1 Edk 24 - BAEBOLO ANZƐƐ BULUKU NWUANZANWUANZA

Sɛlɛvolɛma ne gyima

¹ Aalɔn abo zo amra ne a le ɛhye mɔ. Aalɔn wole mrenya nna: Needabe, Abaehu, Ɛlieza, yɛɛ Yetamaa.

² Needabe nee Abaehu wule kolaa na bɛ ze awu, yɛɛ bɛangyakyi mralɛ nee nlɔnra. Yemɔti bɛ mediema Ɛlieza nee Yetamaa yɛle sɛlɛvolɛma.

³ Belemgbunli Devidi hyɛle Aalɔn abo zo amra ne anu ekpunli ekpunli na ɔmanle ko biala gyima. Ɛlieza abo zo sonla bie mɔɔ bɛfɛlɛ ye Zeedɔko, yɛɛ Yetamaa abo zo sonla bie mɔɔ bɛfɛlɛ ye Ahemɛlɛke la a boale Devidi manle ɔyɛle ngyehyɛlɛ ne a.

⁴ Bɛhyɛle Ɛlieza abo zo amra ne anu ekpunli bulu nee nsia, yɛɛ bɛhyɛle Yetamaa abo zo amra ne anu ekpunli mɔtwɛ. Bɛyɛle ye zɔhane, ɔboalekɛ ɛnee mbusua mgbanyinli dɔɔnwo wɔ Ɛlieza abo zo amra ne anu tɛla Yetamaa.

⁵ Kɛmɔ ɛnee sunsum nu gyima zo neavolɛ mgbanyinli nee Ɛzonlenlɛ Sua ne neavolɛ mgbanyinli wɔ Ɛlieza nee Yetamaa abo zo amra ne mɔ anu la ati, bɛguale nzeleba na bɛaye ekpunli ko mɔɔ ɔwɔ kɛ yɛ gyima la.

⁶ Saa bɛgua Ɛlieza abo zo amra ne mɔ ati nzeleba ko a, bɛgua Yetamaa ɔdaye ɔ bo zo amra ne mɔ ɛdeɛ ko. Livaenli kɛlɛhɛlɛvolɛ Nɛtanɛle ara Hyɛmaya a kɛlɛhɛlɛ bɛ aluma wɔ buluku nu sie a. Belemgbunli Devidi safohyenle mgbanyinli, sɛlɛvolɛ Zeedɔko, Abayata ara Ahemɛlɛke, yɛɛ sɛlɛvolɛ mbusua ekpulike ekpulike ne mɔ mgbanyinli nee Livae mbusua mgbanyinli a nleanle lile nwolɛ daselɛ manle bɛyɛle a.

^7-18 Kɛ bɛzile bɛhyehyɛle gyima ne bɛmanle mbusua ekpulike ekpulike abulanwiɔ nee nna ne la ɛne. 1. Gyɛhɔyalebe 2. Gyɛdaya 3. Hɛlem 4. Siyɔlem 5. Malekaegya 6. Maegyamen 7. Hakɔzo 8. Abaegya 9. Gyɛhyua 10. Hyɛkanaya 11. Yilayahyebe 12. Gyeekem 13. Hɛpa 14. Gyɛhyɛbɛyabe 15. Belega 16. Yemɛ 17. Hizɛ 18. Hapizɛze 19. Pɛtahaya 20. Gyɛhɛzekɛle 21. Gyeeken 22. Gamɛle 23. Dɛlaya 24. Meeyazaya

¹⁹ Bɛhɛlɛle ekpunli ɛhye mɔ ko biala duma nee nuhua menli ne aluma bɛwulale buluku nu na bɛhilele mekɛ mɔɔ ɔfa ɔkɔ gyima wɔ Ɛzonlenlɛ Sua ne anu ɔkɔyɛ ye ɛzonlenlɛ gyima ne, kɛmɔ bɛ nlenya Aalɔn luale Yizilayɛ Ɛdɛnkɛma Nyamenle ne mɛla zo hyehyɛle la.

Livaema ne mɔ

²⁰ Livae abo zo amra mbusua mgbanyinli ne mɔ bie mɔ ɛne: Amelam nee ɔ ra Hyɛbuwɛle abo zo amra kpanyinli a le Gyɛdaya.

²¹ Rilihabaya abo zo amra kpanyinli a le Yehyaya.

²² Yezaa nee ɔ ra Hyɛlomete abo zo amra kpanyinli a le Gyeehate.

²³ Hibulɔn abo zo amra: Gyɛlaya a lumua a, Amalaya doa ye, Gyɛheezeɛle li ɔ nzi, yɛɛ Gyɛkamɛyam a li amozi a.

²⁴ Ɛzeɛle nee ɔ ra Maeka abo zo amra kpanyinli a le Hyeemɛ.

²⁵ Ɛzeɛle nee ɔ ra Yehyaya, mɔɔ le Maeka adiema ne, abo zo amra kpanyinli a le Zɛkalaya.

²⁶ Mɛlɛlae abo zo mra: Malae, Muhyae, yɛɛ Gyeeyazaya.

²⁷ Gyeeyazaya wole mrenya nsa: Hyoham, Zakɛ, yɛɛ Yebelae.

^28-29 Malae wole mrenya nwiɔ: Ɛlieza nee Kehye. Ɛlieza anwo nrenya, na Kehye wole nrenya ko. Yemɔ a le Gyɛlamii.

³⁰ Muhyae wole mrenya nsa: Malae, Yidɛ, yɛɛ Gyɛlemo. Ɛhye mɔ amuala le Livae mbusua mgbanyinli.

³¹ Abusua kpanyinli ne nee ɔ mediema ngakula ne mɔ ko a guale nzeleba hyɛle gyima ne a, kɛmɔ bɛ busuanli Aalɔn abo zo amra sɛlɛvolɛma ne yɛle la. Belemgbunli Devidi, Sɛlɛvolɛ Zeedɔko, Ahemɛlɛke, yɛɛ sɛlɛvolɛma mbusua mgbanyinli nee Livae mbusua mgbanyinli ne mɔ a nleanle manle bɛguale nzeleba ne bɛyɛle ngyehyɛlɛ ne a.