1 Edk 23 - BAEBOLO ANZƐƐ BULUKU NWUANZANWUANZA

¹ Devidi akee yɛle ɛrelera nwosonwoso, na ɔvale ɔ ra Sɔlɔmɔn ɔziele Yizilayɛ belemgbunli.

Livaema gyima ne

² Belemgbunli Devidi manle Yizilayɛma mbusua mgbanyinli nee sɛlɛvolɛma nee Livaema ne mɔ amuala rayiale.

³ Ɔdianle mrenya mɔɔ wɔ Livae abusua ekpunli ne anu, mɔɔ ɛli ɛvolɛ abulasa mɔɔ kɔ la, na bɛnyianle apenle ngoko abulasa nee mɔtwɛ.

⁴ Belemgbunli ne yele nuhua apenle ngoko abulanwiɔ nee nna kɛ bɛnlea Ɛzonlenlɛ Sua ne gyima ne azo, nuhua apenle nsia ɛyɛ ndɛnebuavolɛma nee kɛlɛhɛlɛvolɛma,

⁵ apenle nna ɛzinza nlenkɛ ne mɔ, yɛɛ nuhua apenle nna noko ɛva agole ninyɛne mɔɔ belemgbunli ɛyɛ ɛmaa bɛ la ɛdo edwɛne ɛye Ɛdɛnkɛma ayɛlɛ.

⁶ Devidi hyɛle Livaema ne anu nsa, kɛmɔ bɛ mbusua ekpulike ne mɔ de la. Bɛmɛ a le Gɛhyɔn, Kohate, yɛɛ Mɛlɛlae.

⁷ Gɛhyɔn wole mrenya nwiɔ: Leedan, yɛɛ Hyemɛyae.

⁸ Leedan wole mrenya nsa: Gyɛhayɛle, Zitam, yɛɛ Dwowɛle.

⁹ Ɛhye mɔ a le Leedan abusua ekpulike ne mgbanyinli a. (Hyemɛyae wole mrenya nsa: Hyɛlomo, Heeziyɛle, yɛɛ Hɛlan.)

^10-11 Hyemɛyae wole mrenya nna: Gyeehate a le kpanyinli a, Zaena li ɔ nzi, Gyiyɛhye doa ye, yɛɛ Bɛlaya a le kakula a. Gyiyɛhye nee Bɛlaya annyia bɛ bo zo amra dɔɔnwo, yemɔti bɛbɔle bɛ nu bɛdianle bɛ kɛ abusua ko.

¹² Kohate wole mrenya nna: Amelam, Yezehaa, Hibulɔn, yɛɛ Ɛzeɛle.

¹³ Amelam a wole Aalɔn nee Mosisi a. (Bɛdule Aalɔn nee ɔ bo zo amra bɛziele ahane kɛ bɛmɛ ala a bɛnlea ninyɛne mɔɔ anwo te na bɛfa bɛsonle Nyamenle la azo dahuu a, eza ɔwɔ kɛ bɛmɛ a bɛkpu ɛyɛlɛ wɔ mekɛ biala mɔɔ bɛlɛsonle Ɛdɛnkɛma la, na bɛsɛlɛ Ɛdɛnkɛma nyilalɛ bɛmaa menli ne dahuu a.

¹⁴ Bɛvale Nyamenle sonla Mosisi abo zo amra bɛbokale Livaema ne.)

¹⁵ Mosisi wole mrenya nwiɔ: Gɛhyɔn yɛɛ Ɛleyizɛ.

¹⁶ Gɛhyɔn amra ne mɔ kpanyinli a le Hyɛbuwɛle.

¹⁷ Ɛleyizɛ wole ralɛ nrenya kokye. Yemɔ a le Rilihabaya. Noko Rilihabaya nyianle ɔ bo zo amra dɔɔnwo.

¹⁸ Yezehaa a le Kohate ara nrenya mɔɔ tɔ zolɛ nwiɔ a. Ɔwole ralɛ nrenya ko. Yemɔ a le Hyɛlomete mɔɔ gyi abusua ne ati la.

¹⁹ Kohate ara nrenya ne mɔɔ tɔ zolɛ nsa la, Hibulɔn, wole mrenya nna. Bɛmɛ a le Gyɛlaya, Amalaya, Gyɛheezeɛle, yɛɛ Gyɛkamɛyam.

²⁰ Ɛzeɛle a le Kohate ara nrenya mɔɔ tɔ zolɛ nna a. Ɔ mra mrenya nwiɔ. Bɛmɛ a le Maeka nee Yehyaya.

²¹ Mɛlɛlae wole mrenya nwiɔ, bɛmɛ a le Malae, yɛɛ Muhyae. Malae ɔdaye ɔwole mrenya nwiɔ: Ɛlieza yɛɛ Kehye.

²² Ɛlieza anwo nrenya na yeawu. Ɔ mra ne mɔ amuala le mraalɛ ngome. Ɔ mra mraalɛ ne mɔ gyale ɔ diema Kehye amra mrenya ne mɔ.

²³ Mɛlɛlae ara nrenya ne mɔɔ tɔ zolɛ nwiɔ la, Muhyae, wole mrenya nsa. Bɛmɛ a le Malae, Yida, yɛɛ Gyɛlɛmo.

²⁴ Ɛnee Livae abo zo amra mbusua ekpulike ekpulike ne mɔ ɛne. Bɛhɛlɛ abusua ko biala nee nuhua menli ne aluma wɔ buluku nu bɛzie ɛkɛ. Ɔ bo zo amra ɛhye mɔ ko biala mɔɔ kɛli ɛvolɛ abulanwiɔ mɔɔ kɔ la, ɔwɔ kɛ yɛ Ɛdɛnkɛma Ɛzonlenlɛ Sua ne gyima ne bie.

²⁵ Devidi zele bɛ kɛ, “Yizilayɛ Ɛdɛnkɛma Nyamenle ne ɛmaa ye menli ne anzo nu ɛdwo bɛ, yɛɛ ɔdaye mumua ne ɔbadɛnla Gyɛlusalɛm ɛke dahuu.

²⁶ Yemɔti ɔngyia kɛ eza Livaema ne kɛzoa Ɛdɛnkɛma Ndanlɛ Sua ne nee ninyɛne mɔɔ bɛfa bɛyɛ ɛzonlenlɛ la kɛkpɔsa.”

²⁷ Na ɔlua Devidi ngyehyɛlɛ ne azo, bɛyɛle ye kɛ Livaenli biala mɔɔ kɛli ɛvolɛ abulanwiɔ la ɔwɔ kɛ yɛ nyamenlezonlenlɛ gyima ne bie.

²⁸ Bɛ gyima a le kɛ ɔwɔ kɛ bɛboa Aalɔn abo zo amra ne mɔɔ bɛmɛ a bɛle sɛlɛvolɛma la wɔ nyamenlezonlenlɛ gyima ne anu na bɛnea Ɛzonlenlɛ Sua ne ekpumgbunli ne mɔ nee alie ne mɔ azo boɛ, bɛnea kɛ debie biala mɔɔ bɛdu bɛzie ɛkɛ wɔ nyamenlezonlenlɛ nu la, awie ɛnrɛgua nwolɛ evinli.

²⁹ Bɛdabɛ yɛɛ ɔwɔ kɛ bɛnea kpanwo ne mɔɔ bɛva bɛbɔ azu bɛmaa Nyamenle la azo a, ɔwɔ kɛ bɛnea esamo ne mɔɔ bɛva bɛbɔ azu, kpanwo ne mɔɔ mgbɔvonle ɛnle nu, esamo ne mɔɔ bɛva ɔlivi nwole bɛfete, yɛɛ azubɔdeɛ ne mɔɔ bɛdondo la azo a. Eza ɔwɔ kɛ bɛsuzu na bɛtila Ɛzonlenlɛ Sua ne azubɔdeɛ ne mɔ anloa.

³⁰ Ɔwɔ kɛ bɛye Ɛdɛnkɛma ayɛlɛ na bɛyeyɛ ye nwonlomɔ nee nɔsolɛ,

³¹ nee mekɛ biala mɔɔ bɛlɛyela nane bɛabɔ azu bɛamaa Ɛdɛnkɛma wɔ Ɛnwomenlelielɛ Kenle, Siane Fofolɛ Ɛvoyialilɛ, nee ɛvoyia mɔɔ ɛha la ɛlilɛ nu la. Bɛyɛle ngyehyɛlɛ mɔɔ kile Livaema dodo mɔɔ ɔwɔ kɛ yɛ gyima wɔ Ɛdɛnkɛma ɛzonlenlɛ nu mekɛ biala a.

³² Bɛmɛ a Ɛdɛnkɛma Ndanlɛ Sua ne nee Ɛzonlenlɛ Sua ne wɔ bɛ sa nu a, na bɛboa bɛ mediema Aalɔn abo zo amra ne mɔ wɔ bɛ sɛlɛvolɛ gyima ne ɛyɛlɛ nu a.