1 Edk 13 - BAEBOLO ANZƐƐ BULUKU NWUANZANWUANZA

Bɛye Ngyekyeleɛ Ɛlɛka ne bɛvi Keleate Gyialem

¹ Belemgbunli Devidi nee ye safohyenlema mɔɔ nea ɛlɔnema apenle yɛɛ ɛlɔnema ɛya anwo zo la vale adwenle.

² Akee Devidi zele Yizilayɛma amuala kɛ, “Saa bɛdie bɛto nu, na saa ɔyɛ Ɛdɛnkɛma yɛ Nyamenle ne ɛhulolɛ a, ɛnee bɛmaa yɛhɛla yɛ mediema mɔɔ wɔ maanle ye anu la amuala, sɛlɛvolɛma nee Livaema mɔɔ wɔ azua ne mɔ azo la yɛmaa bɛrɛla.

³ Na yɛhɔ yɛhɔva Nyamenle Ngyekyeleɛ Ɛlɛka ne mɔɔ mekɛ mɔɔ Sɔɔlo di ye belemgbunli ne la bɛamkpo ɔ bo zo la yɛrɛla.”

⁴ Menli ne amuala anye liele nzuzulɛ ne anwo na bɛliele bɛdole nu.

⁵ Yemɔti Devidi manle Yizilayɛma kɔsɔɔti mɔɔ wɔ maanle ne anu la yiale. Menli vi Yigyibiti ɛweɛne zo lɔ, wɔ nyiakɛ toonwo mɔɔ kɔdwu Heemate wɔ sɔlɔ nehane rale kɛ bɛkɔ Keleate Gyialem bɛahɔva Ngyekyeleɛ Ɛlɛka ne bɛara Gyɛlusalɛm.

⁶ Devidi nee menli ne hɔle Beeyala, suakpole ɛhye eza bɛfɛlɛ ye Keleate Gyialem. Ɔwɔ Dwuda maanzinli nu. Bɛhɔle kɛ bɛkava Nyamenle Ngyekyeleɛ Ɛlɛka ne bɛara. Ɛdɛnkɛma mɔɔ de ye belemgbunli ebia nu wɔ abɔdeɛ ne mɔ mɔɔ lɛ ndɛbalɛ la ati zo anwuma la duma a la Ɛlɛka ne azo a.

⁷ Na bɛyele Nyamenle Ngyekyeleɛ Ɛlɛka ne bɛvile Abenadabe sua nu ɛkɛ bɛziele ye wɔ ehwili fofolɛ mɔɔ bɛyɛ la anu. Ɛza nee Ahayo a hanle ehwili ne a.

⁸ Devidi nee menli ne mɔ amuala vale bɛ anwosesebɛ muala zile agole dole edwɛne na bɛbɔle akɛya, aweɛne ndendenle, getaa yɛɛ sɔnwosɔnwo bɛyeyɛle Nyamenle.

⁹ Mɔɔ ɛnee asɛɛ bɛdwu Kaedɔn, ɛleka mɔɔ bɛwozo ma ne la, ɛnlankɛ ne mɔɔ ɛlɛtwe ehwili ne la agyakɛ wuanenle ye, na Ɛza dole ɔ sa zɔle Ngyekyeleɛ Ɛleka ne anu.

¹⁰ Ɛdɛnkɛma vale Ɛza anwo ɛya na ɔmanle ɔwule ɛkɛ ne ala, ɔluakɛ ɔzɔle Ɛlɛka ne anu. Ɔdɔle amolɛ nu wɔ Nyamenle anyunlu ɛkɛ ne.

¹¹ Yemɔti ɔvi mekɛ ne, bɛvɛlɛ ɛkɛ ne Pilɛze Ɛza toonwo a yeradwu ɛnɛ a. Na ɔyelale Devidi, ɔboalekɛ Ɛdɛnkɛma ɛva ɛya ɛdea Ɛza.

¹² Akee Devidi zulole Nyamenle kpole na ɔzele kɛ, “Ɛnee kɛ menwɔzi menwɔyɛ na meava Ngyekyeleɛ Ɛlɛka ye meahɔ sua nu bɔbɔ ɛ?”

¹³ Yemɔti Devidi anva ɛlɛka ne angɔ Gyɛlusalɛm. Ɔgyakyile ye wɔ nrenya bie mɔɔ wɔ Gate mɔɔ bɛfɛlɛ ye Obɛde Yidɔm la sua nu.

¹⁴ Ɔwoale ɛkɛ ne siane nsa na Ɛdɛnkɛma yilale Obɛde Yidɔm nee ye sua nu amra, nee debie biala mɔɔ bɛlɛ la.