1 Sam 1 - BAEBOLO ANZƐƐ BULUKU NWUANZANWUANZA

Ɛlekana nee ye abusua ne wɔ Hyaelo

¹ Nrenya bie mɔɔ bɛfɛlɛ ye Ɛlekana la woale ɛkɛ, ɔvi Yifelaem abusua ekpunli ne anu. Ɔdɛnlanle sua ne mɔɔ bɛfɛlɛ ye Releema, mɔɔ wɔ Yifelaem awoka ne mɔ azo la azo. Bɛfɛlɛ ɔ ze Gyɛloham. Gyɛloham ɔ ze a le Ɛlaehu; Ɛlaehu ɔ ze a le Tohu; Tohu ɔ ze a le Zɛfe.

² Ɛlekana gyale mraalɛ nwiɔ. Bɛfɛlɛ ko Hana yɛɛ bɛfɛlɛ ko Pɛnena. Pɛnena bɔle ɛdane na Hana anwo ralɛ.

³ Ɛvolɛ biala Ɛlekana vi Releema kɔ Hyaelo. Ɛkɛ ne a sɛlɛvolɛ Yilae amra mrenya nwiɔ ne, Hɔfenae nee Fenɛhaze yɛ bɛ sɛlɛvolɛ gyima ne a. Ɛlekana kɔ ɛkɛ ne ɛvolɛ biala kɔsonle na ɔbɔ azu ɔmaa Tumivolɛ Ɛdɛnkɛma.

⁴ Mekɛ biala mɔɔ Ɛlekana kabɔ azu la, ɔtu ye azubɔdeɛ ne anu ɛkpɔ ko ɔmaa ɔ ye Pɛnena na ɔmaa ɔ mra mrenya nee mraalɛ ne mɔ biala ɛkpɔ ko.

⁵ Ɔkulo Hana kpalɛ noko ɛkpɔ ko ala a ɔfa ɔmaa ɔdaye a, ɔluakɛ Ɛdɛnkɛma ammaa yeanwo ralɛ.

⁶ Dahuu ɔ hola Pɛnena si ye amgbu na ɔfa ye mota ɔse ye, ɔluakɛ Ɛdɛnkɛma ammaa yeannyia ɛkolɛ yeanwo ralɛ.

⁷ Nyɛleɛ ɛhye hɔle zolɛ ɛvolɛ biala; mekɛ biala mɔɔ bɛkɛhɔ Ɛdɛnkɛma Ɛzonlenlɛ Sua ne anu kɛ bɛkazonle la Pɛnena ta Hana anye zo ɔmaa ɔsu toonwo mɔɔ aleɛ bɔbɔ ɔnli bie a.

⁸ Saa ɔba ye zɛhae a ɔ hu Ɛlekana biza ye kɛ, “Hana, duzu ati a ɛlɛsu a? Duzu ati a ɛnrɛli debie a? Duzu ati a dahuu ɛwɔ nyane nu a? Anzɛɛ me nwo ɛnlɛ nvasoɛ ɛmmaa wɔ ɛndɛla mralɛ mrenya bulu ɔ?”

Hana nee Yilae

^9-10 Kenle ko bɛwiele debie di wɔ Hyaelo la, Hana dwazole. Ɛnee ye adwenle ɛzɛkye dɔɔnwo, na ɔvale nyane nee alɔbɔlɛ ɔzunle kpole kpalɛ, na ɔbɔle ɔ bo kɛ ɔsɛlɛ Ɛdɛnkɛma. Mekɛ ne anu ɛnee sɛlɛvolɛ Yilae de ɔ bo zo ne wɔ Ɛdɛnkɛma Ɛzonlenlɛ Sua ne anlenkɛ ne anloa.

¹¹ Na Hana bɔle ɛwɔkɛ kɛ, “Tumivolɛ Ɛdɛnkɛma, to ɛ nye nea me, wɔ sonvolɛ; mehyia na kakye me; mmamaa ɛ rɛle fi me. Mebɔ ɛwɔkɛ kɛ saa ɛmaa menyia ɛkolɛ mewo ralɛ nrenya a menwɔdu ye nee ye ɛbɛlabɔlɛ muala menwɔmaa wɔ, na ye enrinli ko bɔbɔ, bɛnrɛde bɛnrɛdo aze.”

¹² Mekɛ mɔɔ Hana gua zolɛ ɛlɛsɛlɛ Ɛdɛnkɛma la, ɛnee Yilae ɛlɛnea ɔ nloa.

¹³ Hana andendɛ na ɛnee ɔlɛsɛlɛ ɔ ti anu la ati, ɔ nloa ala a ɔbukebuke a, yemɔti Yilae bule ye kɛ sonla bie mɔɔ ɛbo nza la.

¹⁴ Yemɔti Yilae zele ye kɛ, “Duzu ati a wɔbo zɛhae ɛ? Gyakyi nzanlonlɛ na yɛ ɛ nye gyɛlɛmgbɛɛnye”

¹⁵ Hana zele ye kɛ, “Me menle, mele raalɛ mɔɔ me adwenle ɛha ɛbɔ nu a. Metɛnonle nwanye anzɛɛ nza ɛsesebɛ biala; me nyane edwɛkɛ a melɛka meahile Ɛdɛnkɛma a.

¹⁶ Mmadwenle kɛ wɔ sonvolɛ raalɛ, mele sonlamgbane; melɛ tendenle ye amuala, me nyane nee me anwubɛnyunlu ala yɛɛ melɛye meado Ɛdɛnkɛma anyunlu a, ɔluakɛ meyɛ anwunvɔne.”

¹⁷ Na Yilae zele ye kɛ, “Kɔ anzonudwolɛ nu; wɔ nzɛlɛlɛ ne mɔɔ wɔva wɔdo Yizilayɛ Nyamenle ne anyunlu la, ɔyɛ ye zɔhane ɔmaa wɔ.”

¹⁸ Hana buale kɛ, “Maa wɔ sonvolɛ raalɛ ye ɛzɔ ɛ nye dahuu.” Akee Hana hɔle sua nu, ɔlile debie na ɔgyakyile ɔ nwo alɔbɔlɛ ɛyɛlɛ.

Samoɛle awolɛ nee ye Ɛdɛnkɛma asa anu ɛduwulalɛ

¹⁹ Alehyenlɛ ne anu, ye aleɛbahye ne Ɛlekana nee ye sua nu amra ne dwazole ndɛndɛ na bɛzɛlɛle Ɛdɛnkɛma. Akee bɛziale bɛhɔle bɛ sua zo Releema. Ɛlekana nwunle ɔ ye Hana, na Ɛdɛnkɛma hakyele ye.

²⁰ Yemɔti yeangyɛ biala yɛɛ Hana vale ɛkolɛ a; ɔwole ralɛ nrenya na bɛdonle ye Samoɛle, ɔluakɛ Hana se, “Menzɛlɛle ye Ɛdɛnkɛma ɛkɛ.”

²¹ Eza mekɛ ne dwule kɛ ɔwɔ kɛ Ɛlekana nee ye sua nu amra kɔ Hyaelo kɔbɔ bɛ ɛvolɛ azu ne na ɔtua ye ɛwɔkɛbɔlɛ ɔmaa Ɛdɛnkɛma.

²² Hana angɔ bie. Ɔzele ɔ hu kɛ, “Mekendɛ, saa kakula ne pɛ nyɛfonlɛ na ɔ nwo kputi a mebava ye meahɔ Ɛdɛnkɛma Ɛzonlenlɛ Sua ne anu, na ɛkɛ ne yɛɛ ɔbadɛnla dahuu a.”

²³ Ɛlekana buale ye kɛ, “Nɔhalɛ, yɛ mɔɔ ɔwɔ kɛ ɛyɛ la; tɛnla sua nu kɔkpula mekɛ mɔɔ kakula ne kɛpɛ nyɛfonlɛ na ɔ nwo kɛkputi la. Ɛdɛnkɛma ɛmaa wɔ ɛwɔkɛ ne ɛyɛ zɔhane.” Yemɔti Hana dɛnlanle sua nu na ɔlile kakula ne adane.

²⁴ Mɔɔ kakula ne pɛle nyɛfonlɛ na ɔ nwo kputile la, Hana vale ɛnlankɛ nyinli mɔɔ ɛli ɛvolɛ nsa la, esamo kilo bulu yɛɛ nwanye nwoma kodoku ko na ɔvale kakula dɛkɛɛ ne ɔhɔle Ɛdɛnkɛma Ɛzonlenlɛ Sua ne anu wɔ Hyaelo.

²⁵ Mɔɔ bɛhunle ɛnlankɛ ne bɛwiele la, bɛvale kakula ne bɛhɔmanle Yilae.

²⁶ Hana zele ye kɛ, “Yɛmenle, asoo ɛkakye me? Nɔhalɛ, mame a mele raalɛ ne mɔɔ ragyinlanle ɛ nyunlu zɛlɛle Ɛdɛnkɛma la.

²⁷ Menzɛlɛle ye kɛ ɔmaa menwo ralɛ, na Ɛdɛnkɛma ɛyɛ me ɛbizalɛdeɛ ɛmaa me.

²⁸ Yemɔti medu ye memaa Ɛdɛnkɛma. Mekɛ dodo mɔɔ ɔdi ye wɔ azɛlɛ ye azo la, ɔle Ɛdɛnkɛma ɛdeɛ.” Na ɔyeyɛle Ɛdɛnkɛma wɔ ɛkɛ ne.