1 Pit 2 - BAEBOLO ANZƐƐ BULUKU NWUANZANWUANZA

Tease Bolɛ ne nee Maanle Nwuanzanwuanza ne

¹ Zɔhane ati, bɛhwe bɛ nwo bɛvi ɛtane muala anwo; bɛmmabɔ adalɛ, bɛmmayɛ ngunzi, bɛmmatwe nungule, bɛmmayɛ aholoba.

² Bɛyɛ bɛ nwo kɛ nlɔma mɔɔ sunsum nu nyɛfonzule ɛhɔne ɛlɛku bɛ la, amaa saa bɛnyia ye bɛno a bɛanyi na bɛanyia ngoane.

³ Ɔluakɛ Nyamenle Edwɛkɛ ne se, “Bɛdabɛ bɛhola bɛnwu kɛ Awulae atiakunlu le kɛnlɛma.”

⁴ Bɛrɛla Awulae ɛkɛ. Yemɔ a ɔle Tease Bolɛ ne mɔɔ ewiade amra kpole ye kɛ ɔle debie mgbane na Nyamenle noko ɛkpa nu ɛye ye kɛ ɔle bolɛ mɔɔ anwo hyia la a.

⁵ Bɛrɛla kɛ bɛle tease awolɛ na bɛmaa bɛva bɛ bɛzi sunsum nu ɛzonlenlɛ sua mɔɔ bɛsonle nu, kɛ bɛle sɛlɛvolɛma nwuanzanwuanza na bɛlua Gyisɛse Kelaese anwo zo bɛbɔ sunsum nu azu mɔɔ sɔ ɛnyelɛ la bɛmaa Nyamenle.

⁶ Nyamenle Edwɛkɛ ne se, “Mekpa nu meye bolɛ mɔɔ sonle bolɛ, kɛ mefa meayɛ bolɛ mɔɔ anwo hyia wɔ Zayɔn; mɔɔ kɛlie ye kɛli la anyunlu ɛnrɛgua aze ɛlɛ.”

⁷ Bolɛ ɛhye sonle bolɛ kpole kpalɛ maa bɛdabɛ mɔɔ bɛdie bɛdi la, na bɛdabɛ mɔɔ bɛnlie bɛnli la, Nyamenle Edwɛkɛ ne se, “Bolɛ ko ne ala mɔɔ suatovoma ne kpole kɛ ɔle debie mgbane la, yemɔ ala a ɔrayɛle bolɛ mɔɔ anwo hyia kpalɛ la a.”

⁸ Eza Nyamenle Edwɛkɛ ne bie se, “Ɛhye le bolɛ mɔɔ bamaa menli adu koti a; ɔle bodane mɔɔ bamaa bɛadu bɛagua a.” Bɛtu koti, ɔboalekɛ bɛnlie edwɛkɛ ne bɛnli; Nyamenle ngyehyɛlɛ ne kɛ de la ɛne.

⁹ Bɛmɛ a bɛle menli mɔɔ Nyamenle ɛkpa nu ɛye bɛ a. Bɛle Belemgbunli ne sɛlɛvolɛma, maanle nwuanzanwuanza, Nyamenle ɔdaye ye menli mɔɔ yeboɔboa yekpondɛ bɛ bo zo na yevɛlɛ bɛ kɛ bɛvi awozinli nu bɛrɛla ye wienyi ne anu na bɛbɔ ye nwanwane gyima ne nolo a.

¹⁰ Mekɛ bie ɛnee bɛnzɔho menli bɔbɔ, na ɛnɛ bɛle Nyamenle menli. Mekɛ bie ɛnee bɛnze Nyamenle anwunvɔnezelɛ ne deɛ holɛ, na ɛnɛ bɛ sa ɛha ye anwunvɔnezelɛ ne.

Nyamenle ngɛkɛlɛ

¹¹ Ayi mɔ, mesɛlɛ bɛ, bɛle nyɛvolɛ nee adendulɛma wɔ ewiade! Bɛmmadi nwonane atiakunluwɔzo ne mɔ mɔɔ dahuu nee bɛ ɛkɛla ko la anzi fee.

¹² Ɔwɔ kɛ bɛmaa bɛ nyɛleɛ wɔ maanlema avinli yɛ kɛnlɛma, amaa saa bɛsi bɛ amgbu kɛ bɛnle kpalɛ bɔbɔ a, ɛnee kɛmɔ bɛnwu bɛ nyɛleɛ kpalɛ ne la ati bɛaye Nyamenle ayɛlɛ wɔ Kenle ne mɔɔ Awulae bara la.

¹³ Awulae ati bɛha bɛ nwo aze bɛmaa menli mɔɔ lɛ tumi wɔ bɛ sa nu mɔɔ le kɛ Maanle Maanle Belemgbunli ne, mɔɔ yemɔ a maanle ne anu tumi wɔ ɔ sa nu la,

¹⁴ nee amɛnladoma, mɔɔ le kɛ ɛzoanlɛ bie a bɛzoa bɛ kɛ bɛradea maamɔvoma, na bɛhanvo bɛdabɛ mɔɔ bɛdi boɛ la.

¹⁵ Ɔluakɛ Nyamenle ɛhulolɛ a le kɛ bɛkɛva bɛ nyɛleɛ kpalɛ ne mɔ bɛkɛmaa ahɔnwɔne kɛgyakyi mgbane mgbane ɛhehanlɛ.

¹⁶ Bɛdɛnla kɛ bɛdi bɛ ti anwo, noko bɛmmafa bɛ ti anwo ɛlilɛ ne bɛkedɛheda ɛtane zo. Bɛdɛnla kɛ bɛle Nyamenle ngɛkɛlɛ.

¹⁷ Bɛli menli kɔsɔɔti eni. Bɛhulo bɛ gɔnwo mɔ diedima. Bɛzulo Nyamenle na bɛli Maanle Maanle Belemgbunli ne eni.

Kelaese amaneɛnwunlɛ nwo ndonwo

¹⁸ Bɛmɛ ngɛkɛlɛ, bɛbɛlɛ bɛ nwo aze bɛmaa bɛ menle mɔ; bɛmmabu mɔɔ atiakunlu le kɛnlɛma la angome, na bɛbu mɔɔ ati yɛ se la noko.

¹⁹ Saa bɛfa Nyamenle ɛhulolɛ bɛsie bɛ nyunlu, na ɔlua yemɔti bɛnwu amaneɛ mɔɔ ɛnfɛta la, na bɛsi nwolɛ abotane a, ɔbayila bɛ.

²⁰ Ɔluakɛ duzu nvasoɛ yɛɛ bɛkɛnyia ye kɛ bɛkɛyɛ ɛtane na bɛkɛnyia nwolɛ ndeanlɛ a? Na saa bɛdi boɛ la ati bɛnwu nwolɛ amaneɛ na bɛsi nwolɛ abotane a, Nyamenle bayila bɛ.

²¹ Bɛdabɛ bɛ ti Kelaese mumua ne nwunle amaneɛ vale yɛle ndonwo manle bɛ. Na ɛhye noko ala ati yɛɛ Nyamenle ɛvɛlɛ bɛ a, amaa bɛava ɔ gyakɛ.

²² Yeanyɛ ɛtane biala, yɛɛ yeambɔ adalɛ yeangile awie biala.

²³ Noko mɔɔ bɛbɔ ye aholoba la, yeambɔ bɛ bie, bɛgolo ɔ nwo la, yeandɛ ɔ nloa anu; mɔɔ ɔnwu amaneɛ bɔbɔ la, yeanwunlonwunla awie, na ɔvale ye anyelazo kɔsɔɔti ɔdole Nyamenle anwo zo kɛ yemɔ a ɔle pɛlepɛle Ndɛnebuavolɛ ne a.

²⁴ Kelaese ɔdaye mumua ne ɔliele yɛ ɛtane ne mɔ wɔ ye sonlabaka ne anu ɔhɔle meanubaka ne azo, amaa yɛawu yɛamaa ɛtane na yɛadɛnla yɛamaa pɛlepɛlelilɛ. Bɛlua ye ɛbodalɛ nganlɛ ne mɔ azo a bɛyɛ bɛ ayile a.

²⁵ Ɛnee bɛle kɛ mboane mɔɔ ɛminli la, na kɛkala bɛva bɛ bɛzia bɛra kɛ bɛrali Mboaneneavolɛ ne nee bɛ ɛkɛla sinzavolɛ ne anzi.