yɛrado bɛ’ a, yɛbagyinla yɛ bo zo ne koonwu, yɛnrɛdu yɛ bo.

¹⁰ Na saa bɛse yɛ kɛ, ‘Bɛrɛla yɛ nwo ɛke’ a, yɛbahɔ. Ɔluakɛ Ɛdɛnkɛma ɛmaa yɛli bɛ nwo zo konim yɛwie, na ɛhye yɛɛ bayɛ sɛkɛlɛneɛ amaa yɛ a.”

¹¹ Yemɔti bɛmanle Filisitiama nwunle bɛ; na Filisitiama zele kɛ, “Bɛnlea, Hibuluma ne mɔ vi adokule ne mɔ mɔɔ bɛvea nu la ɛlɛfinde.”

¹² Na Filisitia ɛlɔnema ne vɛlɛle Dwɔnatan nee ye sonvolɛ ne kɛ, “Bɛrɛla yɛ nwo ɛke bɛmaa yɛha edwɛkɛ yɛhile bɛ.” Dwɔnatan zele kpavolɛ ne kɛ, “Toa me; Ɛdɛnkɛma ɛmaa Yizilayɛma ɛli bɛ nwo zo konim ɛwie ala ɛne.”

¹³ Dwɔnatan vi awoka ne mɔ avinli gongonle vole doale bɛ, ye sonvolɛ ne li ɔ nzi. Dwɔnatan tetale Filisitiama; mɔɔ ɔka bɛ yeagua la ɛnee ye sonvolɛ ne ɛlɛku bɛ.

¹⁴ Azɛlɛ mɔɔ Dwɔnatan nee ye sonvolɛ ne hunle menli kɛyɛ abulanwiɔ ne zolɛ la kpole kɛyɛ abɛsamu ala.

¹⁵ Ɛzulolɛ kpole hanle Filisitiama mɔɔ wɔ konle azokoɛleɛ ne la kɔsɔɔti. Menli mɔɔ hɔle awule kawua Yizilayɛma akpokpo bɛ la bɔbɔ ahonle dule. Azɛlɛ kpusule, na menli ne anye zo danle bɛ.

Filisitiama anwo zo konimlilɛ

¹⁶ Sɔɔlo menli ne mɔɔ ɛnee wɔ Gebɛya mɔɔ wɔ Bɛngyaman maanle nu, mɔɔ ɛnee ɛlɛtɛ la nwunle kɛ Filisitia ɛlɔnema anye zo ɛda bɛ na bɛbɔ asande.

¹⁷ Yemɔti Sɔɔlo zele ye menli ne mɔ kɛ, “Bɛdia ɛlɔnema ne na bɛnwu menli mɔɔ ɛnle ɛke la.” Bɛdianle bɛ bɛwiele la, bɛnwunle kɛ Dwɔnatan nee kpavolɛ ne mɔɔ soa ye konle ninyɛne ne mɔ la ɛnle ɛkɛ.

¹⁸ Yemɔti Sɔɔlo zele sɛlɛvolɛ Ahaegya kɛ, “Bɛva Nyamenle Ngyekyeleɛ Ɛlɛka ne bɛrɛla.” (Mekɛ zɔhane ɛnee sɛlɛvolɛ Ahaya lɛ Nyamenle Ngyekyeleɛ Ɛlɛka ne li Yizilayɛma anyunlu.)

¹⁹ Mɔɔ Sɔɔlo nee sɛlɛvolɛ ne ɛlɛtendɛ la, alɛra ne mɔɔ ɛnee Filisitiama ɛlɛyɛ wɔ bɛ azokoɛleɛ ne la hɔle anwuma, yemɔti Sɔɔlo zele sɛlɛvolɛ ne kɛ, “Alagye bieko ɛnle ɛkɛ mɔɔ yɛfa yɛbiza Ɛdɛnkɛma edwɛkɛ a.”

²⁰ Sɔɔlo boɔboale ye ɛlɔnema ne anloa na ɔvale konle ɔdoale Filisitiama. Mekɛ ne anu ɛnee Filisitiama adwenle ɛha ɛbɔ nu, na anyezota ɛmaa bɛdabɛ bɛ ngome bɛpɛ bɛ nwo bɛlɛko bɛahuhu bɛ nwo.

²¹ Hibuluma bie mɔ, mɔɔ wɔ Filisitiama afoa na bɛ nee bɛ wɔ bɛ azokoɛleɛ ne la hakyile bɛ adwenle na bɛziale bɛhɔbokale Sɔɔlo nee Dwɔnatan.

²² Zɔhane ala yɛɛ Yizilayɛma mɔɔ hɔle afea wɔ Yifelaem awoka ne mɔ anu la, dele kɛ Filisitiama ɛgua ɛbɔ nu la vindele voanle bɛ ndinlizo

²³ toonwo hɔle Bɛtehavɛn anzi lɔ a. Na Ɛdɛnkɛma liele Yizilayɛma kenle ko ne.

Edwɛkɛ mɔɔ sisile konle ne anzi la

²⁴ Kenle ko ne Yizilayɛma adwenle zɛkyele, ɔluakɛ Sɔɔlo guale bɛ amonle kɛ, “Toonwo mɔɔ ɔkadwu nɔsolɛ la, awie biala mmadi debie kɔkpula kɛ menwɔli me kpɔvolɛma anwo zo konim la. Ɛdawɔ mɔɔ ɛkɛli debie la, munzule ɛha wɔ.” Yemɔti awie biala anva debie anga ɔ nloa.

²⁵ Menli ne kɔsɔɔti hɔle kpɔkɛ ne anu la bɛnwunle kɛ wolɛ wɔ azɛlɛ ne anwo.

²⁶ Eza bɛnwunle kɛ kpɔkɛ ne anu ɛleka biala mɔɔ bɛkɛva la ɛnee wolɛ ɛlɛpepe aze, noko awie biala anva bie anga ɔ nloa, ɔluakɛ bɛsulo amonle ne mɔɔ Sɔɔlo guale bɛ la.

²⁷ Ɛnee Dwɔnatan ɛtɛtele kɛ ɔ ze ɛgua menli ne amonle kɛ bɛmmadi debie, yemɔti ɔdwule wolɛ ne mɔ anwo la, ɔvale baka ne mɔɔ ɔlɛ la ati ɔwɔle wolɛ ne anu ɔwokele ndɛlamoa ko ɔlile, na ɔ nwo gyinlanle ye.

²⁸ Na menli ne mɔ ko zele ye kɛ, “Ɛ ze ɛgua yɛ amonle kɛ, ‘Ɛnɛ kenle ye, awie biala mɔɔ kɛli debie la, munzule ɛha ye;’ yemɔti ɛhɔne ngome ɛmaa yɛ nwo ɛgolo yɛ.”

²⁹ Na Dwɔnatan zele kɛ, “Egya ɛbu amaamuo ɛtane ɛmaa menli ne. Wolɛ ekyi mɔɔ meli la, nea kɛ me nwo ekpundi me bie a.

³⁰ Saa menli ne lile bɛ kpɔvolɛma ne anwo zo konim la bɛlile aleɛ mɔɔ bɛnyianle ye la bie a anrɛɛ bɛ nwo kpundinle bɛ; na anrɛɛ Filisitiama mɔɔ bɛkɛhu bɛ ɛnɛ la kɛyɛ ɛzulolɛ.”

³¹ Kenle ko ne Yizilayɛma lile Filisitiama anwo zo konim. Bɛvi Mekemahye bɛhonle toonwo bɛhɔguale ye Ayegyalɔn. Mekɛ ɛhye anu ɛnee akee ɛhɔne ngome ɛmaa Yizilayɛma anwo ɛwie bɛ golo;

³² yemɔti bɛzile bɛlɔle nu bɛhyele mboane, nlankɛ, mgbole nee ngyikyi, bɛhunle bɛ na bɛlile bɛ nee bɛ mogya ne kɔsɔɔti.

³³ Bɛhanle bɛhilele Sɔɔlo kɛ, “Menli ne ɛlɛyɛ ɛtane atia Ɛdɛnkɛma. Bɛlɛdi nane nee ye mogya ne.” Sɔɔlo deanle nu, “Bɛle ngunzi; bɛhundo bolɛ kpole ko bɛrɛlɛ me ɛke.”

³⁴ Ɔzoanle bɛ kɛ, “Bɛhɔze menli ne mɔ kɛ, ‘Awie biala ɛva ye ɛnlankɛ anzɛɛ ye boane na bɛrahu bɛ bɛli wɔ ɛke, na bɛmmayɛ ɛtane bɛtia Ɛdɛnkɛma Nyamenle kɛ bɛkɛli nane mɔɔ mogya wɔ nu la.’ ” Yemɔti kenle ko ne nɔsolɛ, awie biala vale ye ɛnlankɛ rahunle ye wɔ ɛkɛ ne.

³⁵ Na Sɔɔlo zile azukponle manle Ɛdɛnkɛma. Ɛhye a le azukponle mɔɔ lumua mɔɔ Sɔɔlo zile manle Ɛdɛnkɛma a.

³⁶ Akee Sɔɔlo zele menli ne kɛ, “Bɛmaa yɛhɔ Filisitiama anwo zo ɛnɛ nɔe toonwo alehyenlɛ, yɛbɔ bɛ bo zo, yɛkpokpo bɛ bɔkɔɔ mɔɔ yɛngyakyi ko bɔbɔ a.” Na bɛzele ye kɛ, “Debie biala mɔɔ ɛkulo la, yɛ.” Na sɛlɛvolɛ ne zele kɛ, “Bɛmaa yɛbiza Nyamenle kolaa.”

³⁷ Na Sɔɔlo bizale Nyamenle kɛ, “Menva konle mengɔndoa Filisitiama ɔ? Ɛkɛye bɛ ɛkɛmaa Yizilayɛma ɔ?” Na kenle ko ne Nyamenle ammaa ye mualɛ.

³⁸ Na Sɔɔlo zele mgbanyima ne mɔ kɛ, “Bɛrɛla, bɛranlea ɛtane mɔɔ ɛnɛ bɛyɛ la.

³⁹ Meka tease Ɛdɛnkɛma mɔɔ ko die Yizilayɛma la kɛ, ahenle mɔɔ vale munzule ɛhye rale la, saa me ra Dwɔnatan bɔbɔ a, ɔwɔ kɛ ɔwu.” Na awie biala ambua ye.

⁴⁰ Na Sɔɔlo zele bɛ kɔsɔɔti kɛ, “Bɛgyinla foa ko nehane, na medame me nee me ra Dwɔnatan yɛgyinla foa ko ɛke.” Na menli ne zele Sɔɔlo kɛ, “Debie biala mɔɔ fɛta la, yɛ.”

⁴¹ Yemɔti Sɔɔlo zɛlɛle kɛ, “O Ɛdɛnkɛma, Yizilayɛ Nyamenle, duzu ati a wɔambua me edwɛkɛ ne anwo ɛnɛ a? Saa ɛtane ɛhye vi me anzɛɛ me ra Dwɔnatan a, ɛnee fa ‘Yulem’ sɛkɛlɛneɛ kile; na saa ɔvi wɔ menli Yizilayɛma ɛdeɛ a, ɛnee fa ‘Tɛmen’ sɛkɛlɛneɛ kile.” Na ɔbɔle Sɔɔlo nee Dwɔnatan; menli ne anwo vile nu.

⁴² Eza Sɔɔlo zele kɛ, “Bɛgua medame nee me ra Dwɔnatan yɛ ti nzeleba.” Bɛguale la ɔbɔle Dwɔnatan.

⁴³ Sɔɔlo zele Dwɔnatan kɛ, “Deɛ holɛ ko mɔɔ wɔyɛ la, ka kile me.” Dwɔnatan zele kɛ, “Kpɔma ne mɔɔ ɛnee melɛ la, menvale ɔ ti membɔle wolɛ ne anu mentafele; medame ɛne, mekponle zolɛ kɛ menwɔwu.”

⁴⁴ Na Sɔɔlo zele kɛ, “Dwɔnatan, saa meammaa bɛangu wɔ a, Nyamenle ɛhu me.”

⁴⁵ Na menli ne zele Sɔɔlo kɛ, “Ɛmaa bɛahu Dwɔnatan mɔɔ ɛli konim kpole ɛhye ɛmaa Yizilayɛma la ɔ? Nyamenle ɛkpa ɛgua. Yɛka tease Ɛdɛnkɛma kɛ, ɔ ti enrinli ko bɔbɔ ɛnrɛde ɛnrɛdɔ aze ɛlɛ. Mɔɔ ɔyɛle ɛnɛ la, Nyamenle ɔ.” Yemɔti menli ne liele Dwɔnatan ngoane.

⁴⁶ Akee Sɔɔlo amkpo Filisitiama bieko, na Filisitiama hɔle bɛ maanle nu.

Sɔɔlo belemgbunlililɛ nee ye sua nu amra

⁴⁷ Mɔɔ Sɔɔlo di Yizilayɛma belemgbunli la, ɔhonle ɔtiale ye kpɔvolɛma kɔsɔɔti; ɔhonle ɔtiale Mowabema, Amɔnoma, Yidɔmma, Zoba arelemgbunli nee Filisitiama. Na ɛleka biala mɔɔ ɔhonle la ɔlile konim.

⁴⁸ Ɔhonle kɛ katakyie na ɔlile Amalɛkema bɔbɔ anwo zo konim, ɔliele Yizilayɛma ɔvile bɛ kpɔvolɛma mɔɔ bawua bɛ la asa anu.

⁴⁹ Sɔɔlo amra mrenya ne mɔ a le Dwɔnatan, Yehyevae yɛɛ Mɛlekaehyua. Bɛfɛlɛ ɔ ra raalɛ kpanyinli ne Milabe, yɛɛ bɛfɛlɛ ekyi ne Maekale.

⁵⁰ Bɛfɛlɛ ɔ ye Ahenoam; ɔle Ahaemaze ara raalɛ. Safohyenle kpanyinli mɔɔ nea ye ɛlɔnema ne anwo zo la a le ɔ wuvuanyi Nɛɛ ara Abenɛɛ.

⁵¹ Sɔɔlo ɔ ze Kehye yɛɛ Abenɛɛ ɔ ze Nɛɛ le mɛzeamra. Bɛ ze a le Abayɛle.

⁵² Sɔɔlo mekɛ zo, ɔ nee Filisitiama honle mgbole mgbole fane dɔɔnwo, yemɔti mekɛ biala mɔɔ ɔkɛnwu katakyie bie la ɔfa ye ɔboka ɔ nwo.