1 Pit 1 - BAEBOLO ANZƐƐ BULUKU NWUANZANWUANZA

¹ Kɛlata ɛhye vi medame Pita, mɔɔ mele Gyisɛse Kelaese ɛzoanvolɛ la ɛkɛ. Melɛ mekamaa Nyamenle menli ne mɔɔ yekpa nu yeye bɛ na bɛha maanɔne wɔ Pɔntɛse, Galeehyea, Kapɛdosea, Ehyea, yɛɛ Baetenea maanzinli ne mɔ anu la amuala.

² Nyamenle Selɛ ne luale ye bodane ne azo kpale nu yele bɛ na ɔluale ye Sunsum ne azo ɔyɛle bɛ menli mɔɔ anwo te la, kɛ bɛyɛ tieyɛ bɛmaa Gyisɛse Kelaese na ye mogya ne ade bɛ nwo. Nyamenle ɛlo bɛ na ɔmaa bɛ anzonudwolɛ molozo.

Anyelazo mɔɔ ɛnwu ɛlɛ

³ Ayɛlɛyelɛ ɛha Nyamenle, yɛ Awulae Gyisɛse Kelaese ɔ Ze ne! Yelua ye ɛlolɛ kpole ne azo yedwazo Gyisɛse Kelaese yevi ewule nu na yemaa yɛnyia ngoane fofolɛ nwo anyelazo mɔɔ ɛnwu ɛlɛ a.

⁴ Ɔlua zolɛ yɛ nye la nyilalɛ bebelebe ne mɔɔ Nyamenle ɛva ɛzie ye menli ne la azo. Bɛmɛ bɛ ti, yeva nyilalɛ ɛhye mɔɔ ɛmkpɔlɔ, ɔnzɛkye, yɛɛ ɔndu anzɛɛ ɔmkpa la yezie anwuma lɔ yemaa bɛ.

⁵ Zɛhae nyilalɛ ne le bɛdabɛ mɔɔ ɔlua bɛ diedi ti Nyamenle tumi ne dielie bɛ gyɛlɛɛnye na bɛbaye ngoanelielɛ ne bɛahile bɛ wɔ mekɛ ne mɔɔ li amozi la ɛdeɛ.

⁶ Ɛhye ati saa yera kɛ ɔwɔ kɛ bɛdi nyane wɔ mekɛ ekyi ye anu wɔ sɔnea nee amaneɛnwunlɛ ngakyile nu a, ɔwɔ kɛ bɛdi fɛlɛko wɔ ɛhye anwo.

⁷ Ninyɛne ɛhye mɔ wɔ ɛkɛ kɛ bɛfa bɛazɔ bɛ diedi bɛanlea saa ɔgyi kpundii a. Ezukoa nvutuke bɔbɔ mɔɔ sɛkye la, bɛfa senle a bɛnea kɛ ɔle kpalɛ a; zɔhane ala yɛɛ ɔwɔ kɛ bɛ diedi ne mɔɔ hyia tɛla ezukoa nvutuke la bɛsɔ ye bɛnea a, amaa yeava ayɛlɛyelɛ, anyunlunyia, yɛɛ enililɛ yearɛlɛ bɛ wɔ Kenle ne mɔɔ Gyisɛse bara la.

⁸ Bɛtɛnwunle Gyisɛse ɛlɛ, noko bɛkulo ye. Kɛkala bɔbɔ bɛnnwu ye, noko bɛdie ye bɛdi, na ɔlua zo bɛ nye die na bɛdi fɛlɛko kpole mɔɔ ɛnloanlɛ ɛngola ɛnga a,

⁹ ɔboalekɛ bɛlua bɛ diedi mɔɔ wɔ ye nu la azo bɛlɛdie bɛ ɛkɛla ngoane.

¹⁰ Nyamenle kpɔmanvolɛma mɔɔ hanle ɛlolɛ ɛhye mɔɔ le bɛ ɛdeɛ la anwo edwɛkɛ dole ɛkɛ ne la nleɛnleanle nu, na bɛkpondɛle ngoanelielɛ ɛhye mɔɔ Nyamenle bava amaa bɛ la anu.

¹¹ Bɛbɔle mɔdenle kɛ bɛkɛnwu sonla holɛ ko ne mɔɔ bara nee mekɛ holɛ ko ne mɔɔ ɔbava yeara la. Ɛhye a le mɔɔ ɛnee Kelaese Sunsum ne mɔɔ wɔ bɛ nu la ɛlɛkilehile bɛ na ɔka nyane mɔɔ ɔwɔ kɛ Kelaese nwu ye nee anyunlunyia mɔɔ li ɔ nzi la anwo bie ɔkile bɛ a.

¹² Nyamenle yele hilele ye kpɔmanvolɛma mɔɔ luale Sunsum Nwuanzanwuanza ne mɔɔ bɛzoanle ye vi anwuma rale la azo bɔle Edwɛkpa ɛhye nolo hilele bɛ, kɛ tɛ bɛdabɛ kpɔmanvolɛma bɛ ti yɛɛ bɛyɛle zɔhane gyima ne a, na bɛmɛ Kelaese ɛdoavolɛma bɛ ti ɔ. Ɛhye mɔ le ninyɛne mɔɔ Nyamenle soanvolɛma akunlu a anrɛɛ bɛde ɔ bo a.

Bɛdɛnla nwuanzanwuanza nu

¹³ Zɔhane ati, bɛzie bɛ adwenle koonwu, bɛyɛ bɛ nye gyɛlɛmgbɛɛnye na bɛmaa bɛ nye ɛla nyilalɛ ne mɔɔ bɛbanyia ye wɔ mekɛ mɔɔ Gyisɛse Kelaese kɛra la azo.

¹⁴ Bɛyɛ tieyɛ bɛmaa Nyamenle na bɛmmamaa bɛ atiakunluwɔzo sie bɛ kɛ dɛba ne mɔɔ ɛnee bɛnze nwolɛ bie la.

¹⁵ Nyamenle ne mɔɔ ɛvɛlɛ bɛ la anwo te, yemɔti bɛmaa bɛ nwo ɛde wɔ nyɛleɛ biala anu.

¹⁶ Nyamenle Edwɛkɛ ne se, “Ɔwɔ kɛ bɛmaa bɛ nwo te, ɔboalekɛ mele nwuanzanwuanza.”

¹⁷ Bɛyɛ nzɛlɛlɛ a bɛfɛlɛ Nyamenle ne mɔɔ ɔnnea sonla nyunlu na ɔbua menli kɔsɔɔti ndɛne, kɛmɔ biala nyɛleɛ si de la bɛ Ze. Zɔhane ati, bɛva Nyamenlezulolɛ bɛbɔ bɛ ɛbɛla wɔ mekɛ mɔɔ bɛwɔ nlɔnu la.

¹⁸ Bɛdabɛ bɛze mɔɔ bɛduale ye wɔ bɛ ti na bɛahola bɛakpɔne bɛ bɛavi bɛ nlenya mɔ ɛbɛla mgbane mgbane ɛbɔlɛ ne anu la. Bɛanva debie mɔɔ ɛngyɛ na yeazɛkye, mɔɔ le kɛ ezukoa nvutuke anzɛɛ dwɛtɛ fufule,

¹⁹ bɛvale Gyisɛse, mɔɔ le boaneralɛ mɔɔ anwo ɛnlɛ dɛne biala la mogya ne mɔɔ sonle bolɛ la a bɛkpɔnenle bɛ a.

²⁰ Nyamenle vale ye ziele ɛkɛ dɛba kolaa na bɛabɔ ewiade, yɛɛ bɛmɛ bɛ ti bɛye ye bɛhile wɔ mekɛ ye mɔɔ li amozi la anu a.

²¹ Ɔlua ɔ nwo zo yɛɛ bɛlie Nyamenle ne mɔɔ dwazole ye vile ewule nu na ɔmanle ye anyunlunyia la bɛli, na kɛkala bɛ diedi nee bɛ anyelazo ɛragyinla Nyamenle anwo zo a.

²² Kɛkala mɔɔ ɔlua bɛ tieyɛ wɔ nɔhalɛ ne anwo bɛde bɛ nwo bɛvi ninyɛndane nwo na bɛnyia ɛhulolɛ bɛmaa bɛ mediema diedima la, bɛmaa bɛ ɛhulolɛ ne ɛyɛ nɔhalɛ ɛhulolɛ mɔɔ vi bɛ ahonle nu a.

²³ Ɔluakɛ bɛlua tease Ɛdɛnkɛma Nyamenle ne edwɛkɛ zo bɛwo bɛ fofolɛ kɛ bɛle mralɛ mɔɔ ɛnwu ɛlɛ la na bɛnle menli mɔɔ wu la amra.

²⁴ Nyamenle Edwɛkɛ ne se, “Menli kɔsɔɔti le kɛ ndile, bɛ anyunlunyia le kɛ ndotolo. Ndile ne nwoso na ndotolo ne kpolo,

²⁵ noko Awulae edwɛkɛ ne wɔ ɛkɛ ne dahuu.” Edwɛkɛ ɛhye a le Edwɛkpa ne mɔɔ bɛbɔle ye nolo bɛhilele bɛ la.